¿Jantʼoj tu exóbchal an ajatlábchik?

¿Jawaʼ tam ajatláb más a kulbetnál axi ti JW Broadcasting^®? ¿Jaleʼ a kulbetnál? ¿A tsálpayal abal jawaʼ in tejwamedhál an videos pél jawaʼ i watʼál ti ejatal? Walám waʼats jún i ajatláb axi más a atsʼál kom u káw kʼal jantʼoj axi a lej kulbetnál o a kulbétnanchal jantʼiniʼ u tʼeneyáb. Pero an ajatlábchik ani an videos musicales yab expidh tsʼejkamej abal ku kʼijidhbéj.

Patal an ajatláb axi waʼats ti JW Broadcasting in ejtowal tu ku exóbchij yan jantʼoj abal ki eyendhaʼ ti ejatal ani ban olnomtaláb. Talchik in kawnál tin kwéntaj ki batsʼuw ti kʼimaʼ an epchalchik, tin kwéntaj an junkudhtaláb, an iniktaláb, an kʼanidhomtaláb ani an belomtaláb. Jún i ajatláb tu kániyal ku wichiy kʼal a Jehová. Jayej waʼats i ajatláb axi tu uchal abal kwaʼal ku pakwlanchixin, abal etsʼey kwaʼal ki tejwamédhaʼ i putudhtaláb ani abal jantʼoj i ejtowal ki tʼajaʼ abal ki tʼójonchij más a Jehová. Ma waʼats jún i ajatláb axi in olnál jantʼiniʼ ki eyendhaʼ tekedh an teléfono. ¿Jantʼoj a exobnámal kʼal axéʼchik xi ajatláb?

TALBÉL TA TSUʼÚMAL AN VIDEO MUSICAL YAB NEʼETS KA OWEY, KA TÓKʼSIY AXÉʼ XI KONOWIXTALÁBCHIK:

• ¿Kʼal jawaʼ tam aychixtaláb kʼwajat in tsálpayal an tomkinél axi payeblabits? (Gé 12:3).

• ¿Jantʼoj i ejtowal ki tʼajaʼ abal ki lej belaʼ abal a Jehová neʼets kin putuw in káwintal?

• ¿Jitaʼchik neʼets ku wichiy ki tsuʼuw junílekʼij?

• ¿Jantʼiniʼ tu tólmiyal ki kuxuy an kʼibataláb axi i tametnál, max ki tsalpay kʼal an lablixtaláb axi neʼets kin chiʼdhaʼ in Eyaltal a Dios? (Ro 8:25).