I wilkʼál an libro axi más u eyendháb tin puwél an tsabál

«¡U aychámal al 19 i támub!». ¿Jantʼoj játs axi in aychalak an epchal? Kʼwajatak in aychal ka wilkʼáj an Traducción del Nuevo Mundo de las Escrituras Griegas Cristianas ti bengalí. Yan i atikláb jayetsej in ulal tam ka wilkʼáj an Traducción del Nuevo Mundo tin káwintal. ¿A tsalpayámal jay i tʼojláb u tʼajnal abal ka wilkʼáj an Biblia?

Kʼaʼál, an Comité de Redacción axi bijiyámej kʼal an Kwénel i Ókʼnom in aliyal jitaʼchik neʼets ti wílkʼom. ¿Jay u ówel abal ka wilkʼáj an Biblia? A Nicholas Ahladis, axi u tʼojnal ban Servicios de Traducción axi ti Warwick (Nueva York), in ulal: «Kwaʼal ki tʼajaʼ ti kwéntaj yan jantʼoj. Ejtíl, jay i wílkʼom neʼets kin ejtow tu ku tólmiy, max kʼibat an kawintaláb, ani max an epchalchik axi ka pidhan kin ajiy, dhubat neʼets kin exbay. Jayej, max an kawintaláb neʼets ka exbayat al pilchik i tsakam kwénchal. Jun i equipo u ówel jun o ox i támub abal kin wilkʼaʼ expidh an Escrituras Griegas Cristianas, ani abal kin wilkʼaʼ kidhat an Biblia in yéjenchal tse i támub más. Abal ka wilkʼáj ti señas, in yéjenchal más i támub».

Abal ka wilkʼáj an Biblia, yab expidh in yéjenchal i wílkʼom. Jayej u yejencháb i epchal axi u kʼwajíl al pilchik i bichow abal kin ajiy jawaʼ wílkʼadhits. Jawaʼ kin uluwchik in lej tólmiyal an wílkʼom abal kin exlaʼchik max neʼets ka éxbayat, o max kwaʼal kin jálkʼunchij talchik i kaw. Jun i epchal axi ti Sudáfrica, axi in tólmiyal an wílkʼomchik, in ulal: «An wílkʼomchik in atsʼál abal kwaʼal kin tʼajaʼ alwaʼ in tʼojlabil, kom pel in káwintal a Dios ani jitaʼ kin ajiy kwaʼal kin éxbanchij».

Tam ka taʼpajits ti wilkʼáb an Biblia, kwaʼal ka púnuwat al i úw. Abal ka tʼajan axéʼ, an imprenta in yéjenchal talchik jantʼoj. In yéjenchal i úw, i tinta, i pegamento, i cinta, i cartón abal ka tsʼejkanchat in otʼól, ani kʼeʼat jantʼoj abal yab ka jakpan. Ti 2019 pákuwat watʼadh 20 millones i dólares abal ka tsʼaʼyat patal axéʼ. Jayej, al axéʼ xi támub an epchalchik tʼojon 300.000 i horas abal kin watʼbaʼ ti úw ani kin abaʼchik.

¿Jaleʼ ti lej exbadh abal wawáʼ, ki tʼajaʼ axéʼ xi tʼojláb? A Joel Blue, axi u tʼojnal ban Departamento Internacional de Impresión in ulal: «Kom an Biblia játs an libro axi más exbadh abal wawáʼ». Jayej in uluw: «Jayej i tʼajál axéʼ kom i léʼ abal ka puwénchat a Jehová ani ka exláj an alwaʼ kaw».

Jayej, i wilkʼál an Biblia abal an atiklábchik axi yab u tsuʼux. Ejtíl, ti braille, an Traducción del Nuevo Mundo kʼwajat wílkʼadh al 10 i kawintaláb. Abal ka tsʼejkáj jun i Biblia kidhat ti braille u ówel 8 horas, max ki kʼelbay an volúmenes neʼets kin bajuw 2,3 metros. Jayej, i tsʼejkál i biblias abal jitaʼchik kʼwajat ti wíkʼaxteʼ. In otʼól axéʼ xi biblias tsʼejkadh kʼal i úw.

Jitaʼchik in ajiyamal an Traducción del Nuevo Mundo in lej kulbetnámal jantʼiniʼ ti kʼwajat wílkʼadh. Ki tsuʼuw jawaʼ in ulal an epchalchik axi u kaw ti kiluba, axi u kʼwajílchik ti La Tombe (República Democrática del Congo). Axéʼ xi tsakam kwénchal kʼwajat 1.700 kilómetros in owél kʼal an púlik bichow. An epchalchik in kwaʼalak junkats i Biblia ti kiluba, ani kʼibatakchik in atsʼál kin exbay. Abal an epchalchik ka tʼojojon abal an tamkuntaláb, kwaʼalakchik kin matíxnaʼ an Biblia. Pero, ti agosto ti 2018, an epchalchik in batsʼuw júnchik i Biblia tin káwintal, an kiluba.

Jun i epchal axi u kaw alemán in uluw axéʼ tin kwéntaj an Traducción del Nuevo Mundo: «Xowéʼ yabáts u ulal; kwaʼal ku ajiy an Biblia, xowéʼ in kʼwajatits u aychal ku yakʼwaʼ ti ít an Biblia abal ku áynanchij ku ajiy». Jun i inik axi kʼwajat ti wíkʼaxteʼ in dhuchaʼ: «In pidhan jun i Biblia, an Traducción del Nuevo Mundo, axéʼ kʼwajat tin lej tólmiyal abal ku jalkʼuy u ejatal. Tam tu ajiy axéʼ xi Biblia, yab kʼibat u atsʼaʼ ku exbay, u léʼ ku exlaʼ más tin kwéntaj an ólchixchik kʼal a Jehová ani jantʼoj u éjtowal ku tʼajaʼ abal nanáʼ jayej ku bajuw tin ólchix».

Jitaʼchik in ajiyal an Traducción del Nuevo Mundo in lej kʼakʼnál an donaciones axi u bináb abal ka tsʼejkáj más i Biblias. I lej kʼakʼnál an donaciones axi u bináb tin puwél an tsabál ti donate.jw.org.