Ջերմօրէն հրաւիրուած էք

ՇՈՒՐՋ 2,000 տարի առաջ, Տէր Յիսուս Քրիստոսի հաստատած Վերջին Ընթրիքը պատմական կարեւորութիւն ունեցող դէպքէ մը աւելի արժէք ունի։ Հաստատուելէն ի վեր, անիկա մարդոց վրայ զօրաւոր ազդեցութիւն մը ունեցած է։ Այդ գիշերուան դէպքերուն մասին Աւետարաններուն մէջ իրենց կարդացած բաներէն ազդուած, շատեր ջանացած են Տիրոջ Ընթրիքը զանազան կերպերով յիշատակել։

Այս ամէնը հասկնալի է, քանի որ Յիսուս Քրիստոս անձամբ պատուիրեց որ իր հետեւորդները զայն կանոնաւորաբար տօնակատարեն։ Ան յատկապէս անոնց ըսաւ. «Ասիկա ըրէք զիս յիշելու համար»։—Ղուկաս 22։19. Ա. Կորնթացիս 11։23-25

Անշուշտ, այս տօնակատարութիւնը վարձահատոյց փորձառութիւն մը ըլլալու համար, անհատ մը անոր իմաստին մասին Աստուծոյ Խօսքին՝ Աստուածաշունչին՝ հայթայթած ճշգրիտ գիտութիւնը պէտք է ունենայ։ Ասկէ զատ, կարեւոր է գիտնալ թէ Աստուածաշունչը ի՛նչ կ’ըսէ այս դէպքը տօնակատարելու ժամանակին եւ կերպին մասին։

Յիսուս Քրիստոսի պատուէրին հնազանդելով, Եհովայի Վկաները համայն աշխարհի մէջ պիտի հաւաքուին Չորեքշաբթի՝ 16 Ապրիլ 2003–ին, Յիսուսի մահուան յիշատակատօնը տօնելու համար։ Անիկա Սուրբ Գիրքը քննելու եւ Տէր Յիսուս Քրիստոսի հանդէպ իրենց հաւատքն ու սէրը վերանորոգելու առիթ մը պիտի ըլլայ, որ ըսաւ. «Աստուած այնպէս սիրեց աշխարհը, մինչեւ իր միածին Որդին տուաւ, որպէս զի ամէն ո՛վ որ անոր հաւատայ՝ չկորսուի, հապա յաւիտենական կեանք ունենայ»։ (Յովհաննու 3։16) Ջերմօրէն հրաւիրուած էք որ այդ երեկոյ անոնց հետ ժողվուիք, որպէսզի դուք ալ Յիսուս Քրիստոսի ու երկնաւոր Հօր՝ Եհովա Աստուծոյ հանդէպ ձեր հաւատքն ու սէրը զօրացնէք։