Ջանանք Ներկայացնել Աշխարհի Մէջ Եղած Լաւագոյն Պարբերաթերթերը
1 Դիտարանին նշուած նպատակն է՝ «Եհովա Աստուածը փառաբանել որպէս տիեզերքին Գերիշխանը»։ Իսկ Զարթի՛րը «ամբողջ ընտանիքին լուսաւորութեան համար է։ . . . Այս պարբերաթերթը վստահութիւն կը կերտէ Ստեղծիչին խոստումին վրայ, խաղաղ եւ ապահով նոր աշխարհի մը նկատմամբ»։ Այս մէջբերումները ուղղակի պարբերաթերթերէն են։ Այս նպատակակէտերը հետապնդելը զանոնք դարձուցած է մխիթարութեան աղբիւր մը միլիոնաւոր ընթերցողներուն համար։
2 Այս պարբերաթերթերը աչքառու պիտի դարձնենք մեր ծառայութեան մէջ Ապրիլ եւ Մայիս ամիսներուն ընթացքին։ Ազդեցիկ ըլլալու համար, հարկ կայ որ քաջածանօթ ըլլանք անոնց բովանդակութեան հետ։ Իւրաքանչիւր թիւ կարդացէք, նկատելով կէտեր զորս կրնաք գործածել։ Խորհեցէք թէ ի՛նչ բան մարդիկ կը մտահոգէ։ Ընկերային, ընտանեկան կամ զգացական ի՞նչ հարցեր կը տիրեն ձեր դրացիներուն մեծամասնութեան մտածմունքին վրայ։ Փորձեցէք մտածել թէ ի՛նչ բան կրնաք ըսել որ անոնց խորապէս պիտի ազդէ եւ աւելի սորվելու փափաք պիտի արթնցնէ։
3 Ջանանք Ցցուն Ընել Ապրիլ 1 Դիտարանը. Մարդոց մեծամասնութիւնը կը տենչայ աւելի լաւ աշխարհի մը որ զերծ է այն շատ մը խնդիրներէն որոնք ներկայիս յաճախ կը խլեն իրենց ուրախութիւնը։
Դուք ձեզ ծանօթացնելէ ետք, կրնաք ըսել.
◼ «Գրեթէ բոլոր գաղափարախօսութիւնները կը պնդեն որ մարդը պէտք է աշխարհը ծրագրէ իր գիտութեան համաձայն, որպէսզի յուսացուած դրախտը հաստատէ երկրագունդին վրայ։ Այսպիսի աւելի լաւ աշխարհ մը շուտով իրականութիւն մը կրնա՞յ ըլլալ։ [Թոյլ տուէք որ պատասխանէ։] Մեր աշխարհը այսօր վստահաբար իտէալական վայր մը չէ։ Սակայն, նկատեցէք ինչ որ Սաղմոս 37։11–ը կ’ըսէ ապագային մասին»։ Համարը կարդալէ ետք, տանուտիրոջ հարցուցէք թէ ինչպէ՛ս կը զգայ այս խոստումին հանդէպ։ Նոր աշխարհ մը երբեք երազ մը չէ։ Յիսուս սորվեցուց թէ հեզերը պիտի ժառանգեն երկիրը։ Կարդացէք Մատթէոս 5։5–ը։ Ապա խոստացէք մի քանի օրուայ ընթացքին Ապրիլ 1 թիւը (Արաբ.) բերել, «Աւելի Լաւ Աշխարհ մը—Մօ՜տ Է» յօդուածը նկատի առնելու, էջ 4։
4 Ջանանք Ցցուն Ընել Ապրիլ 15 Դիտարանը. Մարդկութեան վիճակը կը փաստէ սա խօսքին ճշմարտութիւնը. «Գիտեմ, ո՛վ Տէր, թէ մարդուն ճամբան իր ձեռքը չէ, քալող մարդը իր քալուածքը շտկելու կարող չէ»։
Դուք ձեզ ծանօթացնելէ ետք, կրնաք ըսել.
◼ «Ներկայիս աշխարհի մէջ շատ խնդիրներ կան, ինչպէս՝ [յիշեցէք բան մը որ ներկայիս ընկերութիւնը կը մտահոգէ կամ աչքառու լուր մը]։ Հարց կու տա՞ք թէ ոեւէ անհատ կրնա՞յ միջոց մը գտնել այս վիճակէն դուրս ելլելու համար։ [Թոյլ տուէք որ պատասխանէ։] Բարեբախտաբար, Բ. Տիմոթէոս 3։16, 17–ն մեզ կը վստահեցնէ որ Աստուածաշունչը կ’առաջնորդէ ուրախ ու ապահով կենցաղի մը»։ Այս համարները կարդալէ ետք հարցուցէք. «Ինչո՞ւ Աստուածաշունչը առաջնորդութեան վստահելի աղբիւր մըն է»։ Կարդացէք Եսայեայ 46։9, 10։ Ապա խոստացէք մի քանի օրուայ ընթացքին Ապրիլ 15 թիւը (Արաբ.) բերել, «Ո՞ւր Կրնաք Վստահելի Առաջնորդութիւն Գտնել» յօդուածը նկատի առնելու, էջ 4։
5 Եթէ կը նախընտրէք Զարթի՛րը ներկայացնել, կրնաք Մայիս 8 թիւէն մի քանի կէտեր գործածել եւ անոր «Իրակա՞ն Յոյս մը Պզտիկներու Համար» յօդուածը։ Հաւանաբար պիտի տեսնէք թէ ծնողներ կը գիտակցին զաւակներուն կարիքներուն եւ կ’ուզեն գիտնալ թէ ի՛նչ կարելի է ընել անոնց օգնելու։
6 Եթէ խանդավառ ենք մեր պարբերաթերթերուն նկատմամբ, որոնք լաւագոյնն են աշխարհի մէջ, պիտի ջանանք անոնցմէ մէջբերումներ ընել եւ զանոնք տեղաւորել ուրիշներու հետ, այնպէս որ անոնք ալ կարենան Թագաւորութեան յոյսը ընդունիլ ու բաժին բերել Եհովան փառաբանելուն մէջ որպէս տիեզերքի Գերիշխան Տէրը։—Սաղմ. 83։18