Ka eyendhaʼ i kaw axi patal in exbayal

Jawaʼ in tʼajaʼ a Jesús

VIDEO: A Jesús in eyendhaʼ jun i tʼiplab abal kin tejwamédhaʼ abal a Jehová tu beletnál

1. Ka tsuʼuw an VIDEO o ka ajiy Mateo 6:​25-27. Ani talbél ka tʼajaʼ ti kwéntaj axéʼ xi konowixtalábchik:

1. ¿Jantʼoj tam tʼiplab in eyendhaʼ a Jesús abal kin tejwamédhaʼ abal a Jehová tu beletnál?

2. A Jesús in exlálak yan jantʼoj tin kwéntaj an tsʼitsinchik, pero, ¿jaleʼ ti expidh in eyendhaʼ jun i tsalap axi yab kʼibat ani jaleʼ ti lej alwaʼ jawaʼ in tʼajaʼ?

¿Jantʼoj tu exóbchal in tʼiplabil a Jesús?

2. Max ki eyendhaʼ i kaw axi yab kʼibat an atikláb neʼets kin exbay ani neʼets ka ulits tin ichích jawaʼ i exóbchal.

Ka nitsʼbiy a Jesús

3. Yab kit lej kawin. Yab ka uchaʼ an atikláb patal jawaʼ a exlál tin kwéntaj jawaʼ kʼwajat a tsuʼtalchik. Jawaʼ más alwaʼ jats ka exóbchij expidh jawaʼ in ulal an libro. Tam ka tʼajchij jun i konowixtaláb, ka aychij ma ti tókʼtsiy. Pero max an atikláb yab in exlál an tokʼtsixtaláb o kin tókʼtsiy kʼeʼat jantʼoj axi yab kʼwajat ban Biblia, ka tʼajchij kʼeʼat i konowixtaláb abal kin exbay an exobchixtaláb. Max an exóbal in exbayits an tsalap axi exbadh, a éjtowal ka aynanchij.

4. Ka eyendhaʼ jawaʼ an exóbal in exlálits abal ka exóbchij jantʼoj ít. Jun i tʼiplab, max neʼets ka exóbnaʼchik tin kwéntaj jawaʼ a Jehová neʼets kin tʼajaʼ kʼal an atiklábchik axi tsemenek, a éjtowal ka tʼilchij jawaʼ u watʼel tam jun i atikláb ka tsemets, kom nixéʼ pel jantʼoj axi in exobnámalits.

5. Ka takuy alwaʼ an tʼiplab axi neʼets ka eyendhaʼ. Okʼxidh ka eyendhaʼ jun i tʼiplab, ka tsaplay kʼal axéʼ:

1. «¿Walám yab neʼets kin atsʼaʼ kʼibat jawaʼ neʼets ku uchaʼ?».

2. «¿Walám neʼets kin exbay antsanáʼ jantʼiniʼ ti neʼets ku uchaʼ?».

3. «¿Walám neʼets kin exbay an exobchixtaláb ani yab expidh an tʼiplab?».