AJUMTALÁB 30
¡A yanél axi talnek neʼets ka wichiy ka ejtsin!
An tsemláj in tʼajál abal yan i atikláb kin yajchiknaʼ. Jaxtám, an Biblia in ulal abal an tsemláj pel jun i tomolnax (1 Corintios 15:26). Ban ajumtaláb 27, a exóbnaʼ abal a Jehová neʼets kin talabédhaʼ an tsemláj. ¿Pero jantʼoj neʼets ka watʼey kʼal an atiklábchik axi kʼwajat tsémenek? Al axéʼ xi ajumtaláb neʼets ki exóbnaʼ tin kwéntaj jun i aychixtaláb axi a Jehová tu pidhál. Jajáʼ neʼets kin tʼajaʼ abal millones i atikláb ka ejtsin abal ka kʼwajiy kulbél abal etsʼey. ¡Axi tsémenek neʼets ka edháj! Pero, ¿chubax neʼets ka ejtsin an tsemélom? ¿Juʼtáj ti neʼets ka edháj, ti éb o tejéʼ Tsabál?
1. ¿Jantʼoj in léʼ kin tʼajaʼ a Jehová abal kʼal i yanél axi tsémenek?
A Jehová in lej léʼits kin edhaʼ patal axi tsémenek. A Job pelak jun i inik axi in lej belálak kʼal a Dios, jajáʼ in exlálak abal max ka tsemets, yab neʼetsak ka ukʼchiyat «ban jolimtaláb». A Job in uchaʼ a Dios: «Tatáʼ neʼets ti kin tawnaʼ, ani nanáʼ neʼets tu tókʼtsiy» (ka ajiy Job 14:13-15).
2. ¿Jaleʼ ti lej belál abal an tsemélom neʼets ka edháj?
Tam ti a Jesús kʼwajiy ban Tsabál, pidhan i tsapláb kʼal a Jehová abal kin edhaʼ an tsemélom. Jaxtám, a Jesús in ejtow kin edhaʼ jun i tsʼikʼách axi in kwaʼalak 12 i támub, ani in kwitólil jun i tsemchidh uxum (Marcos 5:41, 42; Lucas 7:12-15). Talbél, in jaʼúb Lázaro jayej tsemets. Pero a Jesús in edhaʼ, bélits abal in neʼdhálak tseʼ a kʼicháj ti tsémenek ani ti jolidh. A Jesús expidh in ólonchij a Dios, in metʼaʼ juʼtáj ti kʼwajatak jolidh a Lázaro ani in uluw kawidh: «¡Lázaro, kit kalej tanáʼ!». Ani tam, «kalej a Lázaro», ¡wíchbanchat in ejatal! (Juan 11:43, 44). ¿A tsálpayal jantʼiniʼ tin atsʼaʼ in jaʼúb ani in yanél a Lázaro?
3. ¿Neʼets ka edháj a yanél axi tsémenek?
An Biblia in ulal abal a Dios «neʼets kin edhaʼ an tsemélom» (Hechos 24:15). An atiklábchik axi a Jesús in edhaʼ yab kʼwajatak ti éb (Juan 3:13). Jajáʼchik in atsʼaʼ lej kulbél kom edháj. Lej wéʼits, a Jesús neʼets kin edhaʼ miles de millones i atikláb abal ka kʼwajiychik kulbél abal etsʼey al jun i alabél Tsabál. A Jesús in uluw abal «neʼets ka edháj patal an tsemélom axi kʼwajat tin tsalápil a Dios». Neʼets ka edháj ma jitaʼchik lej biyálits ti talnek (Juan 5:28, 29, nota).
ABAL KA EXÓBNAʼ MÁS
Ki exóbnaʼ kʼal an Biblia jaleʼ i éjtowal ki belaʼ abal an tsemélom neʼets ka edháj. Jayej ki tsuʼuw jaleʼ tu kanatbedhál ki exlaʼ abal waʼats jun i aychixtaláb.
4. A Jesús in tejwamédhaʼ abal in éjtowal kin edhaʼ an tsemélom
Ki exóbnaʼ jantʼiniʼ ti a Jesús in edhaʼ a Lázaro. Ka ajiychik Juan 11:14 ani 38-44, ani ka tsálpaychik kʼal axéʼ:
¿Jaleʼ ti belál abal a Lázaro chubax kʼwajatak tsémenek? (Ka exóbnaʼchik an versículo 39.
Max a Lázaro kʼwajatak ti éb, ¿walám tékedhak abal a Jesús kin wíchbaʼ tejéʼ Tsabál?
5. ¡Yan i atikláb neʼets ka edháj!
Ka ajiychik Salmo 37:29 ani ka tsálpaychik kʼal axéʼ:
¿Juʼtáj ti neʼets ka kʼwajiy an miles de millones i atikláb axi neʼets ka edháj?
A Jesús yab expidh neʼets kin edhaʼ jitaʼchik in kʼakʼnálak a Jehová, jayej neʼets kin edhaʼ kʼeʼat i atikláb. Ka ajiychik Hechos 24:15 ani ka tsálpaychik kʼal axéʼ:
Tam ka edháj an tsemélom, ¿jitaʼ a léʼ kit wichiy ka tsuʼuw?
Ka tsalpay kʼal axéʼ: jun i tataláb in éjtowal kin edhaʼ in tsakámil axi kʼwajat lej wayamadh. A Jesús jayej in éjtowal kin edhaʼ patal an tsemélom.
6. Tu lej kanatbedhál ki exlaʼ abal neʼets ka edháj an tsemélom
Jawaʼ in ulal an Biblia tin kwéntaj in tsʼikʼáchil a Jairo, in tolmiyámal yan i atikláb axi in kʼibamal jun in yanél. Ka ajiy axéʼ xi tʼilab ti Lucas 8:40-42 ani 49-56.
Okʼxidh kin édhanchij in tsʼikʼáchil a Jairo, jajáʼ in uchaʼ: «Yab kit jikʼey, tokot ka lej belaʼ» (ka exóbnaʼchik an versículo 50.) ¿Jantʼiniʼ in éjtowal ti tólmiy axéʼ xi aychixtaláb...
... tam ka tsemets jun a yanél?
... max it leʼnáb ki odhnáj?
Ka tsuʼuwchik an VIDEO, ani ka tʼilaʼchik jawaʼ a tsuʼuw:
¿Jantʼiniʼ ti kanatbedhámej in tátajchik a Phelicity kʼal axéʼ xi aychixtakláb?
JAWAʼ TALCHIK IN TSÁLPAYAL: «Kʼibat u atsʼál ku belaʼ abal an tsemélom neʼets ka edháj ban Tsabál».
¿Jantʼoj a tsálpayal tatáʼ?
¿Jawaʼ tam texto axi ti Biblia a éjtowal ka eyendhaʼ abal ka tejwamédhanchij abal an tsemélom neʼets ka edháj tejéʼ Tsabál?
JAWAʼ I EXOBNÁMAL
An Biblia in ulal abal millones i atikláb neʼets ka edháj. A Jehová in lej léʼ kin edhaʼ an tsemélom. Jaxtám in pidhámal in tsap a Jesús abal kin ejtow kin edhaʼ.
Ki tʼilaʼ jawaʼ i exóbnaʼ
¿Jaleʼ i lej belál abal a Jehová ani a Jesús in lej léʼ kin edháj an tsemélom?
¿Juʼtáj ti neʼets ka kʼwajiy an millones i atikláb axi ka edháj, ti éb o ti Tsabál? ¿Jaleʼ ta tsálpayal antsanáʼ?
¿Jaleʼ ta lej belál abal a yanél axi tsémenek neʼets ka wichiy ka edháj?
KA EXÓBNAʼ JANTʼOJ ÍT
Ka ajiy jantʼoj axi neʼets ti tólmiy abal yab ti lej ataʼ an tʼeʼpintaláb.
«Tolmixtalab abal jitaʼ in kʼibamal jun in yanél ban tsemláj»(¡Despertad!, núm. 3 2018)
¿In éjtowal ka tólmiyat kʼal an Biblia jitaʼ in kʼibamal jun in yanél ban tsemláj?
¿Jantʼoj i éjtowal ki tʼajaʼ tam ka tsemets jitaʼ axi i lej kʼanidhál? (5:06)
Ka exóbnaʼ jantʼiniʼ a éjtowal ka tólmiy jun i tsakam axi in kʼibamal jun in yanél ban tsemláj.
¿Neʼets ka edháj i atikláb ti éb? ¿Walám waʼats axi yab neʼets ka edháj?
«¿Jantʼoj in léʼ kin uluw abal neʼets ka edháj an tsemélom?» (Artículo axi ti jw.org)