Երիտասարդնե՛ր, ի՞նչ ուղի կընտրեք կյանքում
«ԼԱՎԱԳՈՒՅՆ կյանքով եմ ուզում ապրել»,— ասաց մի դեռահաս աղջիկ։ Անկասկած դու էլ նման ցանկություն ունես։ Իսկ ո՞րն է լավագույն կյանքը, և ինչպե՞ս կարող ես լավագույն կյանքով ապրել։ Հեռուստատեսությամբ, ռադիոյով, ինչպես նաև թերթերում և ամսագրերում այն միտքն է շեշտվում, որ լավագույն կյանքը շատ փող և լավ կարիերա ունենալն է։ Նույն միտքը գուցե լսես նաև քո հասակակիցներից և անգամ ուսուցիչներից։
Սակայն Աստվածաշունչը զգուշացնում է երիտասարդներին, որ նյութական բարիքների հետևից ընկնելը ոչ այլ ինչ է, քան «վազք՝ քամու հետևից» (Ժողովող 4։4)։ Քչերին է հաջողվում հարստանալ և փառքի հասնել։ Նույնիսկ այդ «հաջողակները» հաճախ մեծ հիասթափություն են ապրում։ «Այդ ամենը նման է մի փակ տուփի,— ասում է բրիտանացի մի երիտասարդ, ով արդեն հասցրել էր դառնալ ակադեմիկոս։— Սակայն, երբ բացում ես այն, տեսնում ես, որ դատարկ է»։ Ճիշտ է, աշխատանքի միջոցով հնարավոր է հարստանալ և ճանաչում ձեռք բերել, սակայն դա չի կարող բավարարել քո «հոգևոր կարիքները» (Մատթեոս 5։3)։ Բացի այդ, ինչպես ասվում է 1 Հովհաննես 2։17-ում՝ «աշխարհն անցնում է»։ Ուստի, եթե նույնիսկ հաջողության հասնես այս աշխարհում, այն շատ կարճ կտևի։
Ժողովող 12։1-ը հետևյալ խորհուրդն է տալիս. «Հիշիր քո Մեծ Արարչին երիտասարդությանդ օրերում»։ Այո՛, լավագույն ուղին Եհովա Աստծուն ծառայելն է։ Բայց նախ պետք է համապատասխանես Աստծու ծառա կոչվելու չափանիշներին։ Իսկ ի՞նչ քայլեր պետք է անես դրա համար, և ի՞նչ է նշանակում ծառայել Աստծուն։
Քայլեր Եհովայի վկա դառնալու համար
Առաջին հերթին պետք է Աստծուն ծառայելու ցանկություն զարգացնես, քանի որ այն ինքնաբերաբար չի առաջանում, նույնիսկ եթե ծնողներդ քրիստոնյա են։ Դու պետք է քո անձնական փոխհարաբերությունը ունենաս Եհովայի հետ։ Ի՞նչը կարող է նպաստել դրան։ Դեռահաս մի աղջիկ ասում է. «Աղոթքն օգնում է, որ մտերմանաս Աստծու հետ» (Սաղմոս 62։8; Հակոբոս 4։8)։
Հռոմեացիներ 12։2-ում խոսվում է մյուս քայլի մասին. «Հավաստիացեք, թե որն է Աստծու բարի, ընդունելի և կատարյալ կամքը»։ Հնարավոր է՝ երբեմն սկսես կասկածել, որ այս կամ այն բանը քեզ ճիշտ չեն սովորեցրել։ Նման դեպքերում հետևիր Աստվածաշնչի հորդորին՝ «հավաստիացիր»՝ ինքդ քեզ ապացուցիր, որ քո իմացածը ճիշտ է։ Ինքնուրույն ուսումնասիրություններ արա։ Կարդա Աստվածաշունչը և աստվածաշնչյան հրատարակությունները։ Աստծու հետ մտերմանալու համար բավարար չէ միայն գիտելիքներ ունենալ։ Քո ձեռք բերած գիտելիքների շուրջ խորհրդածելով է, որ դրանք կհասնեն քո սրտին, և կսկսես ավելի ու ավելի շատ սիրել Աստծուն (Սաղմոս 1։2, 3)։
Այնուհետև քո իմացած բաների մասին պատմիր ուրիշներին, թեկուզ հենց ընկերներիդ։ Հաջորդ քայլը տնից տուն քարոզելն է։ Հնարավոր է՝ այս ծառայության ընթացքում պատահաբար հանդիպես դասընկերներիդ, և սկզբնական շրջանում գուցե նրանցից փոքր-ինչ քաշվես։ Սակայն Աստվածաշունչը հորդորում է մեզ չամաչել բարի լուրը հռչակելուց (Հռոմեացիներ 1։16)։ Չէ՞ որ քո հայտնածը բարի լուր է կյանքի ու ապագայի հույսի մասին։ Ուրեմն՝ ինչո՞ւ ամաչել։
Իսկ եթե քո ծնողները քրիստոնյա են, հնարավոր է՝ դու նրանց հետ արդեն մասնակցել ես քարոզչական ծառայությանը։ Սակայն կարող ես ավելին անել, քան պարզապես լուռ նրանց կողքին կանգնել կամ ուղղակի ամսագիր ու թերթիկ առաջարկել։ Միգուցե ինքդ զրույցը վարես՝ օգտագործելով Աստվածաշունչը։ Եթե դժվարանում ես, խնդրիր ծնողներիդ կամ ժողովի փորձառու քրիստոնյաներից մեկին օգնել քեզ։ Նպատակ դիր դառնալու բարի լուրի քարոզիչ։
Ժամանակի ընթացքում քո մեջ ցանկություն կառաջանա նվիրվելու Աստծուն, այսինքն՝ խոստանալու, որ այդուհետ իրեն ես ծառայելու (Հռոմեացիներ 12։1)։ Սակայն Աստծուն նվիրվելը դրանով չի սահմանափակվում։ Աստված պահանջում է, որ բոլորը «հրապարակորեն հռչակեն փրկության համար» (Հռոմեացիներ 10։10)։ Մկրտության ժամանակ նախ ներկաների առաջ բարձրաձայն «հռչակում ենք» մեր հավատը, որից հետո մկրտվում ենք ջրում (Մատթեոս 28։19, 20)։ Մկրտությունն, ինչ խոսք, լուրջ քայլ է։ Սակայն չպետք է խուսափել դրանից միայն այն պատճառով, որ վախենում ես որևէ հարցում սխալվել։ Եթե լիովին ապավինես Եհովային, նա քեզ կտա «սովորականին գերազանցող ուժը», որպեսզի չսայթաքես (2 Կորնթացիներ 4։7; 1 Պետրոս 5։1)։
Մկրտվելով դու դառնում ես Եհովայի վկա (Եսայիա 43։10)։ Այս քայլը պետք է վճռորոշ դեր խաղա ողջ կյանքիդ ընթացքում, քանի որ նվիրումը ներառում է անձնուրացություն (Մատթեոս 16։24)։ Գուցե նկատես, որ անհրաժեշտ է հրաժարվել որոշ անձնական նպատակներից ու ցանկություններից և «նախ թագավորությունը.... փնտրել» (Մատթեոս 6։33)։ Նվիրումն ու մկրտությունը այդպես վարվելու լայն հնարավորություններ են բացում քո առաջ։ Քննենք դրանցից մի քանիսը։
Աստծուն լիաժամ ծառայելու հնարավորություններ
● Ռահվիրայությունը այդ հնարավորություններից մեկն է։ Ռահվիրան մկրտված և օրինակելի վարք ունեցող այն քրիստոնյան է, որը ամսական առնվազն 70 ժամ հատկացնում է բարի լուրի քարոզչությանը։ Շատ ժամանակ անցկացնելով ծառայության մեջ՝ դու քարոզելու և աշակերտներ պատրաստելու գործում ավելի կհմտանաս։ Շատ ռահվիրաներ մեծ ուրախություն են ապրել, երբ տեսել են, թե ինչպես է մկրտվել այն մարդը, ում նրանք օգնել են Աստվածաշունչ ուսումնասիրել։ Ուրիշ ո՞ր աշխատանքը կարող է այսքան բավականություն պատճառել։
Իրենց կարիքները հոգալու համար շատ ռահվիրաներ աշխատում են ոչ լրիվ աշխատանքային օր։ Ոմանք դպրոցական տարիներին մասնագիտական դասընթացներ են անցնում կամ ծնողներից արհեստ են սովորում։ Գուցե դու և ծնողներդ այն կարծիքին եք, որ օգտակար կլինի դպրոցն ավարտելուց հետո շարունակել ուսումդ։ Այդ դեպքում քննիր, թե որն է քո նպատակը՝ շատ փող աշխատելը, թե բավարար միջոցներ վաստակելը լիաժամ ծառայելու համար։
Ռահվիրայի կյանքը կենտրոնացած է ոչ թե իր աշխատանքի, այլ իր ծառայության՝ ուրիշներին փրկության տանող ճանապարհը ցույց տալու վրա։ Ինչո՞ւ ռահվիրայական ծառայությունը չդարձնես քո նպատակը։ Ռահվիրայությունը հաճախ նոր առանձնաշնորհումների դուռ է բացում։ Օրինակ՝ որոշ ռահվիրաներ տեղափոխվում են այնպիսի վայրեր, որտեղ Թագավորության քարոզիչների կարիք կա։ Մյուսներն էլ օտար լեզու են սովորում և ծառայում են տեղի օտարախոս ժողովում կամ մեկնում են ուրիշ երկիր ծառայելու։ Այո՛, ռահվիրայությունը բավարարվածության զգացումով է լցնում մարդու կյանքը։
● Թագավորության քարոզիչների դպրոցը հնարավորության մեկ այլ դուռ է։ Երկու ամիս տևող այս դասընթացի նպատակն է կրթել փորձառու ռահվիրաներին, ովքեր ցանկանում են ծառայել հեռավոր վայրերում՝ այնտեղ, որտեղ ավելի մեծ կարիք կա։ Իրենց պատրաստակամությամբ նրանք կարծես ասում են. «Ահա՛ ես, ի՛նձ ուղարկիր»՝ ընդօրինակելով երկրի վրա երբևէ ծառայած մեծագույն Ավետարանչին՝ Հիսուս Քրիստոսին (Եսայիա 6:8; Հովհաննես 7:29)։ Տնից հեռու քարոզիչները գուցե ստիպված լինեն ապրել ոչ այնքան հարմարավետ պայմաններում։ Մշակույթը, կլիման և ուտելիքը հնարավոր է բոլորովին տարբեր լինի նրանից, ինչին իրենք սովոր են։ Գուցե հարկ լինի նաև նոր լեզու սովորել։ Այս դպրոց հրավիրվողները՝ 23–65 տարեկան ամուրի եղբայրներն ու քույրերը, ինչպես նաև ամուսնական զույգերը, սովորում են հոգևոր հատկություններ զարգացնել, որոնք պետք կգան իրենց նշանակումներում, և ձեռք են բերում այնպիսի հմտություններ, որոնց շնորհիվ ավելի մեծ ներդրում կունենան Եհովայի ծառայության և կազմակերպության գործունեության մեջ։
● Բեթելի ծառայությունը կամավոր ծառայություն է Եհովայի վկաների մասնաճյուղերից որևէ մեկում։ Բեթելի ընտանիքի անդամներից ոմանք անմիջականորեն առնչվում են աստվածաշնչյան գրականության հրատարակմանը։ Մյուսներն էլ այս կամ այն կերպ աջակցում են այդ գործին, օրինակ՝ զբաղվում են շենքերի կամ մեխանիզմների տեխնիկական սպասարկմամբ, կամ ընտանիքի կարիքները հոգալով։ Ինչ բնույթ էլ որ կրի Բեթելում ծառայողի աշխատանքը, այն Եհովային մատուցվող սուրբ ծառայություն է։ Բացի դրանից, բեթելցիներին ուրախություն է պատճառում այն միտքը, որ իրենց աշխատանքը մեծ օգուտներ է բերում համաշխարհային եղբայրությանը։
Երբեմն Բեթելում ծառայելու են հրավիրվում կոնկրետ մասնագիտություն ունեցող եղբայրներ։ Սակայն մեծ մասամբ հրավիրվածները Բեթելում են մասնագիտություն ձեռք բերում։ Այստեղ ծառայողները նյութական նպատակներ չեն հետապնդում, նրանք բավարարվում են այն կերակուրով, կացարանով և համեստ գումարով, որը տրվում է իրենց անձնական կարիքները հոգալու համար։ Մի երիտասարդ բեթելցի իր ծառայության մասին ասում է. «Այս ծառայությունը հրաշալի է։ Թեև գրաֆիկը ծանր է, սակայն օրհնություններն էլ շատ են»։
● Շինարարական ծառայությունը հնարավորություն է տալիս մասնակցելու մասնաճյուղերի և Թագավորության սրահների շինարարությանը։ Այս ծառայությունը կատարողները, կամ՝ շինարարական ծառայողները, օգնում են այսպիսի շինություններ կառուցելու գործում։ Սա նույնպես սուրբ ծառայություն է՝ նման Սողոմոնի օրերում տաճարը կառուցողների կատարած գործին (1 Թագավորներ 8։13–18)։ Շինարարական ծառայողների կարիքները հոգ են տարվում նույն կերպով, ինչպես բեթելցիներինը։ Այս ծառայությունը իսկապես մեծ առանձնաշնորհում է այն եղբայրների և քույրերի համար, ովքեր իրենց մասնակցություն են բերում՝ այս ոլորտում Եհովային փառք բերելով։
Ծառայիր Եհովային ողջ սրտով
Եհովային ծառայելը կյանքի լավագույն ուղին է։ Ուստի Աստծուն լիաժամ ծառայելու նպատակ դիր։ Քննարկիր այս հարցը ծնողներիդ, ժողովի երեցների և շրջանային վերակացուի հետ։ Եթե հետաքրքրված ես Բեթելի ծառայությամբ կամ ուզում ես սովորել Թագավորության քարոզիչների դպրոցում, մասնակցիր տարածաշրջանային համաժողովի ժամանակ անցկացվող համապատասխան հանդիպումներին։
Ճիշտ է, բոլոր չէ, որ ի վիճակի կամ համապատասխան կլինեն ծառայելու լիաժամ։ Երբեմն առողջական խնդիրները, ֆինանսական վիճակը կամ ընտանեկան պարտականությունները կարող են սահմանափակել ծառայելու քո հնարավորությունները։ Այդուհանդերձ, բոլոր նվիրված քրիստոնյաները պետք է հետևեն Աստվածաշնչի հետևյալ պատվերին. «Սիրի՛ր քո Աստված Եհովային քո ամբողջ սրտով, քո ամբողջ հոգով և քո ամբողջ մտքով» (Մատթեոս 22։37)։ Եհովան պահանջում է, որ մենք մեր հնարավորությունների սահմանում անենք լավագույնը։ Ուստի ինչ հանգամանքներ էլ որ ունենաս, Եհովային ծառայելը քո կյանքի գլխավոր նպատակը դարձրու։ Հասանելի հոգևոր նպատակներ դիր և «հիշիր քո Մեծ Արարչին երիտասարդությանդ օրերում»։ Համոզված եղիր՝ դա հավիտենական օրհնություններ կբերի։
Եթե այլ կերպ նշված չէ, աստվածաշնչյան մեջբերումները արված են «Նոր աշխարհ» թարգմանությունից։