AJUMTALÁB 4

Ka olnaʼ jaleʼ ti neʼets ka ajiy jún i texto axi ti Biblia

Mateo 22:41-45

RESUMEN: Ka tólmiy an atikláb kin exbay jaleʼ ti neʼets ka ajiy an texto axi ti Biblia.

Kwaʼal ka exlaʼ jaleʼ ti neʼets ka ajiy jún i texto. Okʼxidh ka ajiy, ka tólmiy an atikláb kin exbay jawaʼ tam pejach al an texto a léʼ abal kin exlaʼ.

Ka tejwamédhaʼ jantʼoj u watʼelak tam ti dhuchan an texto. Ka olnaʼ jitaʼ in uluw nixéʼ an káw ani jitaʼ in dhuchaʼ.
Ka tejwamédhaʼ abal jawaʼ in ulal an Biblia játs axi más exbadh. Tam ka tʼilmay jitaʼ axi in belál kʼal a Dios, ka tejwamédhanchij abal an Biblia pél in káwintal a Dios ani abal tanáʼ ti kʼwajat patal an tsalpadhtaláb.
Ka tʼajaʼ abal an atikláb kin léʼnaʼ kin exlaʼ jawaʼ in ulal an texto axi ti Biblia. Ka tʼajaʼ jún i konowixtaláb axi ka tokʼtsin kʼal an texto, ka olnaʼ jún i kʼibataláb axi i ejtowal ki tsʼejkaʼ kʼal nixéʼ an texto o jún i tsalpadh káw kaldhach al an texto.

Ka tʼajaʼ ti kwéntaj jawaʼ in exlálits jitaʼ ti otsʼówiyal tin kwéntaj an texto axi ti Biblia ani an exobintaláb. Bélits max u lej exlabits an texto axi neʼets ka ajiy, ka tʼajaʼ abal jitaʼ ti otsʼówiyal kin kulbétnaʼ, ka tólmiy abal kin exbaychik alwaʼ ani ka ólchichik jantʼoj axi walám yab in exlálchik tin kwéntaj an texto.