Ka koʼoy tʼojojodh a tsalápil tam a atsʼál kʼibat ka bélkaʼ a Jehová

1. ¿Jantʼoj in léʼ kin uluw ki koʼoy tʼojojodh i ichích? (2 Timoteo 4:5).

Tam i watʼal i kʼibataláb i éjtowal ki atsʼaʼ kʼibat ku kʼwajiy putudh kʼal a Jehová ani in bichówil. ¿Jantʼoj neʼets tu ku tólmiy abal ki tamétnaʼ axéʼ xi kʼibataláb? Ki koʼoy tʼojojodh i ichích, ki koʼoy tsapik i bélomtal ani yab ki walbaʼ ti baʼ (ka ajiy 2 Timoteo 4:5). ¿Jantʼoj neʼets tu ku tólmiy abal ki koʼoy tʼojojodh i ichích? Yab ki lej tsalpay ban kʼibataláb, ki tsápnanchij ku tsálpaxin jantʼiniʼ a Jehová ani ki lej tsalpay alwaʼ kʼal jawaʼ neʼets ki tʼajaʼ. Max ki tʼajaʼ antsanáʼ, tam yab neʼets tu ku ataʼ jawaʼ i atsʼál ti ichích.

2. ¿Jantʼoj neʼets ki exóbnaʼ?

² Ti watʼey semana i exóbnaʼ tin kwéntaj ox i kʼibataláb axi awil ki watʼaʼ kʼal an atiklábchik. Xowéʼ neʼets ki exóbnaʼ tin kwéntaj ox i kʼibataláb axi awil ki watʼaʼ kʼal an epchalchik. Ani neʼets ki tsuʼuw abal axéʼ xi kʼibataláb awil kin tʼajaʼ ku owméj kʼal a Jehová. Ejtíl, max i tsalpayal abal jun i epchal tu odhnámal, jayej tam wawáʼ u boliyáb o tam i atsʼál kʼibat ki bélkaʼ jantʼoj ít, axi in bichówil a Jehová tu konchal ki tʼajaʼ. Max játs ki watʼaʼ, ¿jantʼoj i éjtowal ki tʼajaʼ abal ki áynanchij ku tsálpaxin tekedh, ki kʼakʼnaʼ a Jehová ani ki bélkaʼ in bichówil?

MAX I TSALPAYAL ABAL JUN I EPCHAL TU ODHNÁMAL

3. ¿Jantʼoj walám ki tʼajaʼ max i tsalpayal abal jun i epchal tu odhnámal kʼal in káwintal o kʼal jawaʼ in tʼajaʼ?

³ ¿A tsalpayámal abal jun i epchal axi ti tamkuntaláb axi in kwaʼal yan in uchbíl ti odhnaʼ kʼal in káwintal o kʼal jantʼoj axi in tʼajaʼ? Walám an epchal yab tʼajchíl tin tʼajaʼ axéʼ (Rom. 3:23; Sant. 3:2). Belits antsanáʼ tatáʼ a yajnaʼ jawaʼ ti uchaʼ. Walám nibal a ejtow ti wáyal kom i lej tʼeʼpidh ani a tsalpay: «¿Jaleʼ tu watʼel axéʼ max u kʼwajat tin bichówil a Jehová?». A Satanás játs axi in léʼ abal ki tsalpay antsanáʼ (2 Cor. 2:11). Lej exbadh ki tʼajaʼ ti kwéntaj abal yab tu ku owmedhaʼ kʼal a Jehová ani in bichówil. Max tatáʼ a atsʼal abal jun i epchal ti odhnámal, ¿jantʼoj a éjtowal ka tʼajaʼ abal ki tsálpaxin tekedh ani yab ka tsalpay kidháb tin kwéntaj an epchal?

4. a) ¿Jantʼoj in tʼajaʼ a José abal ka tsálpaxin tekedh tam ti odhnáj? (Génesis 50:19-21). b) ¿Jantʼoj tu exóbchal in tʼiplábil?

⁴ Yab ka dhayaʼ i lokotaláb ta ichích. Tam ti a José tsakamej lej odhnáj kʼal in epchalchik, u lej kʼwíynalak ani ma u leʼnabak ka tsemdháj (Gén. 37:4, 18-22). A José nújuwat ani al trece i támub in lej yajchiknaʼ. Jajáʼ awilak kin tsalpay abal yabáts u kʼanidhábak kʼal a Jehová ani abal yabáts kʼwajatak ti tolmiyáb. A José yab in dhayaʼ i lokotaláb, tsálpaxin tekedh ani nixéʼ in tʼajaʼ abal ka kʼwajiy koyat. Tam ti a José in kwaʼalakits in éy, in éjtowalak kin wíchbanchij in epchalchik jawaʼ tʼajchin, pero yab in tʼajaʼ, in kóʼonchij i kʼanidhomtaláb ani in pákwlanchij (Gén. 45:4, 5). ¿Jaleʼ tin ejtow kin tʼajaʼ antsanáʼ a José? Kom tsálpaxin tekedh, yab expidh in tsalpay kʼal jawaʼ tʼajchin nibal kʼal an kʼibataláb axi kʼwajatak in watʼal. In tsápnanchij kin exbay jantʼiniʼ u tsalpax a Jehová (ka ajiy Génesis 50:19-21). ¿Jantʼoj tu exóbchal axéʼ xi tʼiplab? Max jun i epchal tu tʼajchámal o tu uchamal jantʼoj axi tu yajbédhanchij i ichích yab ka jolbiy a Jehová. Ka lej tsalpay jantʼiniʼ ti a Jehová kʼwajat ti tólmiyal abal ka kuxuy an kʼibataláb. Ka tsápnanchij ka pákwlanchij an epchal ani ka tʼilaʼ abal axi «u kʼanidhom u pakwlanchix» (1 Ped. 4:8).

5. ¿Jantʼoj in tʼajaʼ an epchal Miqueas abal ka tsálpaxin tekedh tam tin yajnaʼ jawaʼ tʼajchin?

⁵ Ki tsuʼuw in tʼiplábil in kʼál jun i epchal axi u kʼwajíl ti Sudamérica, jajáʼ pel i ókʼnom ani in bij Miqueas.b Jajáʼ in atsʼaʼ abal jun i kʼicháj tʼajchin jantʼoj axi yab tekedh kʼal axi kʼeʼat an ókʼnomchik. Jajáʼ in ulal: «In kʼwajatak lej tʼeʼpidh. Yab jaykʼiʼ u atsʼámalak antsanáʼ. Yab u éjtowalak tin wáyal ani in lej ukʼnalak kom yab u exlálak jantʼoj ku tʼajaʼ». Belits antsanáʼ an epchal Miqueas in tsápnanchij ka tsálpaxin tekedh ani yab in jilaʼ ka atáj kʼal jawaʼ in atsʼálak. In lej kónchalak a Jehová abal ka pidhan an tsapláb abal kin kuxuy, jayej in aliyalak i olchixtaláb ban publicaciones. ¿Jantʼoj tu exóbchal? Max tatáʼ a atsʼál abal jun i epchal ti yajbedhámal kʼal jawaʼ in tʼajámal o kʼal jawaʼ in uluw, ka tsápnanchij yab ka jilaʼ ti ataʼ jawaʼ a atsʼál ta ichích. Walám an epchal yab tʼajchíl in tʼajaʼ ani yab walám in tʼajaʼ ti kwéntaj jawaʼ in uluw o jawaʼ in tʼajaʼ. Ka ólchij a Jehová patal jawaʼ a atsʼál ani ka tsápnanchij ka exbay jantʼoj in atsʼál an epchal. Max ka tʼajaʼ antsanáʼ neʼets ka ejtow ka pákwlanchij an epchal ani yab neʼets ka lej tsalpay kʼal jawaʼ in tʼajaʼ o in uluw (Prov. 19:11). Ka tʼilaʼ abal a Jehová in tsuʼtal patal jawaʼ u watʼel ani Jajáʼ neʼets ti tólmiy abal ka kuxuy (2 Crón. 16:9; Ecl. 5:8).

TAM KU BÓLIYAT

6. ¿Jaleʼ ti lej exbadh ki tʼilaʼ abal a Jehová tu boliyal kom tu kʼanidhál? (Hebreos 12:5, 6, 11).

⁶ Lej yajchik tam ku bóliyat. Pero, max expidh ki tsalpay ban yajal axi i atsʼál neʼets ki ukʼchiy jaleʼ tu kʼwajat tu boliyáb ani walám ki tsalpay abal yab tekedh jawaʼ u tʼajchin. Jayej walám ki ukʼchiy abal a Jehová kʼwajat tu bóliyal kom tu kʼanidhál (ka ajiy Hebreos 12:5, 6, 11). Max ki jilaʼ tu ku ataʼ jawaʼ i atsʼál, a Satanás in éjtowal kin eyendhaʼ nixéʼ abal tu ku ódhnaʼ. A Satanás yab in léʼ abal ki batsʼuw an bolixtaláb ani in léʼ kin eyendhaʼ nixéʼ abal tu ku owmedhaʼ kʼal a Jehová ani an tamkuntaláb. Max tatáʼ it boliyámej, ¿jantʼoj neʼets ti tólmiy abal kit tsálpaxin tekedh?

7. a) Kʼal jawaʼ a tsuʼtal ban dibujos, ¿jantʼoj tam kʼeʼat i tʼojláb pidhan a Pedro kom in jilaʼ ka bóliyat kʼal a Jehová? b) ¿Jantʼoj i exobnál kʼal in tʼiplábil a Pedro?

⁷ Ka jilaʼ abal ki bóliyat ani ka tsápnanchij ka jalkʼuy jawaʼ it uchnal ka tʼajaʼ. Yaníl a Jesús in boliy a Pedro tin tamét axi más an abatwálejchik (Mar. 8:33; Luc. 22:31-34). ¡Lej tidhetál jawaʼ in watʼaʼ a Pedro! Pero yab owméj kʼal a Jesús, jayej in batsʼuw ka bóliyat ani in tsápnanchij kin exbay jaleʼ tu boliyáb. Axéʼ in tʼajaʼ abal ka lej lábliyat kʼal a Jehová ani kin batsʼuw más i tʼojláb ti tamkuntaláb (Juan 21:15-17; Hech. 10:24-33; 1 Ped. 1:1). ¿Jantʼoj i exobnál? Abal lej exbadh ki tʼajaʼ ti kwéntaj jaleʼ tu boliyáb ani ki tsápnanchij ki jalkʼuy jawaʼ u kónchinal ki tʼajaʼ. Max ka tʼajaʼ antsanáʼ, a Jehová neʼets kin áynanchij ti eyendhaʼ ani neʼets ka ejtow ka tólmiy an epchalchik.

8, 9. ¿Jantʼiniʼ tin atsʼaʼ a Bernardo tam ti bóliyat ani kʼal jantʼoj ti tólmiyat abal kin jalkʼuy jawaʼ in tsálpayalak?

⁸ Ki tsuʼuw jawaʼ in watʼaʼ jun i epchal axi u kʼwajíl ti Mozambique, jajáʼ in bij Bernardo. A Bernardo in kʼibaʼ in uchbíl jantʼiniʼ i ókʼnom. ¿Jantʼiniʼ in atsʼálak? Jajáʼ in ulal: «U lej yajnaʼ ani yab u kulbétnaʼ kom in bóliyat». U tʼeʼpindhábak abal max kʼal an epchalchik ka uchan jantʼoj. «Watʼey yan a itsʼ ani yab u exbayalak jaleʼ tin bóliyat, jayej u atsʼaʼ kʼibat ku belaʼ kʼal a Jehová ani in bichówil». ¿Kʼal jantʼoj ti tólmiyat?

⁹ A Bernardo in jalkʼuy jantʼiniʼ u tsalpax. Jajáʼ in ulal: «Tam ti pelak in ókʼnom u eyendhálak Hebreos 12:7 abal ku tólmiy an epchalchik kin exbay jaleʼ tu bóliyal a Jehová. Tam u konowiy tu báʼ: ‘¿Abal jitaʼ dhuchan axéʼ xi kaw?ʼ. U exbay abal pelak abal patal ani jayej abal nanáʼ». A Bernardo in tʼajaʼ kʼeʼat jantʼoj abal kin áynanchij kin belaʼ kʼal a Jehová ani in bichówil. In jolkʼaʼ i kʼij abal kin ajiy an Biblia ani kin lupudh tsalpay kʼal jawaʼ in ajiyal. Jayej in áynanchij ti ólnom kʼal an epchalchik ani ka kʼalej ti tamkuntaláb, belits abal u wéʼ tʼeʼpindhábak jantʼoj kin tsalpay an epchalchik. Talbél an epchal wichiy kin bajuw ti ókʼnom. Max tatáʼ it boliyámej ejtíl a Bernardo, ka batsʼuw an bolixtaláb ani ka tsápnanchij ka tʼajaʼ jawaʼ it konchin, yab ka jilaʼ ti ataʼ an tidhetaláb (Prov. 8:33; 22:4).c Max ki bélkaxin, a Jehová neʼets ti lábliy kom yab it owméj kʼal Jajáʼ ani in bichówil.

TAM U KONCHINAL KI BÉLKAʼ JANTʼOJ ÍT TIN BICHÓWIL A JEHOVÁ

10. ¿Jaleʼ tin atsʼaʼ kʼibat an israelitas ka bélkaxin?

¹⁰ Tam waʼats i ít olchixtaláb tin bichówil a Jehová, walám ki atsʼaʼ kʼibat ki bélkaʼ ani walám ma ku owméj kʼal Jajáʼ. Ki tsalpay kʼal jawaʼ in atsʼaʼ an israelitas tam ti a Moisés pidhan i ít abatnaxtaláb kʼal a Jehová. Tam ti yabaye u pídhnalak axéʼ xi abatnaxtaláb, an inik axi in okʼnálak jun i yanéláb in tsʼejkálak i altares ani in binálak i tsʼakchixtaláb abal a Jehová (Gén. 8:20, 21; 12:7; 26:25; 35:1, 6, 7; Job 1:5). Pero kʼal an ít abatnaxtaláb axi pidhan a Moisés, an inikchik axi in okʼnálak in yanél yabáts neʼetsak kin tʼajaʼ ti sacerdote. A Jehová in bíjiy in tsakámil a Aarón jantʼiniʼ i sacerdote abal kin bínaʼchik i tsʼakchixtaláb. Jaxtám max jun i atikláb axi yab pelak in tsakámil a Aarón kin tʼajaʼ ti sacerdote, kwaʼalak ka tsemdháj (Lev. 17:3-6, 8, ).d ¿Walám a Coré, a Datán, a Abiram ani an 250 i inik in jékʼomnaʼ a Moisés ani a Aarón, kom yabchik in léʼak kin kʼibaʼ in uchbíl? (Núm. 16:1-3). Yab i exlál, pero jajáʼchik in jékʼomnaʼ a Jehová. ¿Jantʼoj a éjtowal ka tʼajaʼ tatáʼ max a atsʼál kʼibat ka bélkaʼ jun i ít olchixtaláb?

11. ¿Jantʼoj i exobnál kʼal an levitas axi talak kʼal in yanél a Cohat?

¹¹ Ka bélkaʼ kʼal patal a kanat jawaʼ tu konchal in bichówil a Jehová. Tam an israelitas kwaʼalak ka beláts al an desierto, an levitas kwaʼalak kin putuw kʼal jun i exbadh tʼojláb. An levitas axi pelak i cohatitas kwaʼalakchik kin kitnaʼ an arca del pacto (Núm. 3:29, 31; 10:33; Jos. 3:2-4). ¡Pelak jun i alabél tʼojláb! Pero, tam ti an israelitas ulitschik ban Tierra Prometida, yabáts in yejenchij kin yátsiy an Arca. Ani tam ti a Salomón in bajuw ti tsʼalej, talchik i cohatitas uchbiyat abal ka ajatin, talchik abal kin béletnaʼ an wiʼleb ani kʼeʼatchik abal kin béletnaʼ jawaʼ u eyendháb ban templo (1 Crón. 6:31-33; 26:1, 24). An Biblia yab in ulal max an cohatitas tsákuy kom bíjchin kʼeʼat i tʼojláb o kom yabáts neʼetsak kin tʼajaʼ i tʼojláb axi lej exbadh. ¿Jantʼoj i exobnál kʼal axéʼ? Ki tʼójon kʼal patal a kanat kʼal jawákits tam tʼojláb axi ti bíjchij in bichówil a Jehová, belits max kwaʼal ka jilaʼ jun i tʼojláb axi lej a kulbetnálak ka tʼajaʼ. Ka tʼilaʼ abal a Jehová in lej pidhál yan in jalbíl jawákits tam tʼojláb axi ka tʼajaʼ tin bichówil. Jawaʼ más exbadh abal a Jehová, játs kit bélkaxin (1 Sam. 15:22).

12. ¿Jantʼiniʼ tin atsʼaʼ a Zaira tam tin jilaʼ ti tolmix ti Betel?

¹² Ki tsuʼuw jawaʼ in watʼaʼ jun i epchal axi in bij Zaira jajáʼ u kʼwajíl al jun i bichow axi lej owél ti Oriente Medio. Jajáʼ in lej kulbetnálak ti tolmix ti Betel, tólmixin 23 i támub. Pero talbél bíjiyat ti precursora especial. Jajáʼ in ulal: «U atsʼaʼ lej kʼibat ku jilaʼ tin tolmix ti Betel. U atsʼálak abal yab jantʼoj u jalbíl ani u tsálpayalak abal walám u tʼajaʼ jantʼoj kidháb ani jaxtám yabáts in eyendháj ti Betel». Kʼal talchik i epchal u tʼájnalak kin atsʼaʼ kidháb, kom u uchnalak axéʼ: «Max a punchámalak más a kanát, neʼets ka áynanchij ti tolmix ti Betel». A Zaira in lej yajnálak jawaʼ u uchnalak, jaxtám u lej ukʼnalak tam akal. Jajáʼ in ulal: «Pero yab jaykʼiʼ u ukʼchiy abal a Jehová ani in bichówil tin lej kʼanidhál». ¿Kʼal jantʼoj ti tólmiyat abal ka tsálpaxin tekedh?

13. ¿Jantʼoj in tʼajaʼ a Zaira abal yab ka lej tsálpaxin kʼal jawaʼ in atsʼálak?

¹³ A Zaira kʼwajiy in aliyal ban publicaciones i artículos axi u kaw tin kwéntaj an kʼibataláb axi kʼwajatak in watʼal, kʼal nixéʼ tólmiyat abal yab ka atáj kʼal jawaʼ in atsʼálak. Lej tólmiyat kʼal jun i artículo axi kʼwajat al An Ólchix Uw axi ti 1 a febrero ti 2001, axi in bij «Usted puede afrontar el desánimo». Al axéʼ xi artículo u kaw tin kwéntaj a Marcos, jun i dhuchum kʼal an Biblia. Walám jajáʼ jayej in atsʼaʼ kʼibat kin jilaʼ jun i tʼojláb axi in lej kulbetnálak kin tʼajaʼ tin bichówil a Jehová. A Zaira in ulal: «In tʼiplábil a Marcos tin tólmiy abal yab ku kʼibaʼ an kanataláb». Jajáʼ yab in jilaʼ kin junkuw an epchalchik ani in jaʼúbchik, jayej in lej tsápnanchij yab kin lej tsalpay kʼal jawaʼ in atsʼálak. In exbay abal pel a Jehová axi in okʼnál in bichówil ani abal an ókʼnomchik u tʼeʼpinal kʼal jajáʼ. Jayej in tʼajaʼ ti kwéntaj abal tin bichówil a Jehová, jawaʼ más exbadh játs ka tʼajan jawaʼ a Jehová in ulúmal.

14. ¿Jantʼoj játs axi in atsʼaʼ kʼibat kin bélkaʼ an epchal Vlado, ani kʼal jantʼoj ti tólmiyat?

¹⁴ Ti Eslovenia u kʼwajíl jun i epchal axi in bij Vlado, jajáʼ in kwaʼal 73 i támub. Jajáʼ in atsʼaʼ lej kʼibat tam tin exlaʼ abal an tamkuntaláb juʼtáj jajáʼ u kʼalelak neʼetsak ka tamkuyat kʼal kʼeʼat. Jajáʼ in ulal: «Yab u exbayalak jaleʼ ti kwaʼalak ka mápuyat axéʼ xi atáj tamkuntaláb, max lej alubélak. In tsákuy kom itekʼij ti tʼojojoyámal an atáj. Nanáʼ pel in carpintero ani ma u tsʼejkaʼ talchik i eyextaláb axi u eyendhábak tanáʼ. Jayej an epchalchik axi payeblábits ejtíl nanáʼ i atsʼaʼ kʼibat». ¿Kʼal jantʼoj ti tólmiyat abal kin jalkʼuy jawaʼ in tsálpayalak? Jajáʼ in ulal: «Tam jun in belkál jawaʼ u uchnal kʼal in bichówil a Jehová, in bátsʼuwal yan i alwaʼtaláb. Axéʼ neʼets tu ku lej tólmiy ban kʼicháj axi taʼtál kom neʼetsej ka jalkʼun yan jantʼoj». ¿It jalkʼuyámej al pil i tamkuntaláb tatáʼ o it bijchinének kʼeʼat i tʼojláb tin bichówil a Jehová? Ka lej belaʼ abal a Jehová in exlál jantʼiniʼ ta atsʼál. Tatáʼ neʼets ka batsʼuw yan i lablixtaláb max kit tólmixin kʼal a kanát, belits max ka jalkʼuyat jantʼoj tin bichówil a Jehová (Sal. 18:25).

KU TSÁLPAXIN TEKEDH TIN KWÉNTAJ PATAL JAWAʼ NEʼETS KA WATʼEY

15. ¿Jantʼoj i éjtowal ki tʼajaʼ abal ku tsálpaxin tekedh tam ka waʼtsin jun i kʼibataláb tin tamkuntaláb?

¹⁵ Kʼwajatits ti utel in taltal axéʼ xi xeʼtsintaláb, jaxtám yab i jikʼpál abal ti tamkuntaláb ka watʼey talchik i kʼibataláb, jaxtám ti lej exbadh ku tsálpaxin tekedh. Max i tsalpayal abal jun i epchal tu odhnámal kʼal in káwintal o kʼal jawaʼ in tʼajaʼ, yab ki dhayaʼ i lokotaláb. Max ku boliyat yab ku tidhebéj ki batsʼuw an exobchixtaláb ani ki tsápnanchij ki jalkʼuy jawaʼ u kónchinal ki tʼajaʼ. Ani max tin bichówil a Jehová ka jalkʼun jantʼoj axi wawáʼ i atsʼál kʼibat ki bélkaʼ, ki tsápnanchij ku tólmixin kʼal patal i ichích ani ki tʼajaʼ jawaʼ u kónchinal.

16. ¿Jantʼoj a éjtowal ka tʼajaʼ abal ka áynanchij ka belaʼ kʼal a Jehová ani in bichówil?

¹⁶ Belits max a tamétnál jun i kʼibataláb, tatáʼ a éjtowal ka áynanchij ka belaʼ kʼal a Jehová ani in bichówil. Pero abal ka ejtow ka tʼajaʼ axéʼ kwaʼal ka tsápnanchij kit tsálpaxin tekedh ani axéʼ i tejwamedhál tam i tsápnanchal ku tsálpaxin ejtíl a Jehová. Ka tsápnanchij ka exóbnaʼ i tʼiplabchik axi kʼwajat ti Biblia. Waʼats yan in tʼojnálil a Jehová axi in tamétnaʼ yan i kʼibataláb, ejtíl axi i exóbnaʼits. Ka konchij a Jehová ti tólmiy ani yab jaykʼiʼ kit owméj kʼal an epchalchik. Max ka tʼajaʼ antsanáʼ, tam a Satanás yab neʼets kin ejtow ti owmedhaʼ kʼal a Jehová ani in bichówil (Sant. 4:7).