ABAL KU BAJUDHMÉJ JANTʼINIʼ U EXÓBCHIX | A ÉJTOWAL KA ATSʼAʼ MÁS IT KULBÉL TAM IT ÓLNOM
Ka tsápnanchij ka exbay jantʼiniʼ tin atsʼál an exobal
I pidhál in jalbíl axi más tam i tsuʼtal ani i tʼajál ti kwéntaj jawaʼ in yéjenchal. Ani axéʼ i tejwamedhál tam chubax i leʼ ki tólmiy axi kʼeʼat. Max wawáʼ ki exbay jantʼiniʼ in atsʼál an atiklábchik ban olnomtaláb, exom i nitsʼbiyal an kʼanidhomtaláb axi a Jehová in koʼonchal ani nixéʼ in tʼajál abal jajáʼchik kin léʼnaʼ kin exlaʼ más (Flp 2:4).
Ki exbay jantʼiniʼ in atsʼál an atikláb yab expidh u eynal tam u exóbchix. Jayej u eynal tam i atsʼál, tam i tʼilmayal, tam i yatsiyal i kʼubak, i wal ani jantʼiniʼ i ey. Waʼats yán jantʼiniʼ ti ki tejwamédhaʼ. Ejtíl ki tʼajaʼ ti kwéntaj an atiklábchik, jawaʼ in kulbetnál, in bélomtal, jantʼiniʼ u kʼwajíl, ki pidhaʼ i exobchixtaláb, ki tólmiy pero yab ki nixoknaʼ. Tam an atiklábchik in bátsʼuwal an tolmixtaláb axi i pidhál ban olnomtaláb, wawáʼ i atsʼál más u kulbél.
TALBÉL TA TSUʼÚMAL AN VIDEO LEJ KULBÉL I ATSʼÁL TAM I ÁLIYAL ANI I TʼAJÁL I AYKOL KʼAL A CRISTO. KU BAJUDHMÉJ JANTʼINIʼ U EXÓBCHIX: KA TSÁPNANCHIJ KA EXBAY JANTʼINIʼ TIN ATSʼÁL AN EXOBAL, KA TÓKʼSIY AXÉʼ XI KONOWIXTALÁBCHIK:
¿Jantʼiniʼ in tejwamédhaʼ a Rita abal in exbayalak jawaʼ a Coral in atsʼál kom ulits wákal ?
¿Jantʼiniʼ in tejwamédhaʼ a Rita abal in exbayalak jawaʼ a Coral in atsʼál tam ti in uluw abal lej tsekenek abal ti exóbal?
Tam i tʼajál ti kwéntaj jawaʼ an atiklábchik in atsʼál, jajáʼchik jayej in léʼ kin exlaʼ más a Jehová.
¿Jantʼiniʼ in tejwamédhaʼ a Rita abal in exbayalak jawaʼ in atsʼál a Coral tam ti in uluw abal yab in kwaʼalak alwaʼ tʼojojodh in kʼimáʼ?