Հարուստ երկիր մը փոխադրուելուն գինը հաշուեցէք

ԶԱՐԳԱՑՈՒՄԻ վրայ եղող համայն երկիրներու հիւպատոսարաններուն մէջ քաջածանօթ տեսարան մը կը պարզուի. սպասարան մը, ուր մարդիկ խռնուած են եւ տեսակցութեան համար ջղագրգռութեամբ իրենց կարգին կը սպասեն։ Այդ հակիրճ՝ բայց կարեւոր խօսակցութեան վրայ հիմնուելով, պիտի որոշուի թէ անոնք Արեւմտեան ճարտարարուեստականացած երկիր մը անցնելու արտօնագիր մը պիտի ստանա՞ն թէ ոչ։ Շատեր կը հաւատան որ ասիկա բարգաւաճութեան տանող տոմս մը պիտի ըլլայ իրենց համար։ «Չորս տարիէ ծանր կ’աշխատիմ եւ տակաւին ձայնասփիւռ մը չեմ կրցած գնել», գանգատեցաւ երիտասարդ Արեւմտեան Ափրիկեցի մը։ «Եթէ Անգլիա կամ Միացեալ Նահանգներ գտնուած ըլլայի, մինչեւ հիմա ինքնաշարժ մը եւ բնակելու համար իմ անձնական տեղս կ’ունենայի»։

Դժուար չէ հասկնալ թէ ինչու աղքատ եւ զարգացումի վրայ եղող ազգերուն մէջ շատեր այսպիսի զգացումներ ունին։ Իրենց համար, գործ գտնելը դժուար է, իսկ վճարումը՝ քիչ։ Դրամահոսկը կը հալեցնէ խնայողութիւնները։ Բնակարանները քիչ եւ գերխճողուած են։ Անոնք աւելի հարուստ երկիրներու մարդոց նետած հագուստները կը հագնին։ Շատեր կը խորհին որ տնտեսական աւազախրումի որոգայթին մէջ ինկած են։

Իսկ հարուստ Արեւմուտքը ի՛նչպէս կը քաշէ զիրենք։ Սիէրա Լէոնէն երիտասարդ մը ըսաւ. «Անոնք որ արտասահման գացած եւ վերադարձած են, պատմութիւններ կը պատմեն որոնք մեզ կը քաջալերեն անձամբ երթալու եւ ճարտարարուեստականացած երկիրները տեսնելու։ Անոնք կ’ըսեն որ պէտք է ծանր աշխատիք, բայց կրնաք լաւ դրամ շահիլ եւ ձեր պէտքերը հոգալ եւ նոյնիսկ կարգ մը պերճանքներ՝ ինչպէս ինքնաշարժ մը՝ ունենալ։ Իսկ եթէ երկու հազար տոլարով վերադառնաք, կրնաք գործ մը դարձնել եւ ամուսնանալ»։

Զարմանալի չէ որ Աստուծոյ կարգ մը ծառաներն ալ այսպէս կը տրամաբանեն։ Ափրիկեցի քոյր մը ըսաւ. «Աստուծոյ կազմակերպութեան մէջ երիտասարդներս խօսակցութիւններ կը լսենք թէ արտասահման գացած անհատները ի՜նչ բարեկեցիկ կեանք մը ունին։ Ուստի երբեմն ես ինծի հարց կու տամ. ‘Իսկ ես, ինչո՞ւ կը տառապիմ հոս։ Պէ՞տք է երթամ թէ հոս մնամ’»։

Եթէ աղքատ երկրի մը մէջ կը բնակիք, թերեւս դուք ալ հարց կու տաք թէ արդեօք փոխադրուիլը ձեր կեանքի որակը պիտի բարելաւէ՞։ Սակայն, օտար երկիր մը գաղթելը հսկայ ձեռնարկ մը, սուղ եւ լուրջ քայլ մըն է։ Անիկա կրնայ բովանդակել նոր լեզու մը սորվիլ, նոր արհեստ մը ձեռք ձգել, նոր մշակոյթի մը վարժուիլ, օտարներու հանդէպ ոմանց նախատալից արտայայտութիւնները լսել եւ բոլորովին նոր ապրելակերպ մը ունենալ։ Այսուհանդերձ, շատ մը Քրիստոնեաներ ասոնց մէջ յաջողած եւ իրենց գացած նոր երկիրներու ժողովքներուն համար իրական արժէք մը ներկայացուցած են, ծառայելով որպէս օրինակելի հրատարակիչներ, ռահվիրաներ, երէցներ եւ օգնական ծառաներ։

Բայց բոլորն ալ այս յաջողութիւնը չեն ունեցած։ Գաղթի ճնշումները եւ պրկումները ոմանց հոգեւոր կործանումին պատճառ եղած են։ Որոշ է ուրեմն, որ այսպիսի փոխադրութիւն մը լրջօրէն եւ աղօթքով պէտք է նկատի առնել։ Աստուածաշունչը Առակաց 3։5, 6–ի մէջ կը խրատէ. «Քու բոլոր սրտովդ Տէրոջը ապաւինէ եւ քու իմաստութեանդ մի՛ վստահիր։ Քու բոլոր ճամբաներուդ մէջ զանիկա ճանչցիր ու անիկա քու շաւիղներդ պիտի ուղղէ»։ Այո, կ’ուզէք վստահ ըլլալ որ Եհովայի կամքին հետ ներդաշնակ կը վարուիք։ (Յակոբու 4։13–15) Իսկ Յիսուս կարգ մը գործնական խրատներ տուաւ ձեզի օգնելու որ ասիկա ընէք, երբ յորդորեց իր ունկնդիրները որ ‘հաշիւ ընեն ծախքը’։ (Ղուկաս 14։28) Ասիկա նիւթականը նկատի առնելէն աւելին կը բովանդակէ։ Կը նշանակէ հաշիւ ընել գաղթելու հաւանական հոգեւոր գինը։

Արտասահմանի կեանքի իրողութիւնները

Որեւէ տեղ փոխադրուելէ առաջ, լաւ եւ իրապաշտ գաղափար մը պէտք է ունենաք թէ ի՛նչ կ’ակնկալէք այդ տեղէն։ Եթէ կարելի է նախապէս այցելութիւն մը տուէք եւ տեսէք անձամբ վիճակները ի՛նչպէս են։ Ապա թէ ոչ, երկրորդական տեղեկութեան մը պիտի ապաւինիք։ Աստուածաշունչը կ’ազդարարէ. «Միամիտ մարդը ամէն խօսքի կը հաւատայ, բայց խելացին իր քայլերը կը քննէ»։—Առակաց 14։15

Արեւմտեան երկիրներու կեանքին մասին ոմանք միայն շարժապատկերներէն եւ հեռատեսիլէն իրենց տեղեկութիւնը քաղած են։ Ուստի, անոնք կը հաւատան որ բոլոր հոն ապրողները հարուստ են, նոր ինքնաշարժ կը քշեն եւ փարթամ տունելու մէջ կը բնակին։ Իրականութիւնը սակայն, շատ տարբեր է։ Շատ մը հարուստ երկիրներ, մտահոգիչ աստիճան աղքատներ, տնազուրկներ եւ անգործներ ունին։ Իսկ ամենէն աղքատ բնակիչներէն շատերը նոր գաղթողներն են։ Աղքատ երկրի մը Մ.Ն. դեսպանատան հիւպատոսարանի պաշտօնեայ մը կը բացատրէ. «Մարդիկ իրապէս չեն գիտակցիր որ որքան դժուար է Ամերիկա հաստատուիլը։ Ոմանք իրենց տունը նամակներ կը գրեն եւ կ’ըսեն թէ ի՜նչ հանգիստ կեանք մը ունին՝ երկու ինքնաշարժ եւ տուն մը գնած են՝ բայց եթէ ճշմարտութիւնը կ’ուզէք, անոնք իրապէս կը մաքառին»։

Այլ տեղեր ալ պարագան նոյնն է։ Պր. Սահր Սորի, Արեւմտեան Ափրիկեցի ուսուցիչ մըն է որ Լոնտոնի մէջ ապրած եւ իր ուսումը առած է։ Ան կը բացատրէ. «Դիւրին չէ Ափրիկէէն փոխադրուելով Անգլիա հաստատուիլ։ Շա՜տ գաղթականներ ծայր աստիճան աղքատութեան մէջ կ’ապրին։ Դժուարութեան կնճիռներ կը տեսնէք անոնց դէմքերուն վրայ։ Ոմանք հեռաձայն մը ընելու համար 20 բեննի իրարու քով բերելու դժուարութիւն ունին։ Յաճախ մէկ սենեակը կը բաժնեն շատ մը ուրիշներու հետ, զիրենք տաքցնող պզտիկ վառարան մը ունենալով։ Անոնք միայն ձեռային աշխատանքներ կրնան ընել եւ ասով հանդերձ իրենց վճարումները չեն կրնար ընել։ Անոնք որոնք աղքատութենէն փախչելու համար Ափրիկէէն կը հեռանան, յաճախ Եւրոպայի աղտոտ թաղերուն մէջ աւելի վատ վիճակներու մէջ կը գտնուին»։

Նոր երկիր մը հաստատուելուն ընկերակցող նիւթական ճնշումները դիւրութեամբ կրնան խեղդել մէկու մը հոգեւորականութիւնը։ (Մատթէոս 13։22) Ճիշդ է որ Աստուածաշունչը կը գովէ ծանր աշխատանքը։ (Առակաց 10։4. 13։4) Սակայն արտասահման գացողներէն շատեր կը ստիպուին երկու կամ երեք գործ ընել, որպէսզի կարենան իրենց նիւթական յենակէտերուն հասնիլ՝ կամ հազիւ երկու ծայրերը իրար միացնել։ Աստուծոյ պաշտամունքը հետապնդելու համար շատ քիչ ժամանակ կը մնայ, կամ՝ բնաւ։ Կ’անտեսուին Քրիստոնէական ժողովները, Աստուածաշունչի ուսումնասիրութիւնը եւ ուրիշներուն հետ Աստուածաշունչի ճշմարտութիւնը բաժնելը։ Յիսուս Քրիստոսի խօսքերը եղերականօրէն կը փաստեն ճշմարիտ ըլլալ. «Մարդ մը չի կրնար երկու տիրոջ ծառայութիւն ընել»։—Մատթէոս 6։24

Բարոյական ճնշումներ

Նաեւ նկատի պէտք է առնէք ձեր երթալիք նոր երկրին բարոյական մթնոլորտը։ Աստուածաշունչը կ’ըսէ որ Ղովտ Յորդանանի Նահանգի շրջանը ընտրեց բնակելու համար։ Նիւթական տեսակէտէն դիտուած, իր որոշումը իմաստուն կը թուէր, քանի որ «ամէն տեղ ջրարբի էր, ... Տէրոջը դրախտին ... պէս էր»։ (Ծննդոց 13։10) Սակայն, Ղովտի նոր դրացիները «խիստ չար ու մեղաւոր էին Տէրոջը առջեւ». սեռային գետնի վրայ խոտորած էին։ (Ծննդոց 13։13) Այս պատճառաւ, «այն արդարը անոնց մէջ կենալով՝ աչքովը տեսնելով ու ականջովը լսելով, օրէ օր իր արդար հոգին կը տանջէր անոնց անօրէն վարքովը»։—Բ. Պետրոս 2։8

Նմանապէս, ներկայիս Արեւմտեան երկիր մը փոխադրուիլը ձեզ եւ ձեր ընտանիքը կրնայ բարոյական ճնշումներու եւ փորձութիւններու ենթարկել, որոնք շատ աւելի սաստիկ են քան՝ ձեր երկրին մէջ։ Ասկէ զատ, տարեց անհատները թերեւս չյարգուին, ինչպէս իրենց տուներուն մէջ սովորութիւն ունէին։ Կրնայ ըլլալ որ ծնողներու հանդէպ յարգանքն ալ չքաջալերուի։ Դրացիները գրեթէ չեն հետաքրքրուիր իրարմով։ Այս ճնշումները ի՞նչ ազդեցութիւն պիտի ունենան ձեր եւ ձեր ընտանիքին վրայ։ Ասիկա աղօթքով նկատի առնուելիք հարց մըն է։

Ծնողներու բացակայութիւն

Կարգ մը ծնողներ նախընտրած են իրենց ընտանիքը ձգել եւ առանձին ճամբորդել արտասահման։ Անոնց ծրագիրն է հաստատուելէ ետք իրենց ընտանիքը բերել տալ, կամ թերեւս շատ դրամով տուն վերադառնալ։ Այսպիսի կարգադրութիւն մը իմաստո՞ւն է։

Աստուածաշունչը կը ստիպէ ծնողներուն որ իրենց ընտանիքին նիւթական կարիքները հայթայթեն եւ կարգ մը ծայրագոյն պարագաներու, թերեւս ծնող մը ստիպուի արտասահման աշխատիլ այս հայթայթումը ընելու համար։ (Ա. Տիմոթէոս 5։8) Սակայն ծնողները ստիպուած են իրենց ընտանիքին հոգեւոր կարիքներուն ալ հոգ տանիլ։ Աստուծոյ Խօսքը կ’ըսէ. «Եւ դո՛ւք, հայրե՛ր, ձեր որդիները մի՛ բարկացնէք, հապա զանոնք մեծցուցէք Տէրոջը վարժութիւնովն ու խրատովը»։—Եփեսացիս 6։4

Հայր մը կրնա՞յ ասիկա ընել եթէ ամիսներով կամ երբեմն տարիներով հեռու է իր ընտանիքէն։ Կարելի չէ։ Ուստի, նկատի պէտք է առնէք թէ շահուած նիւթական առաւելութիւնը կ’արժէ՞ ձեր բացակայութեան ունեցած ազդեցութիւնը ձեր զաւակներուն վրայ։ Ասկէ զատ, գաղթողները յաճախ կը տեսնեն որ իրենց խորհած «հարստութիւնը» շինելը այդքան ալ դիւրին չէ։ Եթէ գաղթող ծնողը չկարենայ ընտանիքին ճամբորդագինը վճարել, բաժանումը կրնայ տարիներ տեւել։ Ասիկա իր կարգին բարոյական լուրջ վտանգներ կրնայ ստեղծել։ (Բաղդատել Ա. Կորնթացիս 7։1–5)։ Դժբախտաբար, ոմանք այսպիսի դժուար պարագաներուն, սեռային անբարոյութեան անձնատուր եղած են։

Վստահիլ Աստուծոյ հայթայթումներուն

Մինչ Աշխարհի տնտեսական վիճակները կը վատթարանան, լաւ է յիշել որ Աստուծոյ ծառաները անտեսուելու վախը պէտք չէ ունենան։ Յիսուս ըսաւ. «Հոգ մի՛ ընէք՝ ըսելով. ‘Ի՞նչ պիտի ուտենք, կամ ի՞նչ պիտի խմենք, կամ ի՞նչ պիտի հագնինք’։ Քանզի այդ բոլոր բաները հեթանոսները կը խնդրեն. վասնզի ձեր երկնաւոր Հայրը գիտէ՝ թէ այդ բոլոր բաները ձեզի պէտք են։ Բայց առաջ խնդրեցէք Աստուծոյ թագաւորութիւնը եւ անոր արդարութիւնը ու այդ բոլոր բաներն ալ ձեզի պիտի տրուին»։—Մատթէոս 6։31–33

Ներկայիս Եհովայի Վկաները Աստուծոյ Թագաւորութեան շահերուն կը ծառայեն, նախանձախնդրաբար ծանուցանելով բարի լուրը։ (Մատթէոս 24։14. 28։19, 20) Շատ մը աղքատ երկիրներու մէջ, Թագաւորութեան հրատարակիչներու մեծ կարիք մը կայ։ Մասնաւորաբար հասուն երէցներու եւ օգնական ծառաներու կարիքը կայ։ Փոխանակ տնտեսապէս բարգաւաճ երկիր մը երթալու՝ ուր կարիքը այդքան մեծ չէ՝ շատեր նախընտրած են իրենց ծնած երկիրներուն մէջ մնալ։ Անոնցմէ ոմանք ինչպէ՞ս կրցած են մէջէն ելլել։

Ալէթիան՝ Արեւմտեան Ափրիկեցի մը, որ 30 տարի լիաժամ ծառայութեան մէջ եղած է իր ծնած երկրին մէջ, հետեւեալը կ’ըսէ. «Ես պատեհութիւնը ունէի արտասահման ապրելու։ Չերթալուս պատճառը այդ էր որ կ’ուզէի իմ ժողովուրդիս ու ազգականներուս հետ ըլլալ։ Ինծի հաճոյք կը պատճառէ անոնց օգնել որ ճշմարտութիւնը սորվին, որպէսզի կարենանք միասնաբար Եհովայի ծառայել։ Հոս մնալով բա՛ն մը չեմ կորսնցուցած, ոչ ալ կը զղջամ ասոր համար»։

Ուինիֆրէտն ալ Ափրիկեան երկրի մը մէջ կ’ապրի։ Այդ երկրին ֆիզիքական որակը աշխարհի ամենացած մակարդակը ունի։ Բայց 42 տարի ռահվիրայական լիաժամ ծառայութեան մէջ ըլլալէ ետք, ան կ’ըսէ. «Միշտ դիւրին չէ տնտեսական գետնի վրայ գլուխ ելլել։ Սատանան կը ջանայ խնդիրները դժուարացնել, բայց Եհովա միշտ հոգ տարած է ինծի եւ պէտքերս՝ լեցուցած»։

Վաղ ժամանակներուն, Աբրահամ «իր մտքին մէջ հաստատ [պահած էր] թէ՝ ան [Աստուած] որ խօսք տուաւ, կարող է ընելու ալ»։ (Հռովմայեցիս 4։21) Դուք ալ համոզուա՞ծ էք որ Եհովա կրնայ իր խոստումը կատարել եւ ձեզի հոգ տանիլ, եթէ Թագաւորութեան շահերը ձեր կեանքին մէջ առաջին տեղը դնէք։ Սաղմոսերգուին հետ համաձա՞յն էք որ գրեց. «Ինծի հազարաւոր ոսկիէ ու արծաթէ աւելի աղէկ է քու [Աստուծոյ] բերնիդ օրէնքը»։ (Սաղմոս 119։72) Կամ կրնա՞յ ըլլալ որ կարիքը ունիք Պօղոս առաքեալի խրատը աւելի լիովին կիրարկելու։ Ա. Տիմոթէոս 6։8–ի մէջ, ան գրեց. «Կերակուր ու հանդերձ ունենալով՝ անոնցմով բաւականանանք»։ Կրնա՞յ ըլլալ որ ընելիք իմաստուն բանն է, ոչ թէ նոր շրջապատ մը փնտռել, այլ, ձեր ներկայ շրջապատին մէջ լաւագոյնը ընել։

Շատ մը երկիրներու մէջ տնտեսական վիճակները կրնան լուրջ դժուարութիւններ յարուցանել Քրիստոնեաներուն։ Ուստի, խնդրոյ առարկայ բոլոր ազդակները նկատի առնելէ ետք, եթէ ընտանիք մը որոշէ գաղթել, միւսները պէտք չէ քննադատական գտնուին։ (Գաղատացիս 6։5) Մնացողները կրնան Եհովայի օգնութիւնը խնդրել, այս դրութեան բերած դժուարութիւններուն տոկալու համար, միաժամանակ ուրախանալով Աստուծոյ իրենց տուած հոգեւոր օրհնութիւններով։ Յիշեցէք որ այս աշխարհի անարդարութիւններն ու անհաւասարութիւնները շուտով պիտի շտկուին Աստուծոյ Թագաւորութեան ներքեւ։ Այն ատեն սաղմոսերգուին գրածը պիտի կատարուի. «Քու [Եհովա] ձեռքդ կը բանաս ու ամէն կենդանիի փափաքը կը լեցնես»։—Սաղմոս 145։16