Հանգստեան Կոչուիլը՝ Յաւելեալ Գործունէութեան Առաջնորդող Դո՞ւռ մըն Է

¹ Ծանր աշխատող անհատներէն շատեր կը տենչան այն ժամանակին, երբ հանգստեան կոչուելով պիտի ձերբազատուին աշխարհիկ գործի յոգնութենէն ու ճնշումներէն։ Սակայն, շատ յաճախ հանգստեան կոչուիլը կ’առաջնորդէ անհոգութեան, ձանձրոյթի եւ կանխահաս ծերութեան։ Նպատակալից գործունէութեան բացակայութիւնը կրնայ պատճառ ըլլալ որ միտքը անձնական մտահոգութիւններով զբաղի։ Պրազիլիական լրագիր մը տեղեկագրեց թէ հանգստեան կոչուած պետական պաշտօնեաներ կը տառապէին շարք մը խնդիրներէ, ինչպէս՝ ‘դժգոհութիւն, զայրացկոտութիւն, անապահովութիւն, ինքնութեան կորուստ, նոյնիսկ ընկճուածութիւն եւ զգալ թէ իրենց աշխարհը փուլ կու գայ’։

² Ընդհակառակը, Քրիստոնեաներէն շատեր իրենց կեանքին այս հանգրուանը հոգեւոր յաւելեալ գործունէութեան առաջնորդող դուռ մը կը նկատեն։ Եղբայր մը, որ 65 տարեկան ըլլալէն երկու շաբաթ ետք ռահվիրայութեան սկսաւ, ըսաւ. «Կեանքիս մէջ երբեք չեմ ունեցած ռահվիրայութեանս տասը տարիներուն նման ա՛յսքան առատ օրհնութիւններով լեցուն ժամանակաշրջան մը»։ Ամոլ մը գրեց. «Մեր ծերութեան լաւագոյն տարիները սկսան, երբ ռահվիրայութեան ձեռնարկեցին»։ Այո, շատերու համար, հանգստեան կոչուիլը իրենց ծառայութիւնը ընդարձակելու եւ Եհովայէ ճոխ օրհնութիւններ վայելելու հոյակապ պատեհութիւն մը կը ներկայացնէ։

³ Զբաղած ու Արդիւնաբեր Ըլլալ. Այժմ հանգստեան կոչուած անհատներէն շատեր, առանց ներկայ կեանքի հանգստաւէտութիւնը ունենալու մեծցած են եւ կանուխ տարիքէն սկսած են ծանր աշխատիլ։ Թէեւ անոնք այլեւս երիտասարդական կորովը չունին, բայց տակաւին շատ արդիւնաբեր աշխատողներ են։ Մասնաճիւղի մը թաղամասին մէջ, ռահվիրաներուն 22 տոկոսը,– շուրջ 20,000 եղբայրներ ու քոյրեր,– առնուազն 60 տարեկան են։ Այս տարեցները քարոզչութեան գործին մեծ նպաստ կը բերեն։ Անոնց փորձառութիւնն ու բարեպաշտ յատկութիւնները, իրենց ընկերակցած ժողովքները կը ճոխացնեն։—Յակ. 3։17, 18

⁴ Քրիստոնէական ծառայութեան մէջ զբաղած մնալը առողջութեան կը նպաստէ ու կեանքի որակը կը բարելաւէ։ 84 տարեկան քոյր մը, որ հանգստեան կոչուելէ ետք ռահվիրայութեան սկսաւ, կ’ըսէ. «Հետաքրքրուած անհատներու հետ Աստուածաշունչի շատ մը ուսումնասիրութիւններ ունենալը, ինծի օգնած է որ մտային գետնի վրայ գործունեայ մնամ։ Ինքնաշարժ չունիմ, ուստի շատ կը քալեմ։ Ասիկա զիս առողջ կը պահէ»։ Տարեց ռահվիրայ ամոլ մը ըսաւ. «Ծառայութիւնը մեր մտային ու ֆիզիքական առողջութիւնը կը պահէ։ Մենք միշտ միասին ենք։ Յաճախ կը խնդանք ու կեանքը կը վայելենք»։

⁵ Ծառայել Հո՛ն Ուր Կարիք Կայ. Հանգստեան կոչուած կարգ մը Քրիստոնեաներ, որոնք նիւթական նպաստաւոր պայմաններ ունին, փոխադրուած են հո՛ն ուր Թագաւորութեան քարոզիչներու աւելի կարիք կայ։ Ուրիշներ իրենց ծառայութիւնը ընդարձակած են, օտարախօս դաշտի մը մէջ ծառայելով։ Պօղոս առաքեալին նման, այս նախանձախնդիր հրատարակիչները ‘այս բոլորը կ’ընեն՝ Աւետարանին սիրոյն, որպէսզի անոր տարածման իրենց մասնակցութիւնը բերած ըլլան’։—Ա. Կորն. 9։23, Անթիլիաս

⁶ Ամոլ մը իր երկու տղաքները մեծցնելէ ետք, ռահվիրայութեան ձեռնարկեց։ Քանի մը տարի ռահվիրայութիւն ընելէ ետք, անոնք որոշեցին Չինարէն լեզուն սորվիլ։ Այժմ 70–ական տարիքի մէջ ըլլալով, անոնք վերջերս ուրախացան, երբ իրենց ընկերակցած Չինարէն խօսող խումբը ժողովք մը եղաւ։ Ասոնց նման ամոլներ ի՜նչ օրհնութիւն մը եղած են։

⁷ Ծառայութենէն Հանգստեան Կոչուիլ Չկայ. Թէեւ մարդոց մեծամասնութիւնը իր աշխարհիկ գործէն հանգստեան կը կոչուի, սակայն ոեւէ Քրիստոնեայ Աստուծոյ ծառայութենէն հանգստեան չի կոչուիր։ Բոլորը պէտք է շարունակեն «մինչեւ վերջ» հաւատարիմ մնալ։ (Մատթ. 24։13, 14) Անշուշտ, յառաջացած տարիքի պատճառաւ, ոմանք կարող չեն առաջուան չափ Եհովայի ծառայել։ Սակայն, որքա՜ն քաջալերական է տեսնել, որ անոնք ամբողջ սրտով իրենց կրցածին չափ կը ծառայեն։ Աստուծոյ Խօսքը զանոնք կը հաւաստիացնէ թէ Եհովա պիտի չմոռնայ իրենց գործը եւ այն սէրը որ ցոյց տուին իր անունին համար։—Ղուկ. 21։1-4. Եբր. 6։10

⁸ Եթէ հանգստեան կոչուելու տարիքին կը մօտենաք, ինչո՞ւ ջերմեռանդ աղօթքով նկատի չառնէք թէ ի՛նչպէս կրնաք ձեր փոխուող պարագաները լիովին օգտագործել։ Աստուծոյ օգնութեամբ, պիտի տեսնէք որ հանգստեան կոչուիլը յաւելեալ գործունէութեան առաջնորդող դուռ մըն է, եւ այդ գործունէութիւնը Եհովան կը փառաբանէ ու բազմաթիւ օրհնութիւններ կը բերէ։—Սաղմ. 148։12, 13