AJUMTALÁB 2

Kit káwin jantʼiniʼ tam it tʼilom

2 Corintios 2:17

RESUMEN: Yab ka jalkʼuy a káwintal ani kit káwin tekedh. Antsanáʼ neʼets ka tejwamédhaʼ abal a belál jawaʼ kʼwajat a olnál ani abal a kʼanidhál jitaʼ kʼwajat ti otsʼówiyal.

JANTʼINIʼ KA TʼAJAʼ

Ka ólonchij a Jehová ani kit exobláts. Ka konchij a Jehová ti tólmiy ka tsalpay expidh kʼal jawaʼ a léʼ ka olnaʼ, antsanáʼ yab neʼets ka atsʼaʼ u tʼelelél a ichích. Ka exóbnaʼ alwaʼ jawaʼ a léʼ kin exlaʼchik axi ti otsʼówiyal. Yab ka ajiyalkʼej jawaʼ a kwaʼal dhuchadh. Ka uluw ta kwetém káwintal.

Max neʼets ka ajiy jantʼoj axi ti Biblia o kʼeʼat i publicación, ka tsápnanchij ka exbay alwaʼ jawaʼ in ulal abal tam ka ajiy yab kit ukʼpin. Max neʼets ka ajiy jawaʼ in uluw jún i atikláb, ka tsápnanchij ka nitsʼbinchij in káwintal, pero yab ka watʼkʼanchij.
Jawaʼ ka uluw kwaʼal ka kalej ta ichích. Biyat kʼwajat ta káw, ka tsalpay kʼal an atiklábchik ani abal jaleʼ tin yéjenchal kin exlaʼ jawaʼ neʼets ka uluw. Nixéʼ neʼets kin tʼajaʼ abal kʼal a wal, jantʼiniʼ a yátsiyal a kʼubak ani jantʼiniʼ it kubat kin tejwamédhaʼ abal a kʼanidhálchik axi ti atsʼál ani abal chubax jawaʼ a ulal.

Kit káwin jantʼiniʼ tam it tʼilom yab in léʼ kin uluw kit káwin jantʼiniʼ ti ka léʼnaʼ. Kom it kʼwajat ta káw tin kwéntaj an Biblia, ka uluw tekedh an káw ani jantʼiniʼ tin tomnál.
Ka metʼaʼ tin wal jitaʼ ti atsʼál. Max juʼtáj it kʼwajíl u ujnáb ka metʼaʼ tin wal jitaʼ kʼwajat a tʼílmayal, ka tʼajaʼ. Tam ka bínaʼ jún i tʼilomtaláb, ka metʼaʼ tin wal an epchalchik.