¿It kʼwajat tʼojojodh «abal kit pidhan an tsabál» axi a Dios neʼets kin bínaʼ?

KU TʼOJOJON ABAL KI WENKʼOW AN TSABÁL TI JUN I PARAÍSO

Tam ti a Jehová in uchaʼ a Adán ani a Eva abal kin koʼoychik yan i tsakam ani kin ábatnaʼ patal jawaʼ waʼats ti Tsabál, in tejwamédhaʼ abal Jajáʼ in léʼak abal jun a kʼicháj patal an Tsabál ka wenkʼon ti jun i paraíso (Gén. 1:28). Jitaʼchik ka kʼwajiy ban ít Tsabál neʼets kin koʼoy nixéʼ xi tʼojláb. Talbél kʼal an Armagedón, jitaʼchik ka kʼwajiy ban Tsabál kwaʼal ka tʼójon lej tsapik, kom an jardín de Edén kʼibej in tʼajál yan i támub. Kwaʼalchik kin wejkʼaʼ patal jawaʼ an atiklábchik in odhnámal.

Tam ti an israelitas walkáj ti Babilonia ani wichiy tin tsabálil, koʼoy kin tʼajaʼ jun i tʼojláb ejtíl nixéʼ, kom al 70 i támub yab waʼtsin i kʼwajíl tanáʼ. Pero kʼal a Jehová tólmiyatchik abal kin tʼajaʼ nixéʼ xi tʼojláb, antsanáʼ jantʼiniʼ in uluw a Isaías: «Jajáʼ neʼets kin tʼajaʼ abal an joltam tsabál kin bajuw ejtíl an jardín axi kʼwajatak ti Edén» (Is. 51:3). An israelitas in tʼajaʼ abal in bichówil ka wenkʼon lej alabél. Ban ít tsabál, a Jehová jayej neʼets tu ku tólmiy abal ki wenkʼow an Tsabál ti jun i paraíso. Ani ma xowéʼ a éjtowalits ka tejwamédhaʼ abal a léʼ ki tólmixin kʼal patal an tʼojláb axi neʼets ka tʼajan ban ít tsabál.

Jun i tʼiplab, a éjtowal ka tsápnanchij abal ka koʼoy tʼokat a kʼimáʼ ani jayej a elébil. Belits max a at kʼwajíl yab in tʼajál, tatáʼ a éjtowal ka tsápnanchij ka tʼajaʼ. Jayej a éjtowal ki tólmixin abal ka tʼokedháj an atáj tamkuntaláb, ani an atáj juʼtáj u tʼajnal an púlik tamkuntaláb. Ani walám ma a éjtowal ka tólmiy an epchalchik juʼtáj ti watʼenek jun i yajchiktaláb. Antsanáʼ neʼets ka tejwamédhaʼ abal chubax a léʼ ka tólmiy jitaʼchik in yéjenchal. Ka tsalpay kʼal axéʼ: «¿U éjtowal ku exóbnaʼ ku tʼojnaʼ jantʼoj xowéʼ abal ku ejtow ku tʼajaʼ jun i tʼojláb ban ít Tsabál?».

KU TʼOJOJON ABAL KI BATSʼUW JITAʼCHIK NEʼETS KA EDHÁJ

Tam ti a Jesús in édhaʼ in tsʼikʼáchil a Jairo, in uluw abal ka píjchiyat an tsakam tsʼikʼách (Mar. 5:42, 43). Walám yabchik in atsʼaʼ tʼojláb kin píjchiy junkats i tsakam tsʼikʼách, pero xowéʼ ki tsalpay jay i tʼojláb neʼets kin yéjenchij abal ki talaʼ tólmiy jitaʼchik neʼets ka edháj ban ít Tsabál. A Jesús in uluw axéʼ xi kaw: «Lej chubax neʼets kin bajuw an hora, abal ka tawnáj ka edháj patal an tsemélomchik» (Juan 5:28, 29). An Biblia yab in lej olnál jantʼoj neʼets kin yéjenchij jitaʼchik ka edháj, pero i tsálpayal abal neʼets kin yéjenchij i kʼapnél, i toltom ani juʼtáj ka kʼwajiy. ¿A éjtowal ka tʼajaʼ jantʼoj xowéʼ abal ka tejwamédhaʼ abal a léʼ ki tólmixin al nixéʼ a kʼicháj? Ka tsalpay kʼal axéʼchik xi konowixtaláb.

Tam u olnáb ti tamkuntaláb abal neʼets ti tsaʼbiychik an ókʼnom kʼal an circuito, ¿a dhuchál a bij abal ka kaniy ti kʼapul? Walám jun i epchal axi u tólmixak ti Betel ka aban ti tolmix al jun i tamkuntaláb, o walám jun i ókʼnom kʼal an circuito axi payeblábits ka uchan abal yabáts neʼets kin áynanchij, ¿a éjtowal ka tólmiychik abal kin elaʼ juʼtáj ka kʼwajiy? Max neʼets ka tʼajan jun i púlik tamkuntaláb ta bichówil, ¿a éjtowal ki tólmixin kʼal an tʼojláb axi neʼets ka waʼtsin, o abal ka bátsʼuwat an epchalchik axi tal owél?

KU TʼOJOJON ABAL KI EXÓBCHIJ AXI NEʼETS KA EDHÁJ

Jawaʼ in ulal Hechos 24:15 in tejwamedhál abal lej watʼadh yan i atikláb axi neʼets ka edháj. Yan kʼal axéʼ xi atikláb yab in ejtow kin exlaʼ tin kwéntaj a Jehová, pero ban ít tsabál neʼets ka exóbchat.a An epchalchik axi in tʼojonchámal a Jehová al yan i támub, neʼets kin ejtow ka tólmixin kʼal axéʼ xi tʼojláb (Is. 11:9). A Carlota pel jun i epchal axi in ejtowámal ti ólnom ti Europa, ti Sudamérica ani ti África. Jajáʼ in lej léʼits abal ka ulits nixéʼ a kʼicháj, in ulal: «U lej léʼits ku exóbchij an atiklábchik axi neʼets ka edháj ban ít tsabál. Tam u ajiyal tin kwéntaj jun i atikláb axi kʼwajiy ti biyál u tsálpayal: ‹Max nixéʼ xi atikláb in exlámalak a Jehová, yab neʼetsak kin lej yajchiknaʼ›. U lej léʼits ku tʼilchij nixéʼchik xi atikláb axi neʼets ka edháj, abal neʼets kin batsʼuw yan i alwaʼtaláb max kin exlaʼchik a Jehová».

Ma in tʼojnálil a Jehová axi kʼwajiy okʼxidh ka waʼtsin a Jesús neʼets kin yéjenchij ka exóbchat yan jantʼoj. Neʼets ki lej kulbétnaʼ ki ólchij a Daniel jantʼiniʼ ti putun an kʼej kaw axi jajáʼ in dhuchaʼ pero yab in bajuw kin exbay (Dan. 12:8). ¿A tsalpayámal jantʼiniʼ ti neʼets kin atsʼaʼ a Rut ani a Noemí tam ka ólchat abal kʼal in yanél játs ti waʼtsin an Mesías? Neʼets ki lej kulbétnaʼ ku tólmixin kʼal patal axéʼ xi tʼojláb axi neʼets ka tʼajan tin puwél an Tsabál. Yabáts jitaʼ neʼets tu ku tʼokʼbanchij ku olnomáts ani yabáts neʼets ki atsʼaʼ kʼibat ki tʼajaʼ axéʼ xi tʼojláb.

¿Jantʼiniʼ a éjtowal ka tejwamédhaʼ abal a léʼ ki tólmixin kʼal axéʼ xi tʼojláb? Ki tsápnanchij ki tʼajaʼ tu alwaʼ exóbchix ani ku tólmixin más ban olnomtaláb (Mat. 24:14). Walám tatáʼ yabáts a éjtowal ta ólnom jantʼiniʼ ti biyál, kom i payeblábits o i yaʼul. Pero max tatáʼ ka tsápnanchij ka tʼajaʼ patal jawaʼ ka ejtow, neʼets ka tejwamédhaʼ abal a léʼ ka tʼajaʼ nixéʼ xi tʼojláb ban alabél tsabál.

¿Chubax a léʼ kit kʼwajiy al nixéʼ xi alabél tsabál? ¿A léʼ ki tólmixin abal ka wenkʼowat an Tsabál ti jun i alabél paraíso? ¿A léʼ ka tólmiychik kʼal jawaʼ neʼets kin yéjenchij axi neʼets ka edháj ani ka exóbchij tin kwéntaj a Jehová? Neʼets ka tejwamédhaʼ abal a léʼ kit kʼwajiy tanáʼ max ka tujchij ma xowéʼ ta tolmix kʼal patal an tʼojláb axi kʼwajat ti tʼajnal, kom pel ejtílits kʼal axi neʼets ka tʼajan ban ít tsabál.