«Աստուծոյ Ընդունելի Ապրելակերպը» Բնաբանով Նահանգային Համաժողովներէն Օգտուեցանք

¹ Միայն քանի մը ամիս առաջ, «Աստուծոյ Ընդունելի Ապրելակերպը» բնաբանով 1998–ի Նահանգային եւ Միջազգային Համաժողովներուն ներկայ գտնուելու ծրագիրներ կ’ընէինք։ Իսկ հիմա, անոնք կազմակերպութեան աստուածպետական պատմութեան յատկանշելի մէկ դէպքը եղան։ Այդ արտասովոր հաւաքոյթներուն մեր ձեռք ձգած հոգեւոր ճոխ սնունդը լիովին վայելեցինք։

² Այս տարուան նահանգային համաժողովներուն միջազգային երեսակ ունենալը իրապէս խայտալի էր։ Մեր յաճախած համաժողովին միսիոնարներ կամ օտար երկիրներէ եկած պատուիրակներ կային կամ ոչ, բոլորս ալ հոյակապ փորձառութիւններ լսեցինք Ուրբաթ յետ միջօրէի բաժիններէն մէկուն մէջ, որու խորագիրն էր՝ «Միսիոնարական Դաշտի Մէջ Ծառայել»։ Իւրաքանչիւր օր ներկայացուած «Հունձքի Գործին Յառաջդիմութեան Մասին Տեղեկագրութիւններ»ը չափազանց քաջալերական էր։

³ Սքանչելի Նոր Հրատարակութիւններ. Ուրբաթ օրուան փակման դասախօսութիւնը, ճշմարտութիւնը չճանչցող անհամար մարդոց կողմէ հարցուած՝ «Մահուընէ Ետք Կեանք Կա՞յ» հարցումին պատասխանեց։ Այդ չափազանց հետաքրքրական դասախօսութիւնը եզրափակուեցաւ նոր գրքոյկի մը լոյս տեսնելով, որու խորագիրն է՝ Ի՞նչ կը Պատահի Մեզի Երբ կը Մեռնինք։ Կասկած չկայ որ հիմա զայն կարդացած ենք եւ կրնանք տեսնել թէ անիկա որքա՛ն արժէքաւոր պիտի ըլլայ՝ մարդոց օգնելու որ մեռելներու վիճակին մասին ճշմարտութիւնը սորվին, ինչպէս նաեւ սգաւորները յարութեան յոյսով մխիթարելու։

⁴ Շաբաթ յետ միջօրէի յայտագրին փակման դասախօսութիւնն էր՝ «Ստեղծիչը. Անոր Անձնաւորութիւնը եւ Ճամբաները»։ Անիկա մեզ տրամաբանականօրէն առաջնորդեց այն եզրակացութեան յանգելու թէ Ստեղծիչ մը անպայման գոյութիւն ունի։ Ուրիշներուն օգնելու համար որ այս իրողութիւնը գնահատեն՝ Մեզի Հոգ Տանող Ստեղծիչ մը Կա՞յ խորագրով գիրքը լոյս տեսաւ։ Թէեւ այս գիրքը Եհովայի հանդէպ մեր հաւատքը եւ իր անձնաւորութեան ու ճամբաներուն հանդէպ մեր գնահատութիւնը կ’աւելցնէ, բայց անիկա մասնաւորաբար ծրագրուած է անոնց համար, որոնք ուսման բարձր մակարդակ ունենալով հանդերձ, Աստուծոյ գոյութեան չեն հաւատար։

⁵ Սրտանց Որդեգրուած Որոշում մը. Համաժողովի վերջին դասախօսութիւնը շեշտեց որ բոլորս ալ ‘Շարունակենք Եհովայի Ճամբուն Մէջ Քալել’։ Որքա՜ն տեղին էր հրապարակաւ թիկունք կանգնիլ այն որոշումին, թէ անհատապէս վճռած ենք յարատեւ կառչիլ, ջատագովել եւ յառաջ մղել Աստուծոյ ընդունելի ապրելակերպին գերակայ ըլլալը։ (Եսայ. 30։21) Հիմա պէտք է հաստատամիտ ըլլանք այդ որոշումին համաձայն ապրելու։ «Աստուծոյ Ընդունելի Ապրելակերպը» Նահանգային Համաժողովին ներկայ գտնուելով, հոգեւորապէս որքա՜ն կերտուեցանք։