Վկայութիւն Տուէք Որպէս Լաւ Դրացի մը

¹ Յիսուս ըսաւ «քու ընկերդ [«դրացիդ», ՆԱ] սիրես քու անձիդ պէս»։ (Մատթ. 22։39) Անկասկած, ձեր հաւատակիցներուն ‘բարիք կ’ընէք’, սակայն, կրնա՞ք ձեր սէրը ընդլայնել ձեր շուրջը ապրող մարդոց հանդէպ։ (Գաղ. 6։10) Ի՞նչ կերպերով։

² Դուք Ձեզ Ճանչցնելով. Ձեր դրացիները գիտե՞ն թէ դուք Վկայ էք։ Եթէ չեն գիտեր, ինչո՞ւ անոնց այցելութիւն մը չտաք դաշտի ծառայութեան ընթացքին։ Արդիւնքները կրնան զարմացնել ձեզ։ Իսկ եթէ աւելի հանգիստ կը զգաք, փորձեցէք անպաշտօն կերպով անոնց վկայել։ Երբ ձեր տունէն դուրս ըլլաք, թերեւս տեսնէք թէ անոնք իրենց պարտէզին մէջ կ’աշխատին կամ ժամանակ կ’անցընեն փողոցը քալելով։ Ջերմ ժպիտով մը անոնց մօտեցէք։ Ջանացէք անոնց հետ խօսակցիլ ձեր հաւատալիքներուն մասին, Թագաւորութեան Սրահին վայրին եւ հոն տեղի ունեցող բաներուն մասին, եւ անոնց ըսէք թէ թաղին մէջ որո՛նք հոն ներկայ կը գտնուին։ Զանոնք ժողովներուն հրաւիրեցէք։ Վճռեցէք բարի լուրին մասին ամբողջական վկայութիւն մը տալ, որու որ կը ճանչնաք։—Գործք 10։42. 28։23

³ Ձեր Օրինակելի Վարքով. Ձեր դրացիական վարմունքը ձեր մասին շատ բան կը խօսի եւ վկայութիւն մը տալու համար կրնայ ճամբան հարթել։ Անիկա նաեւ ‘Աստուծոյ վարդապետութիւնը կը զարդարէ’։ (Տիտ. 2։7, 10) Ձեր դրացիներուն հանդէպ անկեղծ հետաքրքրութիւն ցուցաբերեցէք։ Բարեկամական եւ կարեկից եղէք։ Առանձնութիւն եւ հանդարտութիւն վայելելու անոնց իրաւունքը յարգեցէք։ Եթէ անոնցմէ մէկը հիւանդանայ, նկատառու եղէք եւ օգնութիւն առաջարկեցէք։ Երբ նոր ընտանիք մը ձեր թաղը փոխադրուի, անոնց կարճ այցելութիւն մը տուէք եւ բարի գալուստ մաղթեցէք։ Այսպիսի ազնիւ արարքներ նպաստաւոր տպաւորութիւն մը կը ձգեն եւ Եհովայի հաճելի են։—Եբր. 13։16

⁴ Ձեր Ինչքերուն Երեւոյթով. Լաւ դրացի մը ըլլալը կը պարփակէ ձեր տան հոգ տանիլ, որպէսզի անիկա ներկայանալի ըլլայ։ Մաքուր ու գրաւիչ տուն մը եւ պարտէզ մը, ինքնին վկայութիւն մըն են։ Սակայն, տուն մը որ աղտոտ է, կամ ասդին անդին նետուած անպէտ իրեր ունի, շատ հաւանաբար Թագաւորութեան պատգամէն ուշադրութիւնը հեռացնէ։ Հետեւաբար, շատ կարեւոր է որ ձեր տունը, պարտէզը եւ ինքնաշարժները մաքուր եւ լաւ վիճակի մէջ պահէք։

⁵ Քրիստոնէական ժողովքէն դուրս գտնուող անհատներուն հանդէպ հետաքրքրութիւն ցուցաբերելը, ձեր դրացիներուն հանդէպ սէր ցոյց կու տայ։ Արդիւնքը ի՞նչ կրնայ ըլլալ։ Թերեւս «ձեր բարի գործերը տեսնելով», անոնցմէ ոմանք «փառաւորեն Աստուած»։—Ա. Պետ. 2։12