Tam ku olnomáts ki eyendhaʼ jantʼoj axi an atikláb kin léʼnaʼ kin exlaʼ

A Jesús in tʼajálak ti kwéntaj jawaʼ u watʼelak ani játs in eyendhálak abal kin bínaʼ i exbadh exobchixtaláb tam u ólnomak (Lu 13:1-5). Tatáʼ jayej a éjtowal ka eyendhaʼ jawaʼ xowéʼ kʼwajat ti watʼel, abal an atiklábchik kin léʼnaʼ ti otsʼówiy. A éjtowal ka ólchij an atikláb abal xowéʼ patal jálbinits, abal itekʼij ti watʼenek jun i yajchiktaláb, abal lej waʼats i pextaláb o abal yan i atikláb in eyendhál i drogas. Talbél, a éjtowal ka tʼajchij jun i konowixtaláb abal ka tsálpaxin. Jun i tʼiplab, a éjtowal ka tʼajchij axéʼ xi konowixtaláb: «¿walám jun a kʼicháj ka taley axéʼ xi kʼibataláb?» o «¿Jantʼiniʼ a tsálpayal abal neʼets ka tsʼejkan axéʼ xi kʼibataláb?». Talbél ka ólchij jun i texto axi ti Biblia tin kwéntaj kʼal jawaʼ kʼwajat a tʼilmayal. Max an atikláb in leyej kin exlaʼ más, ka tejwamédhanchij jun i video o jun i publicación axi i eyendhál abal ki bínaʼ i exobintaláb kʼal an Biblia. Ki tsápnanchij abal an atiklábchik kin kulbétnaʼ ani «kin belaʼ an alwaʼ kaw» (1Co 9:22, 23).

¿Jantʼoj walám in kulbetnál kin atsʼaʼ an atiklábchik axi ta kwenchálil?