JANTʼINIʼ U EYENDHÁB AN DONACIONES
I binál i tolmixtaláb «juʼtáj ti waʼats i pextaláb»
27 A MAYO TI 2022
Yab i jikʼpál «ka waʼtsin i pextaláb ani ka olnáj abal u dhaykʼanal i pextaláb» (Mateo 24:6). Yan i epchalchik in yajchiknál tam waʼats jun i pextaláb, pero etsʼey in bátsʼuwal jawaʼ in yéjenchal. Tu lej kanatbédhaʼ tam ti otsʼowiy an olchixtaláb kʼal an Kwenél i Ókʼnom péjach 3 axi ban támub 2022, abal ti Europa del Este kʼwajat ti tolmiyáb an epchalchik axi odhnámej kʼal an pextaláb axi waʼats ti Ucrania. ¿Jantʼoj kʼwajat ti tʼajnál abal ka tólmiyatchik bélits abal kʼwajat an pextaláb? ¿Jantʼoj in atsʼál an epchalchik tam in bátsʼuwal axéʼ xi tolmixtaláb?
¿Jantʼoj in yéjenchalchik? ¿Jantʼiniʼ tu nenchinál?
Ti 24 a febrero ti 2022, an kʼicháj tam ti tújey an pextaláb, an Comité de Coordinadores in tʼojojoy i tumín abal kin tólmiy an epchalchik. An sucursal ti Ucrania, dhubatkʼij in tujuw kin tsʼaʼiy jawaʼ neʼetsak kin yéjenchij an epchalchik ani an 27 Comités de Socorro axi waʼatsak, in búkʼuw axéʼ xi tolmixtaláb.
Jayej, an epchalchik axi ban central mundial dhubatkʼij in tʼajaʼ ti kwéntaj jantʼiniʼ kin tólmiy an sucursal axi ti Ucrania. An Comité de Coordinadores ani an Comité de Publicaciones axi kʼal an Kwenél i Ókʼnom, in konchij an Departamento Mundial de Compras in konchij ka tólmixin junax kʼal an sucursal axi ti Ucrania ani Polonia ani antsanáʼ ka tʼójonchik junkudh. Chudhél an epchalchik axi u tʼojnal ban departamento de Compras, Asuntos Legales, ani Envíos axi kʼwajat al axéʼ xi sucursales, junax kʼal jun i epchal axi u tólmix ban Comité de Sucursal axi ti Ucrania ani talchik i epchal axi ban Departamento Mundial de Compras, u támkunalakchik abal kin tsuʼuw jantʼiniʼ ti kin tʼajaʼ axéʼ xi tʼojlab.
An cajas in chiʼdhál i kʼapnél, i jabón, i papel de baño ani i dibujo axi u kanatbédhax.
A Jay Swinney, axi u tʼojnal ban Departamento de compras in uluw: «Okʼox, kwaʼalak ki tʼajaʼ ti kwéntaj jantʼoj in yéjenchalak an epchal ani jawaʼ i ujnámits ki ábchij ejtíl, i kʼapnél i jabón ani kʼeʼat jantʼoj. Pero yab expidh axéʼ, jayej i yéjenchalak ki exlaʼ jantʼoj ki tʼajaʼ abal ka ulits dhubat jawaʼ in yéjenchalak ti Ucrania».
Ti 9 a marzo ti 2022, i exlálakits jantʼoj in yéjenchalakchik, jaxtám i tʼojojoy i cajas, axi in kwaʼalak i tʼuʼlek, i atún, i arroz, i tsanakʼw, i jabón ani i papel de baño. I tsálpay abal max ki pidhaʼ al tseʼ i semana jawaʼ in yéjenchal jun i atikláb, neʼets ki pákuw 65 dólares. Kom yan i epchal neʼetsak kin yéjenchij axéʼ xi tolmixtaláb, an Comité de Coordinadores in pákuw yan i tumín abal kin abaʼ. Pero, ¿jantʼiniʼ ti neʼetsak kin neʼdhaʼ patal axéʼ an epchalchik ani yab kin koʼoy i kʼibataláb?
Ti 13 a Marzo, tsab i epchal axi ban Sucursal ti Polonia, in neʼdhaʼ an tolmixtaláb ma al jun i almacén axi ti Ucrania, utat ban bichow Leópolis (Lviv). Pero an epchalchik axi ban Sucursal ti Polonia ani Ucrania, tʼojojonchik ókʼxidh abal kin éjtow kin abaʼ axéʼ xi tolmixtaláb. In tsʼejkaʼchik an úw abal kin ejtowchik ka otsits ban bichow, jayej in tʼojojoychik an carros abal ka tejwaméj abal chubax neʼetsak kin ákiy i tolmixtaláb. An epchalchik axi ti Ucrania tólmixin abal kin tákuy an bel axi ka ulits mas dhubat ban almacén. An tolmixtaláb ulits ti Leópolis, yab watʼey nibal jun a kʼicháj abal an epchalchik axi ban Comités de Socorro kin batsʼuw axéʼ xi tolmixtaláb abal kin búkʼuw ani an epchalchik axi ti Polonia wichiychik kʼal i alwataláb. Patal axéʼ kalej lej alwaʼ, kom tʼojojonchik ani tólmiyat kʼal a Jehová.
Pero an epchalchik, expidh in éjtow kin búkʼuw utat jun i tonelada i kʼapnél. Pero in kʼibalakej ka búkʼuwat 200 toneladas. ¿Jantʼoj neʼetsak kin tʼajaʼ an epchalchik abal kin ejtow kin neʼdhaʼ ani kin bukʼuw dhubat?
«Jitaʼchik ti kʼanidhál neʼets kin léʼnaʼ ka tólmixin kʼal in kulbétal»
Tam ti an atiklábchik in ajiy ti jw.org abal kʼwajat ti tolmiyáb jitaʼchik odhnámej kʼal an pextaláb, in léʼnaʼchik jayej ti tólmix. Jitaʼchik yab u kʼwajíl utat ti Ucrania tólmixin kʼal i tumín kom in exlálchik abal neʼets ka eyendháj alwaʼ. Ani jitaʼchik u kʼwajíl utat, tólmixin kʼal jawaʼ in kwaʼal ani in jólkʼaʼchik i kʼij abal ka kʼalej ti tólmix. Axéʼ pel talchik i tʼiplab.
Ti Polonia «an epchalchik» tólmixin abal kin tʼojojoy i cajas kʼal i kʼapnél ani an tsakamchik in tsʼejkaʼchik i dibujo axi kanatbédhax. Bartosz Kościelniak axi u tólmix ban Departamento de Compras axi ban sucursal ti Polonia, in ulal: «Etsʼey u ajiyámalak jawaʼ in ulal an Salmo 110:3, abal in bichówil a Jehová neʼets ka tólmixin kʼal i kulbetaláb, pero xoʼ, u tsuʼuw ka putun axéʼ, tam ti yan i atiklábchik chích abal kin tsuʼuw, jantʼiniʼ tin éjtowalak tu ku tólmiy».
Jun i epchal axi in kwaʼal jun i empresa tin puwél an tsabál, in matiy an camiones abal ka neʼdháj an tolmixtaláb ani in jálbiy an gasolina. Jajáʼ in ulal: «Axéʼ tin tólmiyal abal ku tejwamédhanchij a Jehová ani an epchalchik abal u kʼanidhál. U atsʼál lej kulbél kom u éjtow kin tólmixin». Abal ka neʼdháj an tolmixtaláb eyendháj 7,700 litros i gasolina ani an epchalchik koʼoy ka beldhomáts utat 48,000 kilómetros.
Kom yan i epchalchik tólmixin kʼal patal in kanat, ti 28 a marzo neʼdhamejits 100 toneladas i kʼapnél, i jabón, i ilál ani kʼeʼat jantʼoj ti Ucrania. Kom talchik i epchal ani i nújul in bínaʼ i kʼapnél, yabáts pákuwat yan i tumín abal ka tʼojojoyat ban cajas. Ma xowéʼ in bichówil a Jehová in neʼdhámal watʼadh 190 toneladas i kʼapnél abal ti Ucrania. ¿Jantʼoj in atsʼaʼ an epchalchik axi in batsʼuw axéʼ xi tolmixtaláb?
«In atsʼálakchik abal u lej kʼanidháb»
Tam ti an tolmixtaláb ulits ti Leópolis an epchalchik axi ban Comité de Socorro axi ti Ucrania, in bukʼchij an cajas jitaʼchik chubax in yéjenchalak an tolmixtaláb. Axéʼ xi tolmixtaláb neʼdháj al i bichowchik axi kʼwajat in owél 1,300 kilómetros ti Leópolis. Bélits abal an epchalchik tʼojojon lej alwaʼ in yéjenchij yan i kʼij abal kin bukʼuw patal an kʼapnél.a
A Markus Reinhardt, axi u tólmix ban Comité de Sucursal axi ti Ucrania, in ulal: «Kʼal patal jawaʼ kʼwajat ti watʼel, an epchalchik in tʼajámal ti kwéntaj abal u lej kʼanidháb kʼal a Jehová ani abal lej exbadh kin bélkaʼ jawaʼ u konchinál kʼal in bichówil, ókʼxidh ka watʼey jun i yajchiktaláb. Ejtíl u uxnének abal kwaʼal ki dhayaʼ i jáʼ ani i kʼapnél ti kʼimaʼ abal talchik i semanas». An epchal axi in bij Anton axi u kʼwajíl ti Kyiv in ulal: «I lej kʼakʼnál kom in bichówil a Jehová tu tʼojojyámal ókʼxidh abal ki éjtow ki tamétnaʼ, jun i kʼibataláb ejtíl axéʼ. Ki koʼoy i jáʼ ani jun i radio tu tolmiyámal abal ki kʼániy i éjatal. Alwaʼ kom an epchalchik in bélkaʼ jawaʼ olchinének, axéʼ in tʼajaʼ abal an sucursal kin éjtow ka tʼojojon abal kin éjtow kin pidhaʼchik jawaʼ in yejenchal».
¿Jantʼoj in atsʼaʼ an epchalchik tam tin batsʼuw an tolmixtaláb? A Mykola ani a Zinaida, axi u kʼwajíl ti Kharkiv, in uluw: «U lej kulbél kom i tsuʼtal abal an epchalchik tu lej kʼanidhál. Kʼakʼnámal yan kʼal an kʼapnél ani an ilál, kom chubax i tsuʼtal abal pel a Jehová axi tu tólmiyal». A Valentina, axi jayej u kʼwajíl al axéʼ xi bichow in ulal: «Tam ti tújey an pextaláb kwaʼalak ki tʼajaʼ jun i fila lej nakat abal ki tsʼaʼiy an kʼapnél. Ani junchikíl yab i elálak jawaʼ i yéjenchal, pero etsʼey i tsuʼuw jantʼiniʼ a Jehová tu tólmiyalak. Jaxtám, Jajáʼ in tʼajaʼ abal an epchalchik tu ku chanchij i cajas kʼal i kʼapnél, in kwaʼalak jawaʼ i yéjenchal. Tam i atsʼál abal an kʼibataláb kʼwajatits tu atal, a Jehová ani in bichówil etsʼey tu tólmiyal. . . . Tu pidhál i koyataláb tam an tolmixtaláb u ulel, tam chubax a yéjenchal».
Yevhen ani Iryna,jajáʼchik koʼoy kin jilaʼ in bichówil Mariupol, in ulal: «I kʼakʼnál patal an kʼanidhomtaláb ani an tolmixtaláb axi tu pidhámalchik, kom i batsʼuw tam más i yéjenchalak. Tam ti ulits an cajas kʼal an kʼapnél i tʼajaʼ ti kwéntaj patal an kʼanidhomtaláb axi tu koʼonchal».
I éjtow ki tsuʼuw, abal a Jehová tu tólmiy kʼal in tʼokat tsap abal ki éjtow ki nenchij an epchalchik an tolmixtaláb, «bélits abal kʼwájatak an pextaláb». Ani jayej an tumín axi a binálchik tu lej tolmiyámal. Yan kʼal axéʼ xi donaciones u bináb ti donate.jw.org. I lej kʼakʼnál an tolmixtaláb axi a binálchik.
I tsápnanchal ki bínaʼ dhubat an tolmixtaláb ani ki tʼajaʼ jantʼiniʼ tin tomnál
24 a febrero ti 2022: An Comité de Coordinadores in tʼojojoy i tumín abal kin tólmiy an epchalchik axi ti Ucrania.
24 a febrero ma ti 8 a marzo ti 2022: An Sucursal axi ti Ucrania in tsʼaʼiyal i kʼapnél ani in pidhál epchalchik axi ban Comité de Socorro abal kin bukʼuwchik. An Sucursal jayej u tʼojojnal abal kin batsʼuw an tolmixtaláb axi u ábchinal kʼal an epchalchik axi Polonia.
9 a marzo ti 2022: An Comité de Coordinadores in jilál abal ka aban i tolmixtaláb Ucrania.
10 ma ti 12 a marzo ti 2022: Epchalchik axi ti Polonia in tʼojojyal i kʼapnél abal kin éxaʼ kin neʼdhaʼ ti Leópolis Ucrania
13 a marzo ti 2022: An epchalchik axi ti Polonia in neʼdhálits an kʼapnél abal ti Leópolis Ucrania.
14 ma ti 16 a marzo ti 2022: An epchalchik ti Polonia, axi u tólmix ban Departamento Local de Diseño y Construcción tamkunchik al jun i atáj, juʼtáj tu tʼajnál i púlik tamkuntaláb axi kʼwajat utat ban bichow ti Poznan ani in tʼojojoychik i cajas kʼal i kʼapnél, i jabón, arroz ani kʼeʼat jantʼoj.
17 a marzo ti 2022: tseʼ a kʼicháj talbél tújey ka neʼdháj 13 toneladas i kʼapnél ban frontera ti Ucrania
21 ma ti 27 a marzo ti 2022: An epchalchik axi ti polonia in tʼojojyalchik más i cajas abal ka aban ti Ucrania utat jun a kʼicháj bukʼuwamejits an tolmixtaláb juʼtáj ti yejencháb
28 a marzo ti 2022: 20 a kʼicháj talbél ti uluwat abal ka aban i tolmixtaláb ti Ucrania, bukʼuwamej 100 i toneladas i kʼapnél, i arroz i jabón, i ilál ani kʼeʼat jantʼoj.
Ma xowéʼ in bichówil a Jehová in binámal watʼadh 190 toneladas i tolmixtaláb ti Ucrania
a Abal ka exlaʼ jantʼiniʼ ti búkʼuwat an tolmixtaláb, a éjtowal ka ajiy ban artículo “Ucrania: valientes Testigos llevan ayuda humanitaria y rescatan a sus hermanos en medio de la guerra”.