Շարունակէ՛ յառաջդիմել որպէս քարոզիչ
1. Առաջին դարու ո՞ր օրինակները ցոյց կու տան, թէ պէտք է շարունակե՛նք յառաջդիմել որպէս քարոզիչներ։
1 Քրիստոնեաները պէտք է շարունակեն որպէս քարոզիչներ յառաջդիմել։ Անոր համար է որ Յիսուս իր հետեւորդներուն այնպիսի մարզում մը տուաւ, որ իրենց օգնեց իրենց հմտութիւնները բարելաւելու (Ղուկ. 9։1-5. 10։1-11)։ Նաեւ, անոր համար է որ Ակիւղասն ու Պրիսկիղան Ապօղոսը «իրենց քով առին եւ աւելի ճիշդ Աստուծոյ ճամբան անոր հասկցուցին» (Գործք 18։24-26)։ Նոյն պատճառով է որ Պօղոս փորձառու քարոզիչ՝ Տիմոթէոսը քաջալերեց, որ շարունակէ միտք դնել սորվեցնելու, որպէսզի իր յառաջդիմութիւնը «ամենուն յայտնի ըլլա[ր]» (Ա. Տիմ. 4։13-15)։ Չնայած թէ որքա՜ն տարիներէ ի վեր Տէրոջ կը ծառայենք որպէս բարի լուրի քարոզիչներ՝ պէտք է շարունակենք մեր քարոզչական հմտութիւնները բարելաւել։
2. Ինչպէ՞ս կրնանք ուրիշներէն սորվիլ։
2 Ուրիշներէն սորվէ՛։ Մեր հմտութիւնները բարելաւելու կերպերէն մէկն է՝ ուրիշներէն սորվիլ (Առ. 27։17)։ Ուստի, լաւ ուշադրութիւն ըրէ երբ ծառայակիցդ իր բացումը կը ներկայացնէ։ Ազդու քարոզիչներէ մասնայատուկ ուղղութիւններ խնդրէ եւ ուշի–ուշով անոնց ըսածին մտիկ ըրէ (Առ. 1։5)։ Կրնա՞յ ըլլալ որ վստահ չես թէ ինչպէ՛ս վերայցելութիւն պիտի ընես, Աստուածաշունչի ուսումնասիրութիւն մը սկսիս կամ ծառայութեան այլ երեսակներու մասնակցիս։ Նախաձեռնութիւնը առ եւ խումբիդ տեսուչէն կամ փորձառու հրատարակիչէ մը մարզում խնդրէ։ Յիշէ նաեւ թէ Եհովային սուրբ հոգին կրնայ մեր կարողութիւնները բարելաւել, ուստի այս նիւթին շուրջ կանոնաւորաբար իրեն աղօթէ (Ղուկ. 11։13)։
3. Ինչպէ՞ս պէտք է հակազդենք երբ մեզի տրուի խրատ մը, որ չէինք խնդրած։
3 Եթէ քեզի խրատ տրուի որ բարելաւումներ ընես, մի՛ վիրաւորուիր,– նոյնիսկ եթէ անհատէն խրատ չէիր խնդրած (Ժող. 7։9)։ Ապօղոսի նման, օգնութիւնը խոնարհութեամբ եւ երախտագիտութեամբ ընդունէ։ Ասիկա ցոյց կու տայ թէ որքա՜ն իմաստուն ես (Առ. 12։15)։
4. Որպէս քարոզիչ յառաջդիմելու նկատմամբ, Յիսուս ի՞նչ վաւերական պատճառ տուաւ։
4 Յառաջդիմութիւնը Աստուած կը փառաւորէ։ Լուսաբանութիւն մը գործածելով, Յիսուս իր հետեւորդները քաջալերեց, որ որպէս քարոզիչներ յառաջդիմեն։ Ան ինքզինք նմանցուց որթատունկի մը, իսկ իր օծեալ հետեւորդները՝ ճիւղերու։ Ան ըսաւ թէ Հայրը կը մաքրէ իւրաքանչիւր ճիւղ որ պտուղ կու տայ, «որպէս զի ա՛լ աւելի պտուղ բերէ» (Յովհ. 15։2)։ Ճիշդ ինչպէս որ որթատունկին տէրը կը փափաքի որ որթատունկին ճիւղերը աւելի՛ պտուղ տան, Եհովան ալ կ’ուզէ որ մեր հմտութիւնները բարելաւենք, որ «մեր շրթունքներուն պտուղը» արտադրենք (Եբ. 13։15)։ Երբ որպէս քարոզիչ յառաջդիմենք, ի՞նչ գոհացուցիչ արդիւնք ձեռք կը ձգենք։ Յիսուս մեզի կը պատասխանէ. «Իմ Հայրս կը փառաւորուի՝ երբ դուք շատ պտուղ բերէք» (Յովհ. 15։8, ԱԾ)։