Tatalábchik, ka exóbchij a tsakámil abal ka kʼwajiy tʼojojodh

Axéʼ xi xeʼtsintaláb tu exóbchal abal jawaʼ alwaʼ pel kidháb ani abal jawaʼ kidháb pel alwaʼ (Is 5:20). Yan i atikláb in tʼajál jawaʼ a Jehová in pojkál, ejtíl, u kwatsíl kʼal in at inik ani kʼal in at uxum. Jaxtám, kʼakʼadh abal i tsakámil axi u kʼálelej ti escuela ka nixan kʼal in at juntal o kʼal kʼeʼatchik i atikláb abal kin tʼajaʼ jantʼoj axi kidháb. Tatalábchik, ¿jantʼiniʼ a éjtowal ka tʼojojoy a tsakámil abal tam kin tamétnaʼ jun kʼibataláb ejtíl axéʼ?

Ka exóbchij jantʼoj in tsálpayal a Jehová (Le 18:3). Biyat neʼets ti yejél, ka exóbchij kʼal an Biblia jawaʼ in tomnál kin exlaʼ tin kwéntaj an sexo (Dt 6:7). Ka tsalpay: «¿U exobchámal u tsakámil juʼtáj ti yab in tomnál ka takan?, ¿in exlálchik jaleʼ ti kwaʼal ka tóltomin tekedh?, ¿in éxbayal u tsakámil abal junchikíl yab in tomnál ka tsuʼtat?, ¿in exlálchik jantʼoj kwaʼal kin tʼajaʼ max ka olchat i pornografía, o ka uchan kin tʼajaʼ jantʼoj axi kidháb?». Max ki exóbchij i tsakámil jantʼoj in tomnál kin tʼajaʼ, yabchik neʼets ka odhnáj (Pr 27:12; Ec 7:12). I tsakámil pel jantʼiniʼ jun i tsʼejwalixtaláb axi tu pidhamal a Jehová. Max ki exóbchij alwaʼ, neʼets ki tejwamédhanchij a Jehová abal i kʼakʼnál axéʼ xi tsʼejwalixtaláb (Sl 127:3).

TALBÉL TA TSUʼUMAL AN VIDEO KI TSʼEJKAʼ JÚN I ATÁJ AXI KIN KÚXUY. KI BELETNAʼ I TSAKÁMIL «KʼAL JAWAʼ KIDHÁB», KA TÓKʼTSIY AXÉʼ XI KONOWIXTALÁBCHIK:

• 

  ¿Jaleʼ ti talchik i tataláb in atsʼál kʼibat kin tʼilmay in tsakámil tin kwéntaj an sexo?

• 

  ¿Jaleʼ in tomnál an tatalábchik kin exóbchij in tsakámil jawaʼ in tsálpayal a Jehová? (Ef 6:4).

• 

  ¿Jantʼoj tam eyextaláb pidhnének an tatalábchik kʼal in bichówil a Jehová? (w19.05-S 12).

• ¿Jaleʼ ti exbadh abal an tatalábchik kin tʼilmay in tsakámil okʼxidh kin tamétnaʼ jun i kʼibataláb?