An tolmixtaláb axi in bínaʼ an epchalchik tin puwél an tsabál

Ti marzo ti 2020 an Organización Mundial de la Salud in uluw abal tujenek an coronavirus, ani yab jitaʼ in tsálpay abal jun i tamub talbél neʼetsak kin áynanchij axéʼ xi yaw’láts. Kʼal axéʼ xi yaw’láts yan i atikláb ani an epchalchik in lej yajchiknámal, in kʼibamal in tʼojlábil, in yanél ani yab in kwaʼalchik i tumín. ¿Jantʼiniʼ tin tʼajámal an ólchixchik abal kin éjtow kin tólmiy axéʼ xi epchalchik?

U pidhnál i tólmixtaláb jitaʼ in yéjenchal

An Comité de Coordinadores kʼal an Kwenél i Ókʼnom, in tʼojojyámal 950 i Comités de Socorro tin puwél an tsabál, abal kin éjtow kin tólmiy jitaʼchik odhnámej kʼal an coronavirus. Al talchik i kwénchal, an comités expidh in tolmiyámal jitaʼchik tanáʼ u kʼwajíl, ani al kʼeʼatchik i kwénchal an epchalchik in batsʼuwámal an tolmixtaláb axi u pidhnal kʼal an eyalchik. Jayej, an Comité de socorro in tolmiyámalchik an epchalchik axi tin puwél an tsabál.

Ki tsuʼuw jantʼoj u watʼel ti Paraguay. Jun i periódico in ulúmal abal kʼal an coronavirus an atiklábchik yab in kwaʼal jantʼoj kin kʼapuw. Pero an epchalchik okʼxinénekits kin bínaʼ i kʼapnél, i jabón, i ilál abal tsab i semana. In jalbíl kʼal patal axéʼ pel jun i 30 dólares, ani neʼetsak kin kuxundhaʼ abal jun tseʼ i atikláb.

¿Jantʼiniʼ tin tʼajalchik jitaʼ u tólmix abal yab ka dhaʼun kʼal an coronavirus? In paxkʼiyalchik in wiʼ ani yab u tʼojnalchik lej utúx. Jayej in tʼajalchik ti kwéntaj abal jitaʼchik in tsʼaychal an kʼapnél ka kʼwajiy tʼokat juʼtáj tu tʼojnál. Jayej in tʼajalchik it kwéntaj abal jitaʼ in kitnál an kʼapnél kin beletnaʼchik tin baʼ, ka kʼwajiy tʼokat an carro ani jayej juʼtáj in punuwalchik an kʼapnél. Jayej jitaʼchik in bukʼuwal an kʼapnél in tʼajalchik ti kwéntaj abal yab ka otsits tin kʼimaʼ an epchalchik.

U tʼajnal ti kwéntaj jantʼiniʼ ti neʼets ka eyendháj an tumín

Ti enero ti 2021, an Comité de Coordinadores in ulúmalakits abal neʼetsak ka eyendháj 25 millones de dólares abal ka tólmiyatchik jitaʼ in yajchiknál kʼal an Coronavirus. An sucursales ani an Comités de Socorro in lej tʼajalchik ti kwéntaj abal kin eyendhaʼ alwaʼ an tumín ani abal tam kin tsʼaʼiy jantʼoj, yab ka kalej lej jálbidh. Jun i tʼiplab, ti Chile, an epchalchik axi ban comité de socorro in leʼak kin tsʼaʼiy 750 kilos i lentejas. Pero watʼey jun i íts ani lej kʼadhiy in jalbíl an lentejas. Pero bélits antsanáʼ an epchalchik in tákuy kin tsʼaʼiy i lentejas. Pero, tsab i hora talbél an nujul in tawnaʼ an epchalchik in uluw abal jun i tsʼaʼum in wichbaʼ patal an lentejas axi in tsʼaʼiyamalak. Ani an nujul in uchaʼchik an epchal abal neʼetsak ka nujchat an lentejas axi wichbaj al in jalbíl axi in kwaʼalak jun i ítsʼ okʼxidh.

Pero tam ti an epchalchik kʼalej in aliyal an lentejas, uchanchik abal neʼetsak ka jilchin más jálbidh. Ani jólbiyatchik ani uchan abal in pidhalakchik an kʼapnél jitaʼchik yab chubax in yéjenchalak. Jun i epchal in ólonchij a Jehová ani in uchaʼ an nujul abal in konoyamalakchik an epchal axi ban tamkuntaláb jitaʼ játs axi chubax in yéjenchalak an kʼapnél jayej, in uchaʼchik an nújul abal in tʼajalakchik ti kwéntaj max an epchal in ujnamakchik kin eyendhaʼ an kʼapnél axi neʼetsak ka pidhan. Antsanáʼ an epchalchik in pidhálakchik jawaʼ in yéjenchal ani jawaʼ in ujnámak kin éyendhaʼ. Jayej an epchalchik in uchaʼ abal patal an tumín ani an tʼojlab axi in binál, pel kom in kʼanidhál a Jehová. An nujul in lej jikʼpaʼ patal jawaʼ uchan kʼal an epchalchik, yab expidh in jalkʼuy in káwintal, jayej in pidhaʼchik 400 kilos i lentejas tam tin tsab tsʼaʼiy an epchalchik.

«U chubax kʼanidhax»

A Lusu pel jun i achláb axi tsemchidh ani u kʼwajíl ti Liberia, kʼal boʼ in yanél. Jun i dhajuw tam kʼwajatakchik ti kʼapul ani in ajiyal an texto diario jun i momob a Lusu axi in kwaʼalak siete i tamub in tʼajaʼ ti kwéntaj abal yab waʼatsak i kʼapnél. In uluw: «¿Jantʼoj neʼets ki kʼapuw xowéʼ?». A Lusu in uchaʼ abal jajáʼ in olonchámalakits a Jehová, ani in konchij abal ka tólmiyatchik, ani in exlálak abal yab neʼetsak ka walbáj. Nixéʼ xi wakal tawnáj a Lusu kʼal an ókʼnom axi ban tamkuntaláb ani uchan abal ka kʼalej kin ikʼiʼ i kʼapnél. Jajáʼ in ulal: «U momob in ulal abal xowéʼ in lej belal abal a Jehová in atsʼál an ólab, kom tin tokʼtsinchij axi nanáʼ u tʼajchij».

Jun i mimláb axi u kʼwajíl ban República Democrática del Congo pel in at kʼwajíl jun i ólchixchik kʼal a Jehová. Tam tin tsuʼuw abal an epchalchik in batsʼuwalak i kʼapnél, jajáʼ in uluw: «Tam ka taley an Coronavirus neʼets ki tʼajaʼ tu ólchix kʼal a Jehová, kom u tsuʼtal abal jajáʼchik chubax u kʼanidhax ani u tolmíx». Konówiyat kʼal in tomkíl: «¿Neʼets ka tʼajaʼ ta ólchix kʼal a Jehová expidh kom it pidhnál i kʼapnél?». An mimláb in tokʼtsiy: «Imbáj, yab antsanáʼ. Pel kom nixéʼ an kʼapnél in tejwamedhál abal chubax u kʼanidhax».

Kʼakʼnámal kʼal an donaciones axi tataʼchik a binámal, an ólchixchik kʼal a Jehová in ejtowámal kin tólmiy dhubatkʼij, an epchalchik axi in watʼámal i yejenchixtaláb kʼal an Coronavirus. Kʼakʼnámal kʼal patal an donaciones axi a binál ti donate.jw.org.