Ներկայիս Աստուածաշունչը կրնա՞յ օգնել մեզի
«ԱՄԲՈՂՋ Աստուածաշունչին շուրջ մէկ տոկոսը ընթերցանութեան արժանի է, իսկ մնացեալը անգործնական եւ ժամանակավրէպ է»։ Այսպէս արտայայտուեցաւ երիտասարդ մը եւ շատեր հաւանաբար համամիտ են ասոր։ Թէեւ համայն աշխարհի մէջ Աստուածաշունչը կը շարունակէ բարձրագոյն տպաքանակ ունեցող գիրքը ըլլալ, միլիոնաւոր անհատներ շատ քիչ ուշադրութիւն կ’ընծայեն անոր ու անոր ուսուցումներուն ծանօթ չեն։
1996–ի Ծննդեան տօնի իր հրատարակութեան մէջ, Սիւտտոչը Ցայթունկ գերմանական օրաթերթը ըսաւ թէ Աստուածաշունչ «ընթերցողներուն թիւը երթալով կը նուազի։ Գիտութեան եւ հետզհետէ աւելցող աշխարհականացման այս դարուն մէջ, Աստուածաշունչի դրուագները շատերուն համար տարօրինակ եւ դժուարիմաց կը թուին»։ Փորձագիտանքները այս տեղեկագրութիւնը կը հաստատեն։ Կարգ մը ուսումնասիրութիւններ կը յայտնեն թէ երախաներէն շատեր նոյնիսկ չեն գիտեր թէ իսկապէս ով է Յիսուս։ Ըստ փորձագիտանքի մը, հարցազրոյցի մասնակցողներուն կէսէն նուազը կրցաւ Աստուածաշունչի անառակ որդիին եւ բարի Սամարացիին պատմութիւնները պատմել։
Զուիցերիոյ Աւետարանչական Եկեղեցւոյ Րեֆորմիրթը Ֆօրում հրատարակութիւնը ըսաւ թէ Զուիցերիոյ մէջ Աստուածաշունչի պահանջքը առաջուան պէս չէ։ Աստուածաշունչ մը ունեցողներէն ոմանց պարագային իսկ անոր վրայ յաճախ փոշի դիզուած կ’ըլլայ։ Անգլիոյ մէջ ալ պարագան նոյնն է։ Փորձագիտանքի մը համաձայն, թէեւ մարդոց մեծամասնութիւնը Աստուածաշունչ մը ունի, բայց մեծ մասը զայն բնաւ չի կարդար։
Միւս կողմէ, համայն աշխարհի մէջ միլիոնաւոր անհատներ Աստուածաշունչը տարբեր աչքով կը դիտեն։ Զայն Աստուծոյ Խօսքը կը նկատեն եւ արժէքաւոր ու օգտակար կը սեպեն։ Հետեւաբար, զայն կանոնաւորաբար կը կարդան։ Երիտասարդ կին մը գրեց. «Ամէն օր կը փորձեմ Աստուածաշունչէն մէկ կամ երկու գլուխ կարդալ։ Անկէ շատ հաճոյք կ’առնեմ»։ Այսպիսի անհատներ Աստուածաշունչի ուսուցումները լուրջի կ’առնեն եւ կը փորձեն անոր խրատները իրենց կեանքին մէջ կիրարկել։ Անոնք կը հաւատան թէ Աստուածաշունչը կրնայ օգնել իրենց ներկայ խռովեալ աշխարհին մէջ։
Ի՞նչ է ձեր կարծիքը։ Աստուածաշունչը արդի ժամանակներուն համար անգործնակա՞ն է, թէ ոչ արժէքաւոր ու օգտակար է։ Ներկայիս Աստուածաշունչը կրնա՞յ օգնել մեզի։