An ajatlábchik axi tu útuwal más kʼal a Dios

Ki ejtow tu ajat, pel jun i alabél tsʼejwalixtaláb in kʼál a Jehová. Tu tólmiyal ki atsʼaʼ léj kulbél, tu kanatbedhál ani tu tólmiyal abal yab ku lej tʼeʼpin. Jats jawaʼ i atsʼál tam ki otsʼowiy an ajatláb axi ít u kalel ti JW Broadcasting^®. Axéʼ xi ajatlábchik jayej tu tólmiyal ku utey más kʼal a Jehová.

Ti 2014 ma xowéʼ, tsʼejkamej watʼadh 70 i ajatláb ani jun kʼal axéʼ xi ajatláb i éjtowal ki atsʼaʼ al watʼadh 500 i kawintaláb. Walám a konówiyal ta baʼ: «¿Jantʼiniʼ tu tsʼejkáb axeʼ xi ajatlábchik? ¿Ani jitaʼchik in tsʼejkál?».

Jawaʼ yab a exlál tin kwéntaj axeʼ  xi tʼojláb

An Comité de Enseñanza axi u tólmix kʼal an Kwenél i Ókʼnom, an Equipo de Música de Servicios de Audio y Video, játs axi in tsʼejkál an ajatlábchik axi u kalel ti JW ani píl juʼtáj. Ban Equipo de Música u tólmix 13 i epchal, jajáʼchik in tʼojojiyal an letra, an son, jayej in tʼojojiyal tam kʼwajatits taʼpadh. An Comité de Enseñanza in takuyámal talchik i epchal abal ka tólmixin abal ka tʼajan axéʼ xi tʼojláb ma tin kʼimaʼ. Waʼats jitaʼchik in tsʼejkál an letra, an son ani kʼeʼatchik u ajat. Axéʼchik xi epchal in tejwamedhál i tsaʼataláb, kom yab in áychal ka puwénchat kʼal kʼeʼat i epchal kom in tʼajál axeʼ xi tʼojláb.

¿Jantʼiniʼ tu tsʼejkáb an ajatlábchik? An Comité de Enseñanza in tákuyal an textos axi neʼets kin éyendhaʼ al axéʼ xi ajatláb ani jayej in tsálpayal jantʼoj in léʼ kin exóbchij an epchalchik kʼal axéʼ xi ajatláb. Talbél, an Equipo de Música in tákuyal jitaʼ neʼets kin tsʼejkaʼ an son ani jitaʼ neʼets kin dhuchaʼ. U tʼajnal jun i grabación ani an Comité de Enseñanza in metʼál abal kin tsuʼuw jantʼoj in kʼibchalej. Talbél, an Equipo de Música in punchal jawaʼ in kʼibchalej ani tam in tʼajál an grabación jantʼiniʼ ti neʼets ka jilkʼonits abal ka kalej. An ajatláb u tʼajnal pílchik juʼtáj, ejtíl, ban sucursales o tin kʼimáʼ an epchalchik.

Abal kin tsʼejkaʼchik ani kin tʼajaʼ jun i grabación, in eyendhálchik an computadora abal kin tʼojojoy jun i son, jayej in eyendhálchik i programas abal kin dhuchaʼ. Jayej in eyendhálchik jun i patʼál axi in tʼajál abal ka atsʼatméj pílchik i son, in eyendhálchik kʼeʼat i patʼál abal ka atsʼatméj káwidh ani jayej in eyendhálchik i micrófonos. Waʼats i micrófonos axi in jalbíl 2.000 ani waʼats axi ma 20.000 i pesos. Ti 2020 pákuwat 232.000 pesos abal ka tsʼaʼiyat.

¿Jantʼoj u tʼajnal abal yab ka lej pákuwat i tumín? Abal yab ki eyendhaʼ yan i epchal ti Betel ban Equipo de Música, i konchal an epchalchik axi kʼwajat tin kʼimáʼ abal tu ku tólmiy. Jayej abal yab kin tʼajaʼchik yan i grabaciones in eyendhálchik an computadora abal kin tsʼejkaʼ i son.

«Tin lej kanatbedhál»

¡An epchalchik in lej kʼijidhnál an son! Ejtíl a Tara, axi u kʼwajíl ti Alemania, in ulal: «Tam u kwaʼal jun i kʼibataláb, an ajatláb tin tʼajchal ku atsʼaʼ alwaʼ. Tam u atsʼál tu káwintal, pel ejtíl max a Jehová tin mutsʼukʼnál». A Dimitri, axi u kʼwajíl ti Kazajistán, in ulal: «U kulbetnál ku atsʼaʼ an ajatlábchik ani yab in tʼeʼpinál kom u exlál abal jawaʼ in ulal tal ti Biblia. Jayej, axéʼ xi ajatlábchik tin tólmiyal abal ku tsálpay jantʼiniʼ kin útey más kʼal a Jehová».

A Delia, axi u kʼwajíl ti Sudáfrica, tu ólchal jantʼoj in atsʼál tam in otsʼowiyal an ajatláb: «Tam u kwaʼal jun i tʼeʼpintaláb o jun i kʼibataláb, an ajatlábchik tin léj kanatbedhál etsʼey u elál jun axi tin léj tólmiyal. Junchikíl expidh ku atsʼaʼ an son u atsʼálits lej alwaʼ».

Waʼats yan i epchal axi in léj kulbetnálchik kin otsʼowiy axéʼ xi ajatláb. A Lerato, axi jayej u kʼwajíl ti Sudáfrica, in ulal: «An ajatláb axi in bij Yab ne’ets ka owey ani An ít ejataláb tin tólmiyal ku tsálpay al an kʼicháj tam ka wichiy junílekʼij u mamá. Tam u atsʼál axéʼ xi son, u atsʼál ejtíl max u tsuʼtalits u mamá ani u mutsʼukʼnál».

Waʼats jun i ajatláb axi in léj tólmiy jun i tsʼikʼách axi ti Sri Lanka. Jajáʼ in ulal: «Axi tu exóbchal Ciencias tin uchaʼ yan i kaw axi tin lej ódhnaʼ, kom pel in ólchix kʼal a Jehová. In lej jikʼey ani yab u elaʼ jantʼoj ku uchaʼ. Tam tin wichiy tu kʼimáʼ, u mamá tin uchaʼ abal ku otsʼowiy an ajatláb axi in bij Fuerte tú serás. Axeʼ xi ajatláb tin tólmiy ku exbay abal lej exbadh kin tʼojojon ani ku aliy i olchixtaláb abal ku exlaʼ jantʼiniʼ kin tókʼtsin. Tam ti chudhey, u tʼílmay an exóbchix ani jajáʼ tin lej otsʼowiy. Talbél tin uchaʼ abal xowéʼ in éxbayal más alwaʼ jawaʼ u belál. U lej kʼakʼnanchal in bichówil a Jehová kom in tsʼejkál i ajatláb axi u lej kanatbédhax».

¿Juʼtáj ti elál an tumín abal ka tʼajan axéʼ xi ajatlábchik? I léj kʼakʼnál an donaciones axi u bináb tin puwél an tsabál ti donate.jw.org.