¿Jantʼoj i éjtowal ki exóbnaʼ?

¿Jantʼoj in tomnál ki pidhaʼ más in exbádh?

Ti yanél i atsʼál kʼibat ki jolkʼaʼ i kʼij abal ki exóbnaʼ an Biblia ti kwetemtal. Tam, ¿jantʼoj neʼets ti tólmiy ka eyendhaʼ alwaʼ an kʼij? Kʼaʼál, ka eyendhaʼ alwaʼ an kʼij axi a eyendhál abal ti exóbal. Lej exbadh ka exóbnaʼ wékats i olchixtaláb pero ka exbay alwaʼ ani yab expidh ka ajchikiy.

Ka tsalpay jantʼoj játs axi más exbadh (Efes. 5:15, 16). Tejéʼ waʼats talchik i tʼiplab kʼal jantʼoj a éjtowal ka exóbnaʼ:

• Ka tsápnanchij ka ajiy an Biblia chudhél chudhél (Sal. 1:2). Jantʼoj axi a éjtowal ka tʼajaʼ játs ka ajiy an capítulos axi bíjidh abal an tamkuntaláb axi ti tsʼejel semana.

• Ka okʼxidh exóbnaʼ jawaʼ neʼets ki tsuʼuw ti tamkuntaláb, ejtíl An Ólchix Uw ani an tamkuntaláb axi ti tsʼejel semana. Kit exobláts alwaʼ abal ka ejtow ka bínaʼ jun i tokʼtsixtaláb (Sal. 22:22).

• Ani max a kwaʼal más i kʼij abal ti exóbal ka tsápnanchij ka ajiy patal jawaʼ kʼwajat ti kalel ít, ejtíl an revistas axi i jilchal an atiklábchik, an videos ani patal jawaʼ u kalel ti jw.org.

• Ka tsalpay kʼal kʼeʼat jantʼoj axi a léʼ ka exóbnaʼ. A éjtowal ka aliy i exobchixtaláb tin kwéntaj jun i kʼibataláb axi a kwaʼal, jun i konowixtaláb axi a tʼajámal, o ka exóbnaʼ más tin kwéntaj jun i texto axi ti Biblia. Neʼets ka elaʼ más i olchixtaláb ban pejach «Actividades para estudiar la Biblia», axi kʼwajat ti jw.org.