¿Jantʼoj i éjtowal ki tʼajaʼ abal etsʼey ki kʼanidhaʼ an epchalchik?

1, 2. a) ¿Jaleʼ tin uluw an abatwálej Pablo abal an kʼanidhomtaláb jats axi más exbadh? b) ¿Jantʼoj tam ox i konowixtaláb neʼets ki tókʼtsiy?

TAM ti an abatwálej Pablo kawin tin kwéntaj an belomtaláb, an aychixtaláb ani an kʼanidhomtaláb, jayej in uluw axéʼ: «Jawaʼ lej kʼadhpich winat alwaʼ jats an kʼanidhomtaláb» (1 Cor. 13:13). ¿Jaleʼ tin uluw nixéʼ? Kom tam a Jehová kin bínaʼits patal an alwaʼtaláb ban ít tsabál, yabáts neʼets ki yéjenchij ki koʼoy i belomtaláb. Pero waʼats jantʼoj axi etsʼey neʼets ki yéjenchij, jats ki kʼanidhaʼ a Jehová ani an atiklábchik. Nixéʼ xi kʼanidhomtaláb neʼets kin áynanchij ka púwey abal etsʼey.

² Kom etsʼey neʼets ki yéjenchij ki tejwamédhaʼ i kʼanidhomtaláb, jaxtám neʼets ki tókʼtsiy ox i konowixtaláb. Kʼaʼál, ¿jaleʼ i yéjenchal ku kʼanidháxin? Tsabchíl, ¿jantʼiniʼ i éjtowal ki tejwamédhaʼ abal u kʼanidháx? Ani oxchíl, ¿jantʼoj i éjtowal ki tʼajaʼ abal etsʼey ka kʼwajiy tsapik nixéʼ xi kʼanidhomtaláb?

¿JALEʼ TIN TOMNÁL KU KʼANIDHÁXIN?

3. ¿Jaleʼ ti lej exbadh ku kʼanidháxin?

³ ¿Jaleʼ tin tomnál ku kʼanidháxin? Kom antsanáʼ neʼets ki tejwamédhaʼ abal chubax pel u aykol kʼal a Cristo. A Jesús in uchaʼ axéʼ xi kaw in abatwálej: «Max chubax ki kʼanidháxin, tam patal an inikchik neʼets kin tsoʼóbnaʼ abal tatáʼchik pel tu lej exóbalil» (Juan 13:35). Jayej, an abatwálej Pablo in tejwamédhaʼ abal an kʼanidhomtaláb jats axi tu tólmiyal abal ku kʼwajiy junkudh (Col. 3:14). Ani waʼats kʼeʼat i tsalap más exbadh abal jaleʼ ti kwaʼal ku kʼanidháxin. An abatwálej Juan in dhuchaʼ axéʼ xi kaw abal an epchalchik: «Max i kʼanidhál a Dios, ki kʼanidhaʼ an epchalábchik jayej» (1 Juan 4:21). Tam, max ki tejwamédhanchij an epchalchik abal i kʼanidhál, jayej neʼets ki tejwamédhaʼ abal i kʼanidhál a Jehová.

4, 5. Ka ólnaʼ kʼal jun i tʼiplab jaleʼ ti lej exbadh ki kʼanidhaʼ an epchalchik.

⁴ Max i kʼanidhál a Jehová jayej neʼets ki kʼanidhaʼ an epchalchik. ¿Jaleʼ ti ulal nixéʼ? Ki tsalpay kʼal axéʼ xi tʼiplab. Tam jun i doctor in léʼ kin exlaʼ jantʼiniʼ kʼwajat ti tʼojnal i ichích, in tʼajál ti kwéntaj kʼeʼat jantʼoj. Ejtíl, tu takchal i kʼubak abal kin tʼajaʼ ti kwéntaj jantʼiniʼ u tumtúl i ichích. ¿Jantʼoj i exobnál kʼal axéʼ xi tʼiplab?

⁵ An doctor in éjtowal kin exlaʼ jantʼiniʼ kʼwajat ti tʼojnal i ichích tam kin tʼajaʼ ti kwéntaj jantʼiniʼ u tumtúl. Antsanáʼ neʼets kin exlaʼ max kʼwajat ti tʼojnal tsapik o imbáj. Xowéʼ ki tsalpay kʼal axéʼ, ¿jantʼiniʼ i éjtowal ki exlaʼ max kʼwajat tsapik an kʼanidhomtaláb axi i koʼonchal a Jehová? Ki tsalpay jantʼiniʼ jats an kʼanidhomtaláb axi i koʼonchal an epchalchik. Max ki tʼajaʼ ti kwéntaj abal kʼwajat ti tsaʼkanal an kʼanidhomtaláb axi i koʼonchal an epchalchik, walám jayej kʼwajat ti tsaʼkanal an kʼanidhomtaláb axi i koʼonchal a Jehová. Pero max i ujnám ki tejwamédhanchij i kʼanidhomtaláb an epchalchik, tam an kʼanidhomtaláb axi i koʼonchal a Jehová jayej neʼets ka kʼwajiy tsapik.

6. ¿Jaleʼ ti kwaʼal ku tsalpaxin max i atsʼál abal yabáts i lej kʼanidhál an epchalchik? (1 Juan 4:​7-9, 11).

⁶ Max i atsʼál abal an kʼanidhomtaláb axi i koʼonchal an epchalchik yabáts lej tsapik, kwaʼal ki tʼajaʼ jantʼoj ¿jaleʼ? Kom nixéʼ in tejwamedhál abal an kʼanidhomtaláb axi i koʼonchal a Jehová kʼwajat ti tsaʼkanal. Antsanáʼ ti tejwaʼ kʼal an kaw axi in dhuchaʼ an abatwálej Juan: «Max yab i kʼanidhál i epchal, axi i tsuʼtal, yab neʼets ki ejtow ki kʼanidhaʼ a Dios, axi yab i tsuʼtal» (1 Juan 4:20). ¿Jantʼoj i exobnál? Expidh neʼets ki kulbedhaʼ a Jehová max i kʼanidhál an epchalchik (ka ajiy 1 Juan 4:​7-9, 11).

¿JANTʼINIʼ I ÉJTOWAL KI TEJWAMÉDHAʼ ABAL U KʼANIDHÁX?

7, 8. ¿Jantʼiniʼ i éjtowal ki tejwamédhaʼ abal u kʼanidháx?

⁷ Ban Biblia neʼets ki elaʼ yaníl axéʼ xi abatnaxtaláb: «Kit kʼanidháxin jun kʼal axi jun» (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Pero an kʼanidhomtaláb pel jantʼoj axi neʼets ti puwel ti ichích, yab jitaʼ in éjtowal kin tsuʼuw. Tam, ¿jantʼiniʼ i éjtowal ki tejwamédhaʼ axéʼ xi kʼanidhomtaláb, abal axi más kin tʼajaʼ ti kwéntaj? Neʼets ki tejwamédhaʼ kʼal jawaʼ i ulal ani kʼal jawaʼ i tʼajál.

⁸ Waʼats yan jantʼiniʼ ki tejwamédhanchij i kʼanidhomtaláb an epchalchik. An Biblia tu ólchal talchik i tʼiplab: «Kwaʼal ka uluwchik an chubaxtaláb» (Zac. 8:16). «Ka koʼoy i kʼayaʼtaláb jun kʼal axi jun» (Mar. 9:50). «Ki kʼakʼnaxin jun kʼal axi jun» (Rom. 12:10). «Ki batsʼkʼuxin jun kʼal axi jun kʼal i kulbetaláb» (Rom. 15:7). «Ka pakwlanchij a at inik» (Col. 3:13). «Ki tolmixin kʼal jawákits tam kitaláb a neʼdhál ta ichích» (Gál. 6:2). «Ki tsaplinchíxin a ichích jun kʼal axi jun» (1 Tes. 5:11). «Ka kónchinchij an epchalchik ta olábil» (Sant. 5:16).

9. ¿Jaleʼ ti ulal abal tam i tsápliyal jun i epchal i tejwamédhanchal abal i kʼanidhál? (Ka tsuʼuw jayej an imágenes).

⁹ Ki exóbnaʼ jun i tsalap abal jantʼiniʼ i éjtowal ki tejwamédhaʼ i kʼanidhomtaláb. Ban párrafo 8 i tsuʼuw jun i kaw axi in uluw an abatwálej Pablo: «Ki tsaplinchíxin a ichích jun kʼal axi jun». ¿Jaleʼ ti ulal abal tam i tsáplinchal in ichích an epchalchik, i tejwamédhanchal i kʼanidhomtaláb? Jun i libro in wilkʼál jaleʼ ti a Pablo in eyendhaʼ an kaw «tsápliy». In ulal abal ti griego in léʼ kin uluw «ku kʼwajiy utat kʼal jun i atikláb abal ki kanatbédhaʼ tam in tametnál i kʼibataláb». Tam ki tsápliy o ki kanatbédhaʼ jun i epchal axi kʼwajat in yajchiknál, i tólmiyal abal kin áynanchij al axéʼ xi bel. Tam jun i epchal kʼwajat tʼeʼpidh ani in léʼ ti ukʼnal, wawáʼ neʼets ku kʼwajiy kʼal jajáʼ, antsanáʼ neʼets ki tejwamédhanchij abal i kʼanidhál (2 Cor. 7:​6, 7, 13).

10. ¿Jaleʼ ti lej exbadh ki yajnanchij axi más ani ki tsáplinchij in ichích?

¹⁰ Lej exbadh ki yajnanchij ani ki tsápliy axi más. ¿Jaleʼ? Tam i tsuʼtal abal jun i atikláb kʼwajat in yajchiknál, i yajnanchal ani i tʼajál jantʼoj abal ki tólmiy. U kʼalel ki kanatbédhaʼ kom i léʼ ki tsáplinchij in ichích. Jayetsej in tʼajál a Jehová. A Pablo in uluw abal an yajnanchixtaláb axi a Jehová in koʼonchal an atiklábchik, in tʼajál abal kin kanatbédhaʼ ani kin tsáplinchij in ichích, ani jaxtám etsʼey in aliyal jantʼiniʼ tu ku tólmiy (2 Cor. 1:3). Tam, kom a Jehová pel jun i Dios axi u yajnanchix ani tu «kulbédhanchal i ichích», in tʼajál ti kwéntaj jawaʼ i watʼal abal tu ku kanatbédhaʼ (2 Cor. 1:4). Jun i tʼiplab, antsanáʼ jantʼiniʼ an jáʼ tu tíxkʼanchal an chikénib, a Jehová tu tólmiyal abal ki atsʼaʼ alwaʼ ani tu kulbédhanchal i ichích tam exom i yajchiknál. ¿Jantʼoj neʼets tu ku tólmiy abal ki yajnanchij axi más ani ki tsáplinchij in ichích antsanáʼ jantʼiniʼ in tʼajál a Jehová? Max ki nitsʼbiy jantʼiniʼ in ey a Jehová. Ki tsuʼuw talchik i tʼiplab.

11. Kʼal jawaʼ in ulal Colosenses 3:12 ani 1 Pedro 3:​8, ¿jantʼoj neʼets tu ku tólmiy abal ki kʼanidhaʼ axi más ani ki tsáplinchij in ichích?

¹¹ ¿Jantʼoj neʼets tu ku tólmiy abal ki áynanchij ki kʼanidhaʼ axi más ani ki tsáplinchij in ichích? Kwaʼal ki tsápnanchij ki tʼajaʼ ti kwéntaj jawaʼ in atsʼálchik, ki kʼanidhaʼ ani ki tʼajaʼ tu alwaʼ inik (ka ajiy Colosenses 3:12; 1 Pedro 3:8). Max wawáʼ ki tsápnanchij ki tejwamédhaʼ axéʼ ti ejatal, yab neʼets ki atsʼaʼ kʼibat ki tsáplinchij in ichích jitaʼ kʼwajat in yajchiknál. A Jesús in uluw axéʼ xi kaw: «Jantʼinits a lej ichích, antsanáʼ neʼets ka uluw ta wiʼ, axi alwaʼ inik in ulal jawaʼ alwaʼ kom alwaʼ in ichích» (Mat. 12:​34, 35). Kʼal axéʼ i exobnál abal lej exbadh ki tsáplinchij in ichích an epchalchik, kom antsanáʼ i tejwamedhál abal i kʼanidhál.

¿JANTʼOJ I ÉJTOWAL KI TʼAJAʼ ABAL KI ÁYNANCHIJ KI KʼANIDHAʼ AXI MÁS?

12. a) ¿Jaleʼ ti lej exbadh ki áynanchij ki kʼanidhaʼ an epchalchik? b) ¿Jantʼoj tam konowixtaláb neʼets ki tókʼtsiy?

¹² Patal i léʼ ki bélkaʼ axéʼ xi abatnaxtaláb: «Ku kʼanidháxin jun kʼal xi jun» (1 Juan 4:7). Pero lej exbadh ki tʼilaʼ an kaw axi a Jesús in uluw: «Yan i atiklábchik yabáts neʼets ka kʼanidháxin» (Mat. 24:12). Tejéʼ a Jesús yab kʼwajatak in ulal abal yan kʼal in aykolil yabáts neʼets ka kʼanidháxin. Belits antsanáʼ yab kwaʼal ki jilaʼ tu ku tsʼilkʼoy jawaʼ in tsalpayal an atiklábchik. Xowéʼ ki tsalpay kʼal axéʼ xi konowixtaláb: ¿jantʼiniʼ i éjtowal ki exlaʼ max an kʼanidhomtaláb axi i koʼonchal an epchalchik tsaʼkanének?

13. ¿Jantʼoj neʼets tu ku tólmiy ki exlaʼ max kʼwajat tsapik an kʼanidhomtaláb axi i koʼonchal an epchalchik?

¹³ Jantʼoj axi neʼets tu ku tólmiy ki exlaʼ max chubax i kʼanidhál an epchalchik, játs ki tsalpay max i tólmiyal tam in tametnálchik i kʼibataláb (2 Cor. 8:8). Ki tsuʼuw jantʼoj in uluw an abatwálej Pedro: «Jawaʼ lej kʼadhpich exbadh játs ka lubaʼ kit lej kʼanidháxin jun kʼal xi jun, kom axi u kʼanidhom jayej u lej pakwlanchix kʼal jitaʼ ka wálbin» (1 Ped. 4:8). Tam, neʼets ka tejwaméj abal chubax i kʼanidhál an epchalchik max ki pakwlanchij tam ka ukʼpin o tam tu ku odhnaʼ kʼal in káwintal.

14. Kʼal jawaʼ in ulal 1 Pedro 4:​8, ¿jantʼiniʼ játs an kʼanidhomtaláb axi in tomnál ki tejwamédhaʼ? Ka olnaʼ jun i tʼiplab.

¹⁴ Ki exóbnaʼ an kaw axi in uluw a Pedro. Tin tujtal an versículo 8 in olnál jantʼiniʼ játs an kʼanidhomtaláb axi in tomnál ki koʼoy. Jajáʼ in uluw: «Ka lubaʼ kit lej kʼanidháxin». An kaw «ka lubaʼ» in léʼ kin uluw jantʼoj «axi u chuʼel». In taltal an versículo 8 in ulal jantʼoj u watʼel tam jun u kʼanidhom. In ulal abal an kʼanidhomtaláb axi jun in koʼonchal an epchalchik in tʼajál abal kin pakwlanchij in wálab. Jun i tʼiplab, ki tsalpay kʼal jun i mesa axi lej kilolol. Abal yab ka tejwaméj jawaʼ kidháb, tatáʼ a punchal jun i toltom, antsanáʼ u jílkʼonal paxkʼidh. Aniyej, max ki lubaʼ ki kʼanidhaʼ an epchalchik, neʼets ki ejtow ki paxkʼiy o ki pakwlanchij tam tu ku odhnaʼ kʼal in káwintal, o kin tʼajaʼ jantʼoj axi yab i kulbetnál, belits max an epchal ka ukʼpin yaníl.

15. ¿Jantʼoj neʼets ka watʼey max tsapik an kʼanidhomtaláb axi i koʼonchal an epchalchik? (Colosenses 3:13).

¹⁵ Lej exbadh ki kóʼonchij jun i púlik kʼanidhomtaláb an epchalchik kom nixéʼ neʼets tu ku tólmiy ki pakwlanchij in wálab, belits max i atsʼál lej kʼibat ki tʼajaʼ (ka ajiy Colosenses 3:13). Tam i pákwlanchal axi más, i tejwamedhál abal i kwaʼal jun i púlik kʼanidhomtaláb abal kʼal a Jehová ani abal i léʼ ki tʼajchij in kulbétal. ¿Jantʼoj más neʼets tu ku tólmiy abal yab ki lej tʼajaʼ ti kwéntaj tam jun i epchal u ukʼpinal?

16, 17. ¿Jantʼoj más neʼets tu ku tólmiy abal ki pakwlanchij ani yab ki tʼajaʼ ti kwéntaj tam u ukʼpinal jun i epchal? Ka olnaʼ jun i tʼiplab. (Ka tsuʼuw jayej an imágenes).

¹⁶ Ka tsápnanchij ka tʼajaʼ ti kwéntaj jawaʼ in tʼajál alwaʼ an epchalchik ani yab expidh tam u ukʼpinal. Jun i tʼiplab, ka tsalpay abal it kʼwajat kʼal an epchalchik ta kʼijidhbél ani talbél a kaldhálchik i fotos, pero max ka tʼajaʼ ti kwéntaj abal jun kʼal axéʼ xi fotos yab kalej alwaʼ, ¿jantʼoj neʼets ka tʼajaʼ? Neʼets ka pakuw ani expidh neʼets ka jilaʼ an fotos juʼtáj ti kalejchik alwaʼ.

¹⁷ An fotos axi i kaldhál pel abal ki tʼilaʼ jawaʼ i tʼajaʼ nixéʼ a kʼicháj. Pel abal ki tʼilaʼ tam tu tamkun kʼal an epchalchik ani abal i atsʼaʼ lej kulbél. Pero xowéʼ ki tsalpay abal jun a kʼicháj, jun i epchal ti tʼajchij o ti uchaʼ jantʼoj axi yab a kulbétnaʼ, ¿jantʼoj neʼets ka tʼajaʼ? ¿Neʼets ka ukʼchiy antsanáʼ jantʼiniʼ tam a pakuwal jun i foto? (Prov. 19:11; Efes. 4:32). Kom i kwaʼal jun i alwaʼ jaʼubtaláb kʼal nixéʼ xi epchal, i tsápnanchal ki pakwlanchij ani ki ukʼchiy jawaʼ in tʼajaʼ. Axéʼ tu exóbchal abal lej exbadh yab ki tʼajchij ti kwéntaj tam u ukʼpinal an epchal.

¿JALEʼ TI LEJ EXBADH KI TEJWAMÉDHAʼ I KʼANIDHOMTALÁB XOWÉʼ TA KʼICHÁJ?

18. ¿Jantʼoj tam tsalap i tsuʼuw al axéʼ xi exobintaláb?

¹⁸ ¿Jaleʼ ti léʼ ki tsápnanchij ku kʼanidháxin? I exóbnaʼ abal tam i tsápnanchal ki kʼanidhaʼ an epchalchik, jayej i tejwamedhál abal i kʼanidhál a Jehová. ¿Jantʼiniʼ i éjtowal ki tejwamédhanchij an epchalchik abal i kʼanidhál? Neʼets ki tejwamédhaʼ tam i kanatbedhálchik ani tam i áynanchal ki tsáplinchij in ichích. Ani abal ki áynanchij ki tʼajaʼ nixéʼ, in yéjenchal ki yajnanchij ani ki exbay jawaʼ in atsʼálchik. ¿Jantʼoj i éjtowal ki tʼajaʼ abal ki áynanchij ki kʼanidhaʼ an epchalchik? Kwaʼal ki tsápnanchij abal etsʼey ki pakwlanchij.

19. ¿Jaleʼ ti lej exbadh ku kʼanidháxin xowéʼ ta kʼicháj?

¹⁹ ¿Jaleʼ ti lej exbadh ku kʼanidháxin xowéʼ ta kʼicháj? Ki tsuʼuw jantʼoj in uluw a Pedro: «Kom weʼits ka taley patal jawaʼ i tsuʼtal ban xeʼtsintaláb, jaxtám […] ka lubaʼ kit lej kʼanidháxin jun kʼal xi jun» (1 Ped. 4:​7, 8). ¿Jantʼoj neʼets ka watʼey biyat más u utel in kʼichájil a Jehová? A Jesús in uchaʼ in aykolil: «Patal an atiklábchik neʼets ti atʼaʼ kʼal tin ebál nanáʼ u bij» (Mat. 24:9). Lej exbadh ku kʼwajiy junkudh abal ki ejtow ki áynanchij ki kʼakʼnaʼ a Jehová, belits max u pojkáb. Max i kʼanidhál an epchalchik, a Satanás yab neʼets kin ejtow tu ku pilmedhaʼ kom an kʼanidhomtaláb neʼets tu ku tólmiy abal ku kʼwajiy junkudh (Col. 3:14; Filip. 2:​1, 2).