Լուսաբանող եւ Ոգեւորող Պատկերիզ մը
1951–ի Ապրիլն էր։ Նախկին Սովետական Միութեան մէջ հազարաւոր Եհովայի Վկաներ՝ լման ընտանիքներ՝ զանազան վայրերէն բերուեցան, եւ գոց կառքերու մէջ դրուելէ ետք, Սիպերիա աքսորուեցան։ Սովետական հզօր կառավարութիւնը ինչո՞ւ վճռած էր զանոնք ճզմել։ Մեր եղբայրները ի՞նչպէս վերապրեցան եւ նոյնիսկ բարգաւաճեցան, ի հեճուկս տասնամեակներ տեւող բիրտ հալածանքին։ Ասոնց պատասխանը պիտի գտնէք Հաւատարիմ՝ Փորձութիւններու Ներքեւ—Եհովայի Վկաները Սովետական Միութեան Մէջ խորագրով պատկերիզին մէջ։ Զայն դիտեցէք եւ թոյլ տուէք որ անոր տեղեկատու պատգամը ձեզ մղէ որ Եհովայի հանդէպ ձեր հաւատարմութիւնը ամէն գնով պահպանէք։
Կրնա՞ք հետեւեալ հարցումներուն պատասխանել։ (1) Եհովայի Վկաները առաջին անգամ ե՞րբ օրինական ճանաչում ստացան Ռուսաստանի մէջ։ (2) Բ. Աշխարհամարտէն առաջ եւ ետք, Սովետական Միութեան մէջ Վկայ ընտանիքներու թիւը ի՞նչպէս աւելցաւ։ (3) Անոնց հաւատալիքները ի՞նչպէս Լենինի փիլիսոփայութեան բոլորովին հակառակ էին։ (4) Ի՞նչ էր Հիւսիսի Գործողութիւնը, եւ անոր միջոցաւ Սթալին ի՞նչ յուսաց իրագործել։ (5) Վկաներուն համար աքսորը ի՞նչ նշանակեց, եւ անոնց ի՞նչ ըսուեցաւ որ ընեն չաքսորուելու համար։ (6) Սիպերիա տանող երկար ճամբուն վրայ, մեր եղբայրներն ու քոյրերը ի՞նչպէս զիրար քաջալերեցին եւ զիրենք աքսորողները անակնկալի բերին։ (7) Վկաները Սիպերիոյ մէջ ի՞նչ թշուառութիւններու տոկացին։ (8) Եհովայի ժողովուրդը ո՞ր հոգեւոր հայթայթումը մեծապէս արժեւորեց, եւ ինչո՞ւ։ (9) Մեր եղբայրները ինչո՞ւ յօժար էին իրենց կեանքը վտանգելու իրենց գրականութիւնները ստանալու համար, եւ անոնք Վկաներուն ձեռքը չանցնելու համար իշխանութիւններու անխոնջ ջանքերը ի՞նչպէս ձախողութեան մատնուեցան։ (10) Խրուշչով ի՞նչպէս Աստուծոյ ժողովուրդին վրայ յարձակումը շարունակեց։ (11) Իշխանութիւնները ի՞նչպէս փորձեցին Վկաներու զաւակներուն հաւատքը բեկանել։ (12) Մեր եղբայրները ի՞նչ յստակ հասկացողութիւն ունէին իրենց հալածանքին պատճառին մասին։ (2002–ի Տարեգիրք, էջ 203-204) (13) Աստուծոյ կազմակերպութեան վրայ եղած ամբողջական յարձակումը ի՞նչպէս հալածիչներուն ակնկալածին հակառակ արդիւնքը տուաւ։ (2002–ի Տարեգիրք, էջ 220-221) (14) Ի՞նչ բաներ իրագործուեցան, որոնք նախկին Սովետական Միութեան մէջ ապրող Վկաներուն համար ատեն մը միայն երազ մըն էին։ (15) Ի՞նչ բան մեր եղբայրներուն օգնեց որ իրենց փորձութիւններէն յաղթական դուրս գան, եւ պատկերիզին վերջին տեսարանը ի՞նչպէս ապացուցանեց Երեմեայ 1։19–ի խօսքերուն ճշմարիտ ըլլալը։ (16) Պատմեցէք փորձութեան ներքեւ հաւատարմութիւն ցուցաբերած անհատի մը կենսագրութիւնը, որ յատկապէս ձեզ կ’ոգեւորէ։