Անձնական հետաքրքրութիւն ցուցաբերէ՝ նախապատրաստուած ըլլալով
1 Ծառայութեան լաւ պատրաստուիլը կ’օգնէ մեզի որ ուրիշներուն հանդէպ անձնական հետաքրքրութիւն ցուցաբերենք։ Ի՞նչպէս։ Լաւ նախապատրաստուելով, մեր ուշադրութիւնը կը կեդրոնացնենք ո՛չ թէ ներկայացումին վրայ, այլ՝ տանտիրոջ վրայ, ջղագրգռութիւնը կը յաղթահարենք ու սրտանց կը խօսինք։ Սակայն ի՞նչպէս կրնանք ազդու ներկայացում մը պատրաստել։
2 Յարմար ներկայացում մը գործածէ. Յունուար 2006–ի Մեր Թագաւորութեան ծառայութիւնը թերթիկէն ընտրէ շրջանիդ յարմարող ներկայացում մը եւ մտածէ թէ ի՛նչպէս կրնաս զայն քու բառերովդ ըսել ու թաղամասիդ յարմարցնել։ Օրինակ, եթէ հաւանական է որ որոշ կրօնքի կամ տոհմի պատկանող անհատներու հանդիպիս, խորհէ թէ ի՛նչպէս ներկայացումդ կրնայ անոնց ուշադրութիւնը գրաւել։ Մօտեցումդ տանտիրոջ յարմարցնելը կ’արտացոլացնէ անկեղծ հետաքրքրութիւնդ։—Ա. Կորն. 9։22
3 Մինչ ներկայացումդ կը գործածես, շարունակէ զայն յղկել։ Բացման խօսքերը յատկապէս կարեւոր ըլլալով, նկատէ մարդոց ընդառաջումը։ Նիւթը կը հետաքրքրէ՞ զիրենք։ Ուղղած հարցումդ կը մղէ՞ զիրենք որ պատասխանեն։ Շարունակէ հարկ եղած ճշդումները ընել մինչեւ որ ազդու մօտեցում մը գտնես։
4 Յիշելու նպաստող բաներ. Ոմանք դրան առջեւ դժուարաւ կը մտաբերեն ներկայացում մը։ Այս խնդիրը չունենալու համար, փորձի նիստերու ընթացքին ուրիշ անհատի մը բարձրաձայն ներկայացուր պատրաստած նիւթդ։ Ասիկա կ’օգնէ որ գաղափարները միտքիդ մէջ յստակ ըլլան եւ զանոնք պարզ ու տրամաբանական կերպով ներկայացնես եւ կարենաս մարդոց զանազան հակազդեցութիւնները ձեռք առնել։
5 Յիշելու նպաստող յաւելեալ բան մըն է՝ ներկայացումդ ամփոփ կերպով գրել եւ զայն աչքէ անցընել դուռը զարնելէ առաջ։ Ասիկա ոմանց օգնած է որ աւելի հանգիստ զգան ու տանտիրոջ հետ աւելի լաւ խօսակցին։ Արդ, լաւ նախապատրաստուելով կրնանք ուրիշներուն հանդէպ անձնական հետաքրքրութիւն ցուցաբերել ու բարի լուրի մեր ներկայացումը որակաւորել։