Tatáʼ a éjtowal ka tólmiy a yanél abal ka kʼwajiychik más kulbél

A Jehová in léʼ abal patal ka kʼwajiy kulbél kʼal in yanél (Sl 127:3-5; Ec 9:9; 11:9). Pero junchikíl walám u xeʼets itʼixbél o tʼeʼpidh ani walám ki uluw jantʼoj axi kin tʼajaʼ abal i yanél yabáts ka kʼwajiy kulbél. ¿Jantʼoj in éjtowal kin tʼajaʼ an yanelábchik abal kin atsʼaʼchik kulbél?

Jun i inik axi in kʼanidhál in kʼimádhil, in tsápnanchal kin béletnaʼ alwaʼ (1Pe 3:7). In watʼal i kʼij kʼal jajáʼ ani yab in konchal kin tʼajaʼ jantʼoj axi in exlál abal yab neʼets kin ejtow kin tʼajaʼ. Jayej in kʼákʼnanchal an tʼojláb axi in tʼajál abal kin béletnaʼ an atáj (Col 3:15). Jayej in uchál abal in lej kʼanidhál ani abal in atsʼál lej kulbél kʼal jajáʼ (Pr 31:28, 31).

An mimláb axi tómkidh in tsápnanchal kin tólmiy in tomkíl (Pr 31:12). In tsápnanchal kin bélkaʼ in tomkíl ani kin kʼakʼnaʼ (Col 3:18). In tʼilmayal kʼal i kʼanidhomtaláb ani tam kʼwajat kʼal kʼeʼat i atiklábchik in olnál jawaʼ in tʼajál alwaʼ in tomkíl (Pr 31:26).

An tatalábchik axi in kʼanidhál in tsakámil, in tsápnanchal kin jolkʼaʼ i kʼij abal ka kʼwajiy kʼal jajáʼchik (Dt 6:6, 7). Etsʼey in tʼilchal abal in kʼanidhálchik (Mt 3:17). Jajáʼchik in exlál jaykʼiʼ kin boliy in tsakámil ani jantʼiniʼ kin tʼajaʼ. Pero etsʼey in tʼajál kʼal i kʼanidhomtaláb (Ef 6:4).

An tsakam axi in kʼanidhál in tátajchik lej bélkax ani in kʼakʼnál in tátajchik (Pr 23:22). Etsʼey in ólchal in tátajchik jawaʼ in atsʼál ani jawaʼ in tsalpayal. Jayej, tam ka boliyatchik yab u tsakúl (Pr 19:20).

TALBÉL TA TSUʼÚMAL AN VIDEO JANTʼINIʼ KI KOʼOY JUN I YANÉL KULBÉL, KA TÓKʼTSIY AXÉʼ XI KONOWIXTALÁB:

¿Jantʼoj in tʼajaʼ an tataláb, an mimláb ani an tsakamchik abal ka kʼwajiy más kulbél?