I EJATAL TU AYKOL KʼAL A CRISTO
Kwitól ani tsʼikʼách, ka ólchij a papá ani a mamá patal jawaʼ a atsʼál
¿Jaleʼ tin tomnál ka ólchij a papá ani a mamá jawaʼ a tsalpayal? (Pr 23:26). Kom a Jehová in pidhámal in uchbíl ti béletnaʼ ani ti exóbchij (Sl 127:3, 4). Max yab ka ólchij jawaʼ ti tʼeʼpindhál ani jawaʼ a léʼ ka tʼajaʼ, jajáʼchik yab neʼets kin ejtow ti tólmiy. Ani jayej, yab neʼets kin ejtow ti tʼilchij jawaʼ in watʼamal tin ejatal. Tam, ¿in tomnál ka ólchij a papá ani a mamá patal jawaʼ a atsʼál? Imbáj, pero max kʼwajat a tʼajál jantʼoj axi yab alwaʼ, tam in tomnál ka ólchij (Pr 3:32).
¿Jantʼoj a éjtowal ka tʼajaʼ abal kit tʼilmáts kʼal a papá ani a mamá? Ka tsalpay jaykʼiʼ ta éjtowalchik kit tʼilmáts. Jayej a éjtowal ka dhúchunchij jun i carta, juʼtáj ta uchál patal jawaʼ a atsʼál. Ani, ¿max jajáʼchik in léʼ ti tʼilmay tin kwéntaj jantʼoj ani tatáʼ imbáj? Ka tʼilaʼ, a papá ani a mamáʼ ti kʼanidhál. Patal jawaʼ ti tʼilchij a papá ani a mamá neʼets ti tólmiy ta ejatal, xowéʼ ani abal etsʼey (Pr 4:10-12).
TALBÉL TA TSUʼÚMAL AN VIDEO TAM IT TSAKAMEJ: JAWAʼ A ÉJTOWAL KA TʼAJAʼ ABAL KA TʼILMAY A PAPÁ ANI A MAMÁ, KA TÓKʼTSIY AXÉʼ XI KONOWIXTALÁBCHIK:
¿Jantʼoj in ulal a Esther ani a Partik?
¿Jantʼoj tam exobchixtaláb a éjtowal ka kaldhaʼ kʼal in tʼiplábil Jesús?
¿Jantʼiniʼ ti tejwamedhanchamal a papá ani a mamá abal ti kʼanidhál?
A papá ani a mamá in léʼ abal kit kʼwajiy alwaʼ ta ejatal.
¿Jantʼoj tam tsalpadh kaw ti Biblia neʼets ti tólmiy ka tʼilmay a papá ani a mamá?