A Jehová u lej pakwlanchix: ¿Jantʼiniʼ i éjtowal ki nitsʼbiy?

1, 2. a) ¿Jaykʼiʼ walám neʼets ki atsʼaʼ kʼibat ki pákwlanchij axi más? b) ¿Jantʼiniʼ tin tejwamédhaʼ a Denise abal in pákwlanchij an inik kʼal axi ti tsʼojbedháj in yanél?

¿A ATSʼÁMAL kʼibat ka pákwlanchij jitaʼ axi ti odhnámal? Walám játs kom a lej yajnaʼ jawaʼ it uchan o jawaʼ it tʼajchin. Pero max ka tsápnanchij neʼets ka ejtow ka pákwlanchij. Ki tsuʼuw jawaʼ in watʼaʼ an epchal Denise,a jajáʼ in ejtow kin pakwlanchij an inik kʼal axi ti odhnanchat in yanél. Ti 2017, a Denise ani in yanél kʼalej in tsaʼbiyal an central mundial in kʼál an ólchixchik kʼal a Jehová. Tam tu áynalakits, támuwat kʼal kʼeʼat i carro ani tsʼojbedháj jajáʼ ani in yanél. A Denise tsʼebtsʼin ani yabáts in exlaʼ jawaʼ watʼey, pero tam ti ejtsin ólchin abal in tsakámil kʼwajatak lej kʼalchidh ani abal in tomkíl tsemets. Jawaʼ in watʼaʼ a Denise lej kʼibat, jajáʼ tu ólchal jantʼiniʼ tin atsʼálak: «U atsʼálak lej yajchik u ichích ani yab u exlálak jantʼoj ku tʼajaʼ». Talbél in exlaʼ abal an inik kʼal axi ti tsʼojbedháj yab talak utsʼál ani yab tʼajchíl jawaʼ in tʼajaʼ. Jaxtám a Denise in lej konchij i tolmixtaláb a Jehová abal kin atsʼaʼ i koyataláb tin ichích ani yab kin dhayaʼ i tsakultaláb abal kʼal nixéʼ xi inik.

² An inik yakʼwan ani neʼdháj ti wikʼaxteʼ ma ka exláj max jajáʼ játs axi jolbin o imbáj. A Denise uchan kʼal an policía abal kwaʼalak kin olnaʼ jawaʼ watʼey abal kin exlaʼchik jantʼoj kin tʼajaʼ kʼal an inik. A Denise in ulal: «Lej yajchik u atsʼálak ku tʼilaʼ jawaʼ watʼey, pel ejtíl max in jólchinal i atʼem juʼtáj tin tsʼojbének». Talchik i semanas talbél a Denise koʼoy kin tsuʼuw an inik tin tamét an juez. ¿Jantʼoj in uluw a Denise? In konchij an juez abal kin yajnanchij an inik ani yab kin lej jolbiy.b Tam ti a Denise taley ti kaw, an juez in tujchij ti ukʼnal ani in uluw: «U neʼdhálits 25 i támub u tʼajál axéʼ xi tʼojláb ani yab jaykʼiʼ u tsuʼúmal abal jun i atikláb kin pákwlanchij in wálab jun i jolbinél. Yab jaykʼiʼ u tsuʼúmalak abal jun i jolbinél ka tawnáj kʼal i kʼanidhomtaláb ani ka pákwlanchat in wálab».

3. ¿Kʼal jantʼoj ti tólmiyat a Denise abal kin ejtow kin pakwlanchij an inik kʼal axi ti tsʼojbedháj?

³ ¿Kʼal jantʼoj ti tólmiyat a Denise abal kin ejtow kin pakwlaʼ? Lej tólmiyat kin tsalpay abal a Jehová u lej pakwlanchix (Miq. 7:18). I lej kʼakʼnál kom a Jehová tu pakwlanchámal ani nixéʼ in tʼajál abal ki léʼnaʼ ki pákwlanchij jayej axi más.

4. ¿Jantʼoj in léʼ a Jehová abal ki tʼajaʼ? (Efesios 4:32).

⁴ A Jehová lej alwaʼ inik ani tu pákwlanchal jawaʼ i tʼajál ani in léʼ abal wawáʼ ki nitsʼbiy (ka ajiy Efesios 4:32). A Jehová in léʼ abal ki pákwlanchij jitaʼchik tu odhnál (Sal. 86:5; Luc. 17:4). Al axéʼ xi exobintaláb neʼets ki tsuʼuw ox i tsalap axi neʼets tu ku tólmiy abal ki pákwlanchij axi más.

KA TʼAJAʼ TI KWÉNTAJ JAWAʼ A ATSʼÁL TA ICHÍCH

5. ¿Jantʼiniʼ walám neʼets ki atsʼaʼ max jun i atikláb tu ku odhnaʼ? (Proverbios 12:18).

⁵ Walám jun i atikláb tu ku uchaʼ jantʼoj o tu ku tʼajchij jantʼoj axi tu ku yajbédhanchij i ichích ani neʼets ki atsʼaʼ más yajchik max pel jun i jaʼúb o jun i yanél (Sal. 55:​12-14). Junchikíl neʼets ki atsʼaʼ lej yajchik ejtíl max i chiʼdhál xapat jun i kutsíl ti tʼuʼúl (ka ajiy Proverbios 12:18). Max ki dhayaʼ i tsakultaláb ti ichích pel ejtíl max i chiʼdhál xapat an kutsíl ani yab i tʼajál jantʼoj abal ki kaldhaʼ. Yab neʼets ki ejtow ki tixkʼaʼ nixéʼ xi yajal max ki tʼajaʼ ejtíl max yab watʼenek ni jantʼoj.

6. ¿Jantʼoj játs axi i tʼajál tam jun i atikláb tu ku odhnaʼ?

⁶ Tam jitaʼ tu ku odhnaʼ walám ku tsákuy. An Biblia in ulal abal játs jawaʼ awil ka watʼey, pero jayej tu ólchal abal yab in tomnál ki jilaʼ ka owey nixéʼ xi tsakultaláb ti ejatal (Sal. 4:4; Efes. 4:26). ¿Jaleʼ? Kom tam jun kin dhayaʼ i tsakultaláb, in éjtowal kin tʼajaʼ jantʼoj axi yab alwaʼ ani walám ma kin tʼajaʼ abal ku jolbin (Sant. 1:20). Tam ku tʼajchat jantʼoj walám ku tsákuy, pero wawáʼ jats axi neʼets ki takuy max ki áynanchij u tsakúl kʼal nixéʼ xi atikláb.

7. ¿Jantʼoj más i atsʼál tam jun i atikláb tu ku odhnaʼ kʼal jawaʼ kin tʼajaʼ?

⁷ Tam jun i atikláb tu ku odhnaʼ walám ki atsʼaʼ kʼeʼat i yajal. Ki tsuʼuw jawaʼ in watʼaʼ a Ann: «Tam tin tsipílej, u papá ani u mamá jilaxin ani u papá tomkin kʼal an mimláb axi tin beletnálak. Nixéʼ in tʼajaʼ abal ku atsʼaʼ lej kwetém. Tam ti u papá in koʼoy i tsakam kʼal nixéʼ xi mimláb, u atsʼaʼ ejtíl max in jalkʼuyat ani u atsʼálak abal yab jitaʼ tin kʼanidhálak». A Georgette jayej tu ólchal jantʼiniʼ tin atsʼaʼ tam tin exlaʼ abal u kʼambiyabak kʼal in tomkíl: «U atsʼaʼ lej yajchik u ichích, kom ma tu tsakamtal u lej jaʼubnálak ani ti tsablom i tʼojonchalak a Jehová jantʼiniʼ u precursores». A Naomi in ulal: «Yab u aychalak abal u tomkíl ti kin yajbédhanchij u ichích. Tam ti jajáʼ tin uchaʼ abal kʼwajatak in metʼál i pornografía u atsʼaʼ abal yabáts tin kʼanidhál ani abal kʼwajatak tin kʼámbiyal».

8. a) ¿Jaleʼ ti lej exbadh ki pakwlanchij jitaʼ axi tu odhnámal? b) ¿Jantʼoj tam alwaʼtaláb neʼets ki batsʼuw max ki tʼajaʼ? (Ka tsuʼuw an recuadro «¿Jantʼoj ku tʼajaʼ max jun i atikláb tin lej odhnaʼ kʼal jawaʼ in tʼajaʼ?»).

⁸ Wawáʼ yab i éjtowal ki uchaʼ an atikláb jantʼoj kin uluw o jantʼoj kin tsalpay, pero jawaʼ i éjtowal ki tʼajaʼ jats ki tsalpay jantʼiniʼ ti neʼets ku tokʼtsin. Jawaʼ más in tomnál ki tʼajaʼ játs ki pakwlaʼ, kom a Jehová tu lej kʼanidhál ani Jajáʼ in léʼ abal ki nitsʼbiy. Pero max ki áynanchij u tsakúl walám ki tʼajaʼ jantʼoj axi yab in tomnál ani walám ma ku yawʼláts (Prov. 14:​17, 29, 30). A Christine in ulal axéʼ: «Tam u kwaʼal axéʼ xi yajal, yabáts in kʼapul alwaʼ, yab u atsʼál in kulbél ani yabáts in wáyal alwaʼ. Jayej dhúbatkʼij in tsakúl ani nixéʼ in tʼajál abal yabáts kin neʼdhaxin alwaʼ kʼal u tomkíl ani kʼal axi más».

9. ¿Jaleʼ ti kwaʼal ki tixkʼaʼ an tsakultaláb ti ichích?

⁹ ¿Jantʼoj neʼets ki tʼajaʼ max an atikláb axi tu odhnámal yab tu konchámal ki pakwlanchij? Belits antsanáʼ i éjtowal ki tʼajaʼ jantʼoj abal yabáts tu ku odhnaʼ jawaʼ tu tʼajchij. Ban párrafo 7 u kawin tin kwéntaj a Georgette, jajáʼ in ulal: «In lej tsakúlak kʼal an inik axi pelak u tomkíl ani in owey yan i kʼij abal ka tixkʼan jawaʼ u atsʼálak. Pero tam tu tʼajaʼ nixéʼ u atsʼaʼ yan i koyataláb tu ichích». Tam i kaldhál an yajal axi i chiʼdhál ti ichích, nixéʼ in tʼajál abal yabáts ki atsʼaʼ lej tsakúl. Jayej tu tólmiyal abal ki atsʼaʼ más kulbél ani ki áynanchij abal okʼox (Prov. 11:17). Pero, ¿jantʼoj neʼets ka tʼajaʼ max yabaye a ejtowamal ka pákwlanchij jitaʼ axi ti odhnámal? Ki tsuʼuw an tsabchíl tsalap axi a éjtowal ka tʼajaʼ.

¿JANTʼOJ NEʼETS TI TÓLMIY ABAL YABÁTS KA ATSʼAʼ LEJ TSAKUL?

10. ¿Jaleʼ ti yéjenchal i kʼij abal ki ejtow ki pakwlaʼ jawaʼ u tʼajchinének? (Ka tsuʼuw jayej an imágenes).

¹⁰ ¿Jantʼoj neʼets ti tólmiy abal kʼayúm ka ukʼchiy an tsakultaláb axi a atsʼál? Ka jilaʼ ka watʼey i kʼij. Ka tsalpay kʼal jun i atikláb axi tsʼojbének, jajáʼ in yéjenchal i kʼij abal ka lejkin. Jayetsej u watʼel kʼal jun i atikláb, neʼets kin yejenchij ka watʼey i kʼij abal yabáts kin lej tʼilaʼ jawaʼ tʼajchin ani kin ejtow kin pákwlanchij an atikláb kʼal axi ti odhnáj (Ecl. 3:3; 1 Ped. 1:22).

11. ¿Jantʼiniʼ tu tólmiyal an oláb abal ki pakwlanchij jitaʼ tu odhnámal?

¹¹ An tsabchíl tsalap axi a éjtowal ka tʼajaʼ jats ka konchij a Jehová ti tólmiy ka pakwlaʼ.c Ban párrafo 7 u kawin tin kwéntaj a Ann, jajáʼ in ulal abal lej tólmiyat kʼal an oláb: «Okʼox u tʼajchij i oláb a Jehová ani u konchij tu ku pákwlanchij jawaʼ yab i tʼajámal tekedh. Jayej u dhuchaʼ jun i carta abal u papá ani in kʼimádhil ani u uchaʼ abal u pákwlanchal jawaʼ in tʼajámal». A Ann in ulal abal kʼibat in atsʼaʼ kin tʼajaʼ axéʼ, pero jayej tu ólchal jaleʼ tin tʼajaʼ: «U aychal abal jun a kʼicháj u papá ani in kʼimádhil kin léʼnaʼ kin exlaʼ tin kwéntaj a Jehová».

12. ¿Jaleʼ ti kwaʼal ki lej belaʼ kʼal a Jehová ani yab expidh ki tsalpay kʼal jawaʼ i atsʼál? (Proverbios 3:​5, 6).

¹² Oxchíl tsalap, ka lej belaʼ kʼal a Jehová ani yab expidh ka tsalpay kʼal jawaʼ tatáʼ a atsʼál (ka ajiy Proverbios 3:​5, 6). Expidh a Jehová in exlál jawaʼ játs axi más alwaʼ abal wawáʼ (Is. 55:​8, 9). Jajáʼ yab jaykʼiʼ neʼets tu ku konchij ki tʼajaʼ jantʼoj axi tu ku odhnaʼ. Jaxtám, max Jajáʼ tu konchal ki pakwlaʼ jats kom in exlál abal jats jawaʼ más alwaʼ (Sal. 40:4; Is. 48:​17, 18). Max expidh ki tsalpay kʼal jawaʼ i atsʼál, neʼets ki atsʼaʼ kʼibat ki pakwlaʼ (Prov. 14:12; Jer. 17:9). Ban párrafo 7 u kawin tin kwéntaj a Naomi, jajáʼ in ulal: «Ti kʼaʼál u tsalpay abal yab in tomnálak ku pákwlanchij u tomkíl kom jajáʼ in tsuʼtalak i pornografía. U tsʼejnálak abal u tomkíl junílekʼij ti kin yajbédhanchij u ichích ani kin ukʼchiy patal jawaʼ tin tʼajchámal. U tsálpayalak abal kʼwajatak u tʼajál jawaʼ tekedh ani abal a Jehová in exbayalak jawaʼ u atsʼálak. Pero talbél u tʼajaʼ ti kwéntaj abal belits abal a Jehová in éxbayal jawaʼ u atsʼál yab in léʼ kin uluw abal kʼwajat u tʼajál jawaʼ tekedh. A Jehová in exlál jawaʼ u atsʼál, jayej in exlál abal u yéjenchalak i kʼij abal ku ejtow ku pakwlanchij u tomkíl ani a Jehová in aychal abal játs ku tʼajaʼ».d

KA TSALPAY KʼAL JAWAʼ IN TʼAJÁL ALWAʼ AN ATIKLÁB AXI TI ODHNÁMAL

13. ¿Jantʼoj in ulal Romanos 12:​18-21 abal in tomnál ki tʼajaʼ?

¹³ Abal ki pakwlanchij jun i atikláb axi tu lej odhnámal yab expidh in yéjenchal yabáts ki tʼilaʼ jawaʼ tu tʼajchij. Max pel jun i epchal axi tu odhnámal, jawaʼ in tomnál ki tʼajaʼ jats ki tsʼejkaʼ an kʼibataláb axi watʼenek (Mat. 5:​23, 24). I léʼ ki tʼajaʼ tu alwaʼ inik kʼal jajáʼ ani yabáts ki dhayaʼ i tsakultaláb ani i léʼ ki pakwlanchij (ka ajiy Romanos 12:​18-21; 1 Ped. 3:9). ¿Jantʼoj neʼets tu ku tólmiy ki tʼajaʼ nixéʼ?

14. ¿Jantʼoj in tomnál ki tsápnanchij ki tʼajaʼ ani jaleʼ?

¹⁴ Kwaʼal ki tsápnanchij ki tsuʼuw an atikláb jantʼiniʼ a Jehová in tsuʼtal. Jawaʼ más in tʼajál ti kwéntaj a Jehová, játs jantʼiniʼ in ey jun i atikláb (2 Crón. 16:9; Sal. 130:3). Max expidh i metʼanchal jawaʼ yab in tʼajál alwaʼ jun i atikláb, neʼets ki tsuʼuw yan jantʼoj, pero max ki tʼajchij ti kwéntaj in alwaʼ tʼajbilábil jayej neʼets ki elchij yan jantʼoj alwaʼ. Nixéʼ neʼets tu ku tólmiy abal yab ki atsʼaʼ kʼibat ki pakwlanchij. Jun i epchal axi in bij Jarrod in ulal: «Max ku tsuʼchij jawaʼ in tʼajál alwaʼ jun i epchal, yab u atsʼál lej kʼibat ku pákwlanchij».

15. ¿Jaleʼ ti lej exbadh ki uchaʼ an atikláb axi tu odhnámal abal i pákwlanchal?

¹⁵ Kʼeʼat jantʼoj axi a éjtowal ka tʼajaʼ jats ka uchaʼ an atikláb axi ti odhnámal abal a pákwlanchal. ¿Jaleʼ ti lej exbadh ki tʼajaʼ nixéʼ? A Naomi in ulal: «Jun i kʼicháj u tomkíl tin konoy, ‹¿tin pakwlanchíts jawaʼ u tʼajaʼ?›. Tam ti neʼetsak ku tókʼtsiy yab u ejtow ku tʼajaʼ ani u tʼajaʼ ti kwéntaj abal yabaye u pakwlanchámal. Tam ti watʼey an kʼij tikʼelej u ejtow ku uchaʼ abal u pakwlanchíts. Yab u tsalpay abal nixéʼ xi kaw neʼetsak tu ku tólmiy ti tsablóm. Tam ti u tomkíl in exlaʼ abal u pakwlanchíts ma ukʼin ani nanáʼ u atsʼaʼ lej koyat u ichích. Jayej nixéʼ in tʼajámal abal ku ejtow ku belaʼ más kʼal jajáʼ ani ku jaʼúbnaʼ más, antsanáʼ jantʼiniʼ ti biyál».

16. ¿Jantʼoj i exobnámal tin kwéntaj an pakwlanchixtaláb?

¹⁶ A Jehová in aychal abal wawáʼ ki pakwlanchij axi más jawaʼ tu tʼajchámal (Col. 3:13). Junchikíl neʼets ki atsʼaʼ kʼibat ki tʼajaʼ. Pero an ox i tsalap axi i tsuʼúmal al axéʼ xi exobintaláb, neʼets ti tólmiy ka tʼajaʼ ti kwéntaj jawaʼ a atsʼál ta ichích. Jayej neʼets ti tólmiy abal yabáts ka lej tʼilaʼ jawaʼ it tʼajchinének ani ka tsalpay kʼal jawaʼ in tʼajál alwaʼ an atikláb axi ti odhnámal (ka tsuʼuw an recuadro «Ox i tsalap axi neʼets ti tólmiy ka pákwlanchij axi más»).

¿JANTʼOJ TAM ALWAʼTALÁB I BÁTSʼUWAL TAM I PÁKWLANCHAL AXI MÁS?

17. ¿Jawaʼ tam alwaʼtaláb i bátsʼuwal tam i pákwlanchal axi más?

¹⁷ I bátsʼuwal yan i alwaʼtaláb max ki pákwlanchij axi más. Tejéʼ waʼats ox i tsalap. Kʼaʼál, i nitsʼbiyal a Jehová ani Jajáʼ in alwatnál nixéʼ (Luc. 6:36). Tsabchíl, i tejwamedhál abal i lej kʼakʼnál kom a Jehová tu pákwlanchal (Mat. 6:12). Oxchíl, yab neʼets ki odhnaʼ i ejatal ani neʼets ki jaʼúbnaʼ an epchalchik.

18, 19. ¿Jantʼoj u watʼel tam i pákwlanchal axi más?

¹⁸ Tam i pákwlanchal axi más i bátsʼuwal yan i alwaʼtaláb. Ban párrafo 1 i tʼilaʼ jawaʼ in watʼaʼ a Denise. A Denise yab in exlálak abal an inik kʼal axi ti tsʼojbedháj neʼetsak kin tixkʼaʼ in ejatal tam ti jólbiyat kʼal an eyal. An inik in lej jikʼpaʼ tam tin exlaʼ abal pakwlanchat kʼal a Denise ani in tujchij kin exóbnaʼ an Biblia.

¹⁹ Walám patal i atsʼámal kʼibat ki pákwlanchij jitaʼ tam tu odhnámal, pero neʼets ki bátsʼuw yan i alwaʼtaláb max ki pákwlanchij (Mat. 5:7). Jaxtám ki tsápnanchij ki pákwlanchij axi más kom antsanáʼ i nitsʼbiyal a Jehová.