Abal ku bajudhméj jantʼiniʼ u exóbchix: Yabáts ka pidhaʼ i exobintaláb kʼal an Biblia jitaʼ yab in tʼajál jawaʼ in exobnál

JALEʼ TI EXBADH. An atiklábchik kwaʼal kin belaʼ kʼal a Jehová abal kin kʼániy in ejatal (Ro 10:13, 14). Bélits abal yan i atikláb in exobnál an Biblia yab patal in léʼ kin belkaʼ in abatnaxtal a Jehová. Ki eyendhaʼ alwaʼ an kʼij, ki exóbchij an atiklábchik axi chubax in léʼ kin jalkʼuy in ejatal abal kin tʼajaʼ in kulbétal a Jehová. Jaxtám max jún i exóbal yab in tʼajál jawaʼ in exobnál yabáts in tomnál ki pidhaʼ i exobintaláb kʼal an Biblia, ki tólmiy jitaʼchik a Jehová in utuwal kʼal jajáʼ ani tin bichówil (Jn 6:44). Pero max jún a kʼicháj an atikláb axi a exóbchalak kʼal an Biblia kin jalkʼuy in tsalápil ani kin léʼnaʼ ti exóbal juníl, ka exóbchij, «kom walám in ejtowal kin batsʼuw an ejataláb abal etsʼey» (Hch 13:48).

JANTʼINIʼ KA TʼAJAʼ

• Ka uchaʼ abal i kulbél kʼal jajáʼ kom in exobnál an chubaxtaláb axi ti Biblia (1Ti 2:4).

• Ka uchaʼ abal lej exbadh kin tʼajaʼ tin ejatal jawaʼ in exobnál (Lu 6:46-49).

• Kʼal i kʼanidhomtaláb, ka exóbnaʼ kʼal an atikláb in tʼilab an óm ani ka tólmiy kin tsalpay kʼal jantʼoj tu tʼokʼbancháb kin tʼajaʼ i jalkʼuxtaláb (Mt 13:18-23).

• Ka uchaʼ kʼal i kʼanidhomtaláb jaleʼ ti yabáts neʼets ka exóbchij kʼal an Biblia.

• Ka uchaʼ abal tam junchikíl neʼets ka tawnaʼ o ka tsaʼbiy ani abal max kin tʼajaʼ jawaʼ in exobnámalits, neʼets ka exóbchij juníl.

TALBÉL TA TSUʼÚMAL AN VIDEO, KA TÓKʼTSIY AXÉʼ XI KONOWIXTALÁBCHIK:

• Kʼal jawaʼ in uluw an exóbal, ¿jantʼoj in tejwamédhal abal yab kʼwajat in tʼajál tin ejatal jawaʼ in exobnál?

• ¿Jantʼiniʼ in tólmiy an epchal an exóbal kʼal an Biblia kin tʼajaʼ ti kwéntaj abal in yéjenchalak kin tʼajaʼ i jalkʼuxtaláb tin ejatal?

• ¿Jantʼiniʼ ti uchan an exóbal kʼal an epchal jawaʼ kwaʼalak kin tʼajaʼ max in léʼ ti exóbal juníl?