¿Jantʼoj tam lablixtaláb i bátsʼuwal kom a Jehová tu lej kʼanidhál?

1. ¿Jantʼoj i éjtowal ki tʼajaʼ abal ki kulbedhaʼ a Jehová?

KA TSALPAY abal tatáʼ a pidhaʼ jun i tsʼejwalixtaláb lej alabél jun a jaʼúb ani a tsálpayal abal neʼets kin lej eyendhaʼ. ¿Jantʼiniʼ neʼets ka atsʼaʼ max expidh kin dhayaʼ ani ma kin ukʼchiy juʼtáj tin dhayaʼ? Neʼets ka lej yajnaʼ. Pero max a jaʼúb kin eyendhaʼ an tsʼejwalixtaláb ani ti kʼákʼnanchij, tatáʼ neʼets ka atsʼaʼ lej kulbél. ¿Jantʼoj tu exóbchal axéʼ xi tʼiplab? Ki tsalpay kʼal an tsʼejwalixtaláb axi a Jehová tu pidhámal, Jajáʼ in bínaʼ in tsakámil abal tu ku kʼaniy kʼal an walabtaláb ani in atsʼál lej kulbél tam ki tejwamédhanchij abal i kʼákʼnanchal ani abal i pidhál in jalbíl an kʼanidhomtaláb axi tu tejwamédhanchij (Juan 3:16; Rom. 5:​7, 8).

2. ¿Jantʼoj neʼets ki exóbnaʼ?

² Tam ka watʼeyits yan i támub, walám ki tujchij ki ukʼchiy an tsʼejwalixtaláb axi a Jehová tu pidhámal. Pel ejtíl max i dhayál nixéʼ xi tsʼejwalixtaláb ani u ukʼchiyal. Yab i léʼ ki watʼaʼ nixéʼ, jaxtám ti lej exbadh abal chudhél chudhél ki tsalpay kʼal an tsʼejwalixtaláb axi a Jehová ani a Jesús tu pidhámal. Al axéʼ xi exobintaláb neʼets ki tsuʼuw an alwaʼtaláb axi kʼwajatits i bátsʼuwal ani axi neʼets ki batsʼuw ban kʼicháj axi taʼtál. Jayej neʼets ki tsuʼuw jantʼoj i éjtowal ki tʼajaʼ okʼxidh kin bajuw an Conmemoración abal ki tejwamédhaʼ abal i kʼakʼnál an kʼanidhomtaláb axi tu koʼonchal a Jehová.

¿JANTʼOJ TAM ALWAʼTALÁB I BÁTSʼUWAL XOWÉʼ?

3. ¿Jantʼoj tam alwaʼtaláb i bátsʼuwal xowéʼ kom a Jesús in bínaʼ in ejatal?

³ Xowéʼ ta kʼicháj kʼwajatits i bátsʼuwal i alwaʼtaláb. Jun i tʼiplab, kʼal in tsémtal a Jesús a Jehová tu pákwlanchal i wálab. A Jehová yab u nixoknáb kʼal jitaʼ abal tu ku pákwlanchij i wálab, in tʼajál kʼal in kulbétal. A David in uluw axéʼ al jun i ajatláb: «Tatáʼ it lej alwaʼ inik Jehová ani a léʼ tu ku pákwlanchij» (Sal. 86:5; 103:​3, 10-13).

4. ¿Jitaʼchik in pákwlanchal a Jehová in wálab? (Lucas 5:32; 1 Timoteo 1:15).

⁴ Waʼats i atikláb axi in atsʼál abal yab in tomnál ka pákwlanchat kʼal a Jehová. Pero max ki lej tsalpay, yab jitaʼ in tomnál ka pákwlanchat kʼal a Jehová. An abatwálej Pablo in uluw axéʼ xi kaw: «Ma yab in tomnálak kin punuwat ti abatwálej». Pero talbél in uluw axéʼ: «A Dios tin punuw ti abatwálej kom lej alwaʼ inik kʼal nanáʼ» (1 Cor. 15:​9, 10). Tam wawáʼ u tʼeʼpinal kʼal i wálab, a Jehová tu pákwlanchal. ¿Jaleʼ tin tʼajál? Yab abal in tomnál tu ku pákwlanchij, in tʼajál kom tu lej kʼanidhál. Jaxtám, max a atsʼál abal a Jehová yab in tomnál ti pákwlanchij a wálab, ka tʼilaʼ abal a Jehová in abaʼ in tsakámil abal kin kʼaniy i atiklábchik axi waláblom, axi u tʼeʼpinal kʼal in wálab. Yab in abaʼ kin kʼaniy axi yab jaykʼiʼ walbinének (ka ajiy Lucas 5:32; 1 Timoteo 1:15).

5. ¿Walám in kwaʼal in uchbíl a Jehová tu ku pákwlanchij i wálab?

⁵ Yab kwaʼal ki tsalpay abal a Jehová in tomnál tu ku pákwlanchij i wálab expidh kom i neʼdhálits yan i támub ti tʼójonchal. A Jehová in pidhál yan in jalbíl patal an tʼojláb axi i tʼajál abal ki tʼojonchij (Heb. 6:10). Pero a Jehová yab in bínaʼ in tsakámil abal tu ku jálbinchij axéʼ xi tʼojláb, in bínaʼ jantʼiniʼ jun i tsʼejwalixtaláb. Max ki tsalpay abal a Jehová kwaʼal tu ku pákwlanchij i wálab, o max ki tsalpay abal i kwaʼalits atadh axéʼ xi alwaʼtaláb, pel ejtíl max ki uluw abal yab i yéjenchalak abal a Jesús kin bínaʼ in ejatal abal tu ku kʼaniy kʼal an walabtaláb (ka jumbiy kʼal Gálatas 2:21).

6. ¿Jaleʼ ti an abatwálej Pablo in tsápnanchalak kin tʼojonchij a Jehová?

⁶ An abatwálej Pablo in exlálak abal yab jaykʼiʼ neʼetsak kin ejtow kin ataʼ tin kwetémtal an alwaʼtaláb axi pidhnének kʼal a Jehová. Tam, ¿jaleʼ tin lej tsápnanchalak kin tʼojonchij? Kom in léʼak kin tejwamédhanchij abal in lej kʼakʼnálak patal jawaʼ a Jehová in tʼajámal (Efes. 3:7). Jayetsej i tʼajál wawáʼ, i tʼójonchal a Jehová kom i léʼ ki kʼákʼnanchij patal an alwaʼtaláb axi tu pidhál. Yab i tʼajál abal ki batsʼuw jun i jalbixtaláb.

7. ¿Jantʼoj tam kʼeʼat i alwaʼtaláb i bátsʼuwal kom a Jesús in bínaʼ in ejatal? (Romanos 5:1; Santiago 2:23).

⁷ Kʼeʼat i alwaʼtaláb axi i bátsʼuwal jats abal i éjtowal ki jaʼúbnaʼ a Jehová.a Ban exobintaláb axi ti watʼey semana i tsuʼuw abal tam ku waʼtsin, yabaye i kwaʼal jun i jaʼubtaláb kʼal a Jehová, pero kom a Jesús in bínaʼ in ejatal jaxtám i éjtowal ku kʼwajiy koyat kʼal a Dios ani ku utey kʼal Jajáʼ (ka ajiy Romanos 5:1; Santiago 2:23).

8. ¿Jaleʼ i lej kʼákʼnanchal a Jehová kom tu jilchal ki ólonchij?

⁸ An jaʼubtaláb axi i kwaʼal kʼal a Jehová in tʼajál abal ki ejtow ki ólonchij ani nixéʼ pel jun i púlik alwaʼtaláb. A Jehová yab expidh in atsʼál an oláb axi u tʼajnal tam u kʼwajat yan ti eb o tam u kʼwajat ban tamkuntaláb, jayej in atsʼál an oláb axi i tʼajchal ti kwetémtal. An oláb tu tólmiyal abal ki atsʼaʼ i koyataláb ti ichích ani yab ku lej tʼeʼpin, pero an alwaʼtaláb axi más exbadh jats abal i éjtowal ku utey kʼal a Jehová (Sal. 65:2; Sant. 4:8; 1 Juan 5:14). Tam ti a Jesús kʼwajiy ban tsabál etsʼey in ólonchalak a Jehová kom in exlálak abal u atsʼnal ani abal u utel más kʼal a Jehová (Luc. 5:16). I lej kʼákʼnanchal a Jehová kom in bínaʼ in tsakámil, kom antsanáʼ i éjtowal ki jaʼúbnaʼ ani ki ólonchij.

¿JANTʼOJ TAM LABLIXTALÁB NEʼETS KI BATSʼUW AXI TAʼTÁL A KʼICHÁJ?

9. ¿Jantʼoj tam alwaʼtaláb neʼets kin batsʼuw in tʼojnálil a Jehová ban kʼicháj axi taʼtál?

⁹ ¿Jantʼoj tam lablixtaláb neʼets kin batsʼuw in tʼojnálil a Dios axi taʼtál a kʼicháj? Neʼets kin pidhaʼ an alwaʼtaláb kin ejtow ka kʼwajiy abal etsʼey. Yan i atikláb in tsálpayal abal yab neʼets ki ejtow ku kʼwajiy abal etsʼey, kom in tsuʼúmal abal patal an atikláb u tsémel. Pero ki tʼilaʼ abal in tsalápil a Jehová tam tin tsʼejkaʼ an atiklábchik pelak abal ka kʼwajiy abal etsʼey. Walám i atsʼál wéʼ tʼojláb ki belaʼ abal neʼets ku kʼwajiy abal etsʼey, pero i exlál abal neʼets ki ejtow kom a Jesús in bínaʼits in ejatal, antsanáʼ in jálbiyits an tokʼláb axi i kwaʼal (Rom. 8:32).

10. ¿Jantʼoj tam tsab i alabél aychixtaláb waʼats?

¹⁰ An ejataláb abal etsʼey neʼets ki batsʼuw ban kʼicháj axi taʼtál, pero a Jehová in léʼ abal xowéʼ ki tsálpayits jantʼiniʼ neʼets ku kʼwajiy al nixéʼ a kʼicháj. Axi in aychal ka kʼalej ti éb, in lej léʼits kin batsʼuw nixéʼ xi alwaʼtaláb ani in léʼits kin tólmiy a Jesús ti ábatnom (Apoc. 20:6). Ani axi in aychal ka kʼwajiy abal etsʼey ban tsabál, in lej léʼits ka kʼwajiy ban Paraíso ani yabáts kin tsuʼuw i yajchiktaláb (Apoc. 21:​3, 4). ¿A aychal ki kʼwajiy abal etsʼey ban tsabál? Axéʼ xi tsʼejwalixtaláb in kwaʼal yan in jalbíl, ejtíl an aychixtaláb axi in kwaʼal jitaʼchik neʼets ka kʼalej ti éb. A Jehová in tsʼejkaʼ an atiklábchik abal kin ejtow ka kʼwajiy abal etsʼey ban tsabál ani jaxtám i exlál abal neʼets ki ejtow ku kʼwajiy kulbél.

11, 12. ¿Jantʼoj tam lablixtaláb a lej léʼits ka batsʼuw ban alabél tsabál? (Ka tsuʼuw jayej an imágenes).

¹¹ Ka tsalpay jantʼiniʼ ti neʼets ku kʼwajiy ban alabél tsabál. Yabáts neʼets kit tʼeʼpin kʼal an yawʼláts nibal kʼal an tsemláj (Is. 25:8; 33:24). A Jehová neʼets ti pidhaʼ patal jawaʼ tatáʼ a léʼ. Ka tsalpay kʼal axéʼ: ¿a léʼ ka exlaʼ más tin kwéntaj an koʼnélchik? ¿A léʼ ka exóbnaʼ ta tʼénel? ¿A léʼ ka exóbnaʼ ta mukúl? Ti Paraíso neʼets ka yéjenchat i atiklábchik axi kin exlaʼ kin tsʼejkaʼ i atáj, jayej i atiklábchik axi kin exlaʼ ti om, kin tsʼejkaʼ i kʼapnél ani i atiklábchik axi kin ejtow kin tsʼejkaʼ i patʼal abal kin tʼojonchij an tsabál ani kin béletnaʼ (Is. 35:1; 65:21). Ban alabél tsabál neʼets ka koʼoy i kʼij abal ka exóbnaʼ ka tʼajaʼ patal jawaʼ a léʼ.

¹² Neʼets ki atsʼaʼ lej kulbél tam ki batsʼuw an atiklábchik axi ka edháj (Hech. 24:15). Jayej neʼets ki atsʼaʼ lej kulbél ki áynanchij ki exóbnaʼ tin kwéntaj a Jehová ani patal jawaʼ Jajáʼ in tsʼejkámal (Sal. 104:24; Is. 11:9). Ani jawaʼ más kʼijidh jats abal neʼets ka ejtow ka tʼojonchij a Jehová ani yabáts jaykʼiʼ neʼets kit ukʼpin. Yabáts neʼets kin yéjenchij ki konchij a Jehová tu ku pákwlanchij kʼal jantʼoj axi i tʼajámal. Patal axéʼ pel an lablixtaláb axi neʼets ki batsʼuw axi taʼtál a kʼicháj. Jaxtám yab i leʼ ki tʼajaʼ jantʼoj axi kin tʼajaʼ ki kʼibaʼ axéʼ xi aychixtaláb (Heb. 11:25). Jaxtám i exlál abal patal jawaʼ ki tʼajaʼ xowéʼ abal ki tʼojonchij a Jehová in kwaʼal yan in jalbíl. Wéʼits neʼets kin bajuw nixéʼ a kʼicháj ani tam ka pútunits, yabáts neʼets kin yéjenchij ku kʼwajiy tu aychix. A Jehová neʼets tu ku pidhaʼ axéʼ xi alwaʼtaláb kom tu lej kʼanidhál ani kom in bínaʼits in tsakámil.

¿JANTʼINIʼ I ÉJTOWAL KI KʼÁKʼNANCHIJ A JEHOVÁ AN KʼANIDHOMTALÁB AXI TU KOʼONCHAL?

13. ¿Jantʼiniʼ i éjtowal ki tejwamédhaʼ abal i kʼákʼnanchal a Jehová an kʼanidhomtaláb axi tu koʼonchal? (2 Corintios 6:1).

¹³ ¿Jantʼiniʼ ti éjtowal ki tejwamédhanchij a Jehová abal i kʼakʼnál kom tu kʼaniy kʼal an walabtaláb? Max ki eyendhaʼ i ejatal abal ki tʼojonchij (Mat. 6:33). Jaxtám an Biblia in ulal abal tsemets a Jesús «abal ti kalchix kʼal patal an atikláb, abal jajáʼchik yabáts kin tʼajaʼ in kwetém kulbétal, expidh kin tʼajchij in kulbétal a Cristo» (2 Cor. 5:15). A Jehová lej alwaʼ inik kʼal wawáʼ ani tu pakwlanchámal i wálab, jaxtám i léʼ ki eyendhaʼ i ejatal abal ki tʼojonchij Jajáʼ (ka ajiy 2 Corintios 6:1).

14. ¿Jantʼiniʼ i tejwamedhál abal i belkál an olchixtaláb axi a Jehová tu pidhál?

¹⁴ Jayej i tejwamedhál abal i kʼákʼnanchal a Jehová an kʼanidhomtaláb axi tu koʼonchal tam i belál kʼal Jajáʼ ani i belkál. ¿Jaykʼiʼ i tejwamedhál nixéʼ? Tam kwaʼal ki takuy max neʼets ki áynanchij tu exóbal al jun i escuela, o max neʼets ki batsʼuw jun i tʼojláb. Tanáʼ tin tomnál ki tʼajaʼ ti kwéntaj jantʼoj jats axi a Jehová in léʼ abal ki tʼajaʼ (1 Cor. 10:31; 2 Cor. 5:7). Tam i jilál abal a Jehová tu ku béldhanchij i ejatal, i bélomtal u tsapnél más, u utel más kʼal a Jehová ani jayej i bélal más kʼal an aychixtaláb axi tu pidhál a Jehová (Rom. 5:​3-5; Sant. 2:​21, 22).

15. ¿Jantʼoj i éjtowal ki tʼajaʼ okʼxidh kin bajuw an Conmemoración?

¹⁵ Kʼeʼat jantʼoj axi i éjtowal ki tʼajaʼ jats ki eyendhaʼ alwaʼ an kʼij okʼxidh kin bajuw an Conmemoración. I éjtowal ku tʼojojon abal ku kʼalej, ani jayej éjtowal ki kániy an atiklábchik abal tu ku júnaʼ nixéʼ a kʼicháj (1 Tim. 2:4). Ani tam ki kániychik ki ólchij jantʼiniʼ tu tʼajnal axéʼ xi tamkuntaláb. I éjtowal ki ólchij an videos axi kʼwajat ti jw.org ¿Jaleʼ ti tsemets a Jesús? ani Ki tʼilaʼ in tsémtal a Jesús. An ókʼnomchik neʼets kin tsápnanchij kin kaniy an epchalchik axi biyálits yab u támkunal kʼal wawáʼ, nibal u ólnom. A Jehová, an epchalchik ani an ángeles, neʼets kin atsʼaʼ lej kulbél tam kin tsuʼuw abal jun i epchal ka wichiy ti tamkuntaláb (Luc. 15:​4-7). Ban Conmemoración yab expidh ki tsapnédhaʼ an epchalchik, jayej ki tsapnédhaʼ an exóbalchik ani an epchalchik axi biyálits yab u támkunal kʼal wawáʼ. I léʼ abal patal kin atsʼaʼ abal i kʼanidhál ani i tʼajál ti kwéntaj (Rom. 12:13).

16. ¿Jaleʼ ti léʼ ku olnomáts más ban ítsʼ in kʼál an Conmemoración?

¹⁶ ¿A éjtowal kit kalej más ti ólnom ban ítsʼ in kʼál an Conmemoración? Max ka tʼajaʼ, kʼwajat a tejwamédhanchal a Jehová ani a Jesús abal a kʼakʼnál patal jawaʼ jajáʼchik in tʼajámal abal tu ku kʼaniy kʼal an walabtaláb. Jayej tam ki jolkʼaʼ más i kʼij abal ku kalej tu ólnom, neʼets ki tʼajaʼ ti kwéntaj abal a Jehová kʼwajat tu tólmiyal ani neʼets ki belaʼ más kʼal Jajáʼ (1 Cor. 3:9). Jayej ki tsápnanchij ki ajiy an ajumtaláb kʼal an Biblia ban semana in kʼál an Conmemoración, an ajumtaláb neʼets ka ejtow ka elaʼ ban folleto Ki exóbnaʼ an Biblia chudhél chudhél ani ban tabla axi kʼwajat ban Tolmixtaláb abal ti exóbal abal an tamkuntaláb. Jayej i éjtowal ki eyendhaʼ axéʼ xi ajumtaláb kʼal an Biblia abal ku exobláts ti kwetémtal.

17. ¿Jantʼoj jats axi in tʼajál abal a Jehová kin atsʼaʼ kulbél kʼal wawáʼ? (Ka tsuʼuw jayej an recuadro «¿Jantʼiniʼ i éjtowal ki tejwamédhanchij a Jehová abal i kʼákʼnanchal an kʼanidhomtaláb axi tu koʼonchal?»).

¹⁷ Yab kit tsalpaxin max tatáʼ yabáts a éjtowal ka tʼojonchij a Jehová antsanáʼ jantʼiniʼ tam ti más it kanatak. A Jehová yab in júmbiyal a tʼojlábil kʼal in tʼojlábil axi más. A Jehová in exlál jawaʼ tatáʼ a atsʼál ta ichích ani Jajáʼ in atsʼál lej kulbél kom in exlál abal tatáʼ a kʼakʼnál jawaʼ in tʼajámal abal ti kʼaniy (1 Sam. 16:7; Mar. 12:​41-44).

18. ¿Jaleʼ ti lej kʼákʼnanchal a Jehová ani a Jesús jawaʼ in tʼajámalchik?

¹⁸ A Jehová tu pakwlanchámal i wálab, i éjtowal ki jaʼúbnaʼ ani i kwaʼal jun i aychixtaláb. Ani patal nixéʼ i éjtowal ki batsʼuw kom a Jesús in bínaʼ in ejatal, jaxtám etsʼey ki tsápnanchij ki tejwamédhaʼ abal i kʼakʼnál an kʼanidhomtaláb axi a Jehová tu koʼonchal (1 Juan 4:19). Ani jayej ki tejwamédhaʼ abal i lej kʼanidhál a Jesús, kom in bínaʼ in ejatal abal tu ku kʼaniy (Juan 15:13).