Ամուսնութիւնը ուրախութեան միա՞կ բանալին է
«Կինը ... ազատ է ամուսնանալու որու հետ որ ուզէ, միայն թէ Տէրոջմով։ Բայց իմ կարծիքովս՝ աւելի երանելի է եթէ այնպէս կենայ»։—Ա. ԿՈՐՆԹԱՑԻՍ 7։39, 40
1. Սուրբ Գրութիւնները ինչպէ՞ս կը նկարագրեն Եհովան, եւ ան ի՞նչ ըրած է իր արարածներուն համար։
ԵՀՈՎԱ «ուրախ Աստուածն» է։ (Ա. Տիմոթէոս 1։11, ՆԱ) Որպէս «ամէն բարի տուրք»ի եւ «ամէն կատարեալ պարգեւ»ի Առատաձեռն Հայթայթիչը, ան իր բոլոր մտացի արարածներուն՝ մարդոց թէ հրեշտակներուն, մատչելի կ’ընէ ճիշդ ինչ որ անոնք պէտք ունին իր ծառայութեան մէջ ուրախ ըլլալու համար։ (Յակոբու 1։17) Ուստի, գեղգեղուն թռչուն մը, վառվռուն շնիկ մը, կամ կենսալից դլփին մը, բոլորն ալ կ’ապացուցանեն որ Եհովա անասունները ստեղծեց, որպէսզի կեանքը վայելեն իրենց յատուկ, բնակավայրերուն մէջ։ Սաղմոսերգուն նոյնիսկ աւելի հեռուն կ’երթայ բանաստեղծական ոճով ըսելու թէ «[Եհովայի] ծառերը առատութեամբ ոռոգուած են, Լիբանանի եղեւիները՝ որոնք ինք տնկեց»։—Սաղմոս 104։16
2. (ա) Ի՞նչ բան ցոյց կու տայ թէ Յիսուս կ’ուրախանայ իր Հօրը կամքը կատարելով։ (բ) Յիսուսի աշակերտները ուրախ ըլլալու ի՞նչ պատճառներ ունէին։
2 Յիսուս Քրիստոս Եհովայի «էութեան՝ բուն պատկեր»ն է։ (Եբրայեցիս 1։3) Ուրեմն, զարմանալի չէ որ ան կոչուի «Երանելին ու միմիայն Հզօրը» (Ա. Տիմոթէոս 6։15) Ան մեզի սքանչելի օրինակ կը հանդիսանայ թէ ի՛նչպէս Եհովայի կամքը կատարելը կրնայ կերակուրէն աւելի գոհացուցիչ ըլլալ, զուտ հաճոյք պատճառել։ Յիսուս նաեւ ցոյց կու տայ թէ կրնանք ուրախանալ երբ Աստուծոյ վախովը, այսինքն, խոր ակնածութեամբ եւ Զինք տհաճեցնելու առողջ երկիւղով կը գործենք։ (Սաղմոս 40։8, ՆԱ. Եսայեայ 11։3. Յովհաննու 4։34) Երբ 70 աշակերտները Թագաւորութեան քարոզչութենէ մը ետք «ուրախութեամբ» վերադարձան, Յիսուս ինքն իսկ «[սուրբ] հոգիով ուրախացաւ»։ Իր ուրախութիւնը աղօթքով իր Հօրը արտայայտելէ ետք, ան աշակերտներուն դառնալով ըսաւ. «Երանի՜ այն աչքերուն՝ որոնք ձեր տեսածները կը տեսնեն։ Քանզի կ’ըսեմ ձեզի, թէ շատ մարգարէներ եւ թագաւորներ ուզեցին ձեր տեսածները տեսնել, բայց չտեսան եւ ձեր լսածները լսել, բայց չլսեցին»։—Ղուկաս 10։17–24
Ուրախ Ըլլալու Պատճառներ
3. Ուրախ ըլլալու ի՞նչ պատճառներ ունինք։
3 Արդեօք մեր աչքերն ալ երանելի պէտք չէ՞ ըլլան Եհովայի Խօսքին եւ նպատակներուն կատարումը տեսնելով հիմա՝ այս վերջին ժամանակին մէջ։ Պէտք չէ՞ ուրախանանք հասկնալով մարգարէութիւններ որոնց իմաստը չէին ըմբռնէր հաւատարիմ մարգարէներն ու թագաւորները, ինչպէս՝ Եսայի, Դանիէլ եւ Դաւիթ։ Ուրախ չե՞նք ուրախ Աստուծոյ՝ Եհովային ծառայելով, ուրախ Հզօրին՝ մեր Թագաւոր Յիսուս Քրիստոսին առաջնորդութեան ներքեւ։ Անշուշտ թէ ուրախ ենք։
4, 5. (ա) Եթէ կ’ուզենք ուրախ մնալ Եհովայի ծառայութեան մէջ, ի՞նչ պէտք է ընենք։ (բ) Ի՞նչ են կարգ մը բաները որոնք կը նպաստեն ուրախութեան, եւ ասիկա ի՞նչ հարցում կը յարուցանէ։
4 Սակայն եթէ կ’ուզենք ուրախ մնալ Եհովայի ծառայութեան մէջ, ուրախութեան համար մեր իսկ նախասիրած պահանջները պէտք չէ հիմնենք աշխարհային գաղափարներու վրայ։ Անոնք դիւրութեամբ կրնան մթագնել մեր մտածելակերպը, քանի որ կը ներփակեն նիւթական հարստութիւն, ամբարտաւան կենցաղ մը եւ ասոնց նման բաներ։ Այսպիսի բաներու վրայ հիմնուած ամէն «ուրախութիւն» կարճատեւ պիտի ըլլայ, քանի որ այս աշխարհը կ’անցնի։—Ա. Յովհաննու 2։15–17
5 Եհովայի նուիրուած ծառաներուն մեծամասնութիւնը կը գիտակցի որ աշխարհային նպատակակէտեր իրագործելը իրական ուրախութիւն պիտի չբերէ։ Միայն մեր երկնաւոր Հայրը հոգեւոր եւ նիւթական բաներ կը հայթայթէ, որոնք կը նպաստեն իր ծառաներուն իրական ուրախութեան։ Որքա՜ն երախտապարտ ենք հոգեւոր կերակուրին համար, զոր ան կու տայ մեզի ‘հաւատարիմ ու իմաստուն ծառային’ միջոցաւ։ (Մատթէոս 24։45–47) Երախտապարտ ենք նաեւ ֆիզիքական կերակուրին եւ նիւթական այլ բաներուն համար զորս կը ստանանք Աստուծոյ սիրալիր ձեռքէն։ Կայ նաեւ, ամուսնութեան հոյակապ պարգեւը եւ անոր հետ առնչուած ընտանեկան կեանքի ուրախութիւնները։ Զարմանալի չէ որ Նոյեմի հետեւեալ սրտաբուխ մաղթանքը յայտնեց այրի մնացած իր հարսերուն. «Տէրը ձեզի տայ [պարգեւէ (ՆԱ)], որ ամէն մէկդ իր էրկանը տունը հանգստութիւն գտնէ»։ (Հռութայ 1։9) Ուստի ամուսնութիւնը բանալի մըն է, որ կրնայ մեծ ուրախութեան դուռ մը բանալ։ Բայց միթէ ամուսնութիւնը ուրախ կեանքի մը առաջնորդող միա՞կ բանալին է։ Մասնաւորաբար երիտասարդները այս հարցումը լրջօրէն պէտք է քննեն գիտնալու համար։
6. Ըստ Ծննդոցին, ամուսնութիւնը ի՞նչ գլխաւոր նպատակի համար կարգադրուեցաւ։
6 Ամուսնութեան ծագումը պատմելով, Աստուածաշունչը կ’ըսէ. «Աստուած՝ իր պատկերովը ստեղծեց մարդը. Աստուծոյ պատկերովը ստեղծեց զանիկա, արու եւ էգ ստեղծեց զանոնք։ Աստուած օրհնեց զանոնք եւ Աստուած անոնց ըսաւ. ‘Աճեցէք ու շատցէք ու երկիրը լեցուցէք եւ անոր տիրեցէք’»։ (Ծննդոց 1։27, 28) Եհովայի կողմէ հաստատուած ամուսնութեան շնորհիւ, Ադամ գործածուեցաւ աւելի մեծ թիւով ուրիշ մարդկային արարածներու գոյութիւն տալու եւ այսպիսով մարդկային ցեղը ընդլայնելու համար։ Բայց ամուսնութիւնը ասկէ շատ աւելին կը պարփակէ։
«Միայն թէ Տէրոջմով»
7. Հաւատարիմ նահապետ մը ամուսնութեան նկատմամբ ո՞ր պահանջին գոհացում տալու համար ճիգ թափեց։
7 Քանի որ Եհովան է ամուսնութեան Հեղինակը, կ’ակնկալենք որ ան իր ծառաներուն ուրախութեան համար ամուսնութեան կապակցաբար չափանիշներ դրած է։ Նահապետներու շրջանին, Եհովայի երկրպագուներէն չեղած անհատներու հետ ամուսնանալը խստօրէն արգիլուած էր։ Աբրահամ իր ծառային՝ Եղիազարին, Եհովայով երդում ընել տուաւ, որ նահապետին Որդւոյն՝ Իսահակին՝ կին չառնէր Քանանացիներէն։ Եղիազար երկար ճամբորդութիւն մը կատարեց եւ խղճմտօրէն հետեւեցաւ Աբրահամի հրահանգներուն, որպէսզի գտնէր ‘Տէրոջը սահմանած կինը իր տիրոջ որդիին համար’։ (Ծննդոց 24։3, 44) Այսպիսով Իսահակ Ռեբեկային հետ ամուսնացաւ։ Երբ իրենց որդին՝ Եսաւ՝ հեթանոս Քետացիներուն մէջէն կիներ ընտրեց, անոնք «Իսահակին ու Ռեբեկային սրտի ցաւ եղան»։—Ծննդոց 26։34, 35. 27։46. 28։1, 8
8. Ամուսնութեան վրայ ի՞նչ արգելում դրուած էր Օրէնքի ուխտին կողմէ։
8 Օրէնքի ուխտին ներքեւ, արգիլուած էր Քանանացի ազգերուն պատկանած մարդոց կամ կիներու հետ ամուսնանալ։ Եհովա իր ժողովուրդին հրահանգեց, ըսելով. «Ո՛չ ալ անոնց հետ խնամութիւն ըրէ. քու աղջիկդ անոր տղուն մի՛ տար ու անոր աղջիկը քու տղուդ մի՛ առներ։ Վասնզի քու տղաքներդ իմ ծառայութենէս պիտի հեռացնեն, որով օտար աստուածներ պիտի պաշտեն, այն ատեն Տէրոջը բարկութիւնը ձեր վրայ բորբոքելով ձեզ պիտի կորսնցնէ»։—Բ. Օրինաց 7։3, 4
9. Ամուսնութեան մասին Աստուածաշունչը ի՞նչ խրատ կու տայ Քրիստոնեաներուն։
9 Զարմանալի չէ որ նմանօրինակ սահմանափակումներ կիրարկուին Քրիստոնէական ժողովքին մէջ, Եհովան չպաշտողներուն հետ ամուսնանալու հարցին նկատմամբ։ Պօղոս առաքեալ յորդորեց իր հաւատակից Քրիստոնեաները. «Անհաւատներուն հետ օտարախառն լծակից մի՛ ըլլաք. քանզի ի՞նչ մասնակցութիւն ունի արդարութիւնը անօրէնութեան հետ եւ ի՞նչ հաղորդակցութիւն ունի լոյսը խաւարին հետ։ Եւ ի՞նչ միաբանութիւն ունի Քրիստոս Բելիարին հետ, կամ ի՞նչ բաժին ունի հաւատացեալը անհաւատին հետ»։ (Բ. Կորնթացիս 6։14, 15) Այս խրատը տարբեր մարզերու մէջ կը կիրարկուի եւ վստահաբար ամուսնութեան մարզին մէջ ալ։ Եհովայի բոլոր նուիրուած ծառաներուն Պօղոսի բացայայտ հրահանգն է որ անոնք անհատի մը հետ ամուսնանալը նկատի պէտք է առնեն «միայն եթէ ան Տէրոջմով միութեան մէջ է»։—Ա. Կորնթացիս 7։39, ՆԱ, լուսանցքի բացատրութիւն։
Երբ Կարելի Չէ «Տէրոջմով» Ամուսնանալ
10. Շատ մը ամուրի Քրիստոնեաներ ի՞նչ կ’ընեն, եւ ի՞նչ հարցում կ’ըլլայ։
10 Շատ մը ամուրի Քրիստոնեաներ ընտրած են Յիսուս Քրիստոսի օրինակին հետեւիլ ամուրիութեան պարգեւը մշակելով։ Իսկ կարելի չըլլալով ներկայիս աստուածապաշտ կողակից մը գտնել ու «Տէրոջմով» ամուսնանալ, շատ մը հաւատարիմ Քրիստոնեաներ իրենց վստահութիւնը Եհովայի վրայ դրած են եւ ամուրի մնացած են, փոխանակ անհաւատի մը հետ ամուսնանալու։ Աստուծոյ հոգին անոնց մէջ կը յառաջացնէ այսպիսի պտուղներ, ինչպէս՝ ուրախութիւն, խաղաղութիւն, հաւատք եւ ժուժկալութիւն, անոնց կարող դարձնելով որ մաքուր ամուրիութիւն մը պահեն։ (Գաղատացիս 5։22, 23) Աստուծոյ հանդէպ իրենց նուիրումի այս փորձը յաջողութեամբ տանողներուն մէջ կը գտնուին բազմաթիւ Քրիստոնեայ քոյրեր որոնց հանդէպ շատ խոր յարգանք ունինք։ Շատ մը երկիրներու մէջ, անոնք թիւով եղբայրներէն աւելի են եւ քարոզելու գործին մէջ աւելի մեծ չափով մասնակցութիւն կը բերեն։ Արդարեւ, «Տէրը պատգամ տուաւ. աւետիս տուող [կիները (ՆԱ)] մեծ բազմութիւն են»։ (Սաղմոս 68։11) Իրականութեան մէջ, Աստուծոյ երկու սեռի պատկանող շատ մը ամուրի ծառաները իրենց ուղղամտութիւնը կը պահեն, քանի որ ‘ամբողջ սրտով Եհովայի կ’ապաւինին ու ան իրենց շաւիղները կ’ուղղէ’։ (Առակաց 3։5, 6) Սակայն, անոնք որ չեն կրնար ներկայիս «Տէրոջմով» ամուսնանալ, պայմա՞ն է որ ապերջանիկ ըլլան։
11. Աստուածաշունչի սկզբունքներուն հանդէպ յարգանքէ մղուած ամուրի մնացող Քրիստոնեաները ի՞նչ բանէ վստահ կրնան ըլլալ։
11 Չմոռնանք որ մենք ուրախ Աստուծոյ՝ Եհովայի՝ Վկաներն ենք եւ որ ուրախ Հզօրին՝ Յիսուս Քրիստոսի առաջնորդութեան ներքեւ կը ծառայենք։ Ուստի, եթէ Աստուածաշունչին մէջ դրուած յստակ սահմանափակումներու հանդէպ մեր յարգանքը մեզ պէտք է մղէ ամուրի մնալու, քանի որ կարելի չէ «Տէրոջմով» կողակից մը գտնել, տրամաբանակա՞ն է խորհիլ որ Աստուած եւ Քրիստոս մեզ ապերջանիկ պիտի ձգեն։ Վստահաբար ո՛չ։ Հետեւաբար, մենք պէտք է եզրակացնենք թէ որպէս Քրիստոնեաներ, կարելի է ուրախ ըլլալ չամուսնացած վիճակով։ Ամուսնացած ըլլանք թէ՝ ամուրի, Եհովա կրնայ մեզ իրապէս ուրախացնել։
Իրական Ուրախութեան Բանալին
12. Անհնազանդ հրեշտակներու պարագան ի՞նչ կը յայտնէ ամուսնութեան մասին։
12 Ամուսնութիւնը ուրախութեան միակ բանալին չէ Աստուծոյ բոլոր ծառաներուն համար։ Առնենք, զոր օրինակ, հրեշտակները։ Ջրհեղեղէն առաջ, հրեշտակներէն ոմանք հոգեղէն արարածներու անբնական եղող ցանկութիւններ մշակեցին. անոնք դժգոհ եղան չկարենալ ամուսնանալէ, ու մսեղէն մարմիններ հագան որպէսզի կիներ առնեն։ Քանի որ այս հրեշտակները «իրենց բնակութիւնը ձգեցին», Աստուած ալ «[զանոնք] մշտնջենաւոր կապերով խաւարի մէջ պահեց մեծ օրուան դատաստանին համար»։ (Յուդա 6. Ծննդոց 6։1, 2) Յստակ է որ Աստուած բնաւ չկարգադրեց որ հրեշտակները ամուսնանան։ Ուստի, ամուսնութիւնը պարզապէս չէր կրնար ուրախութեան բանալին ըլլալ անոնց համար։
13. Սուրբ հրեշտակները ինչո՞ւ ուրախ են, եւ ասիկա ի՞նչ ցոյց կու տայ Աստուծոյ բոլոր ծառաներուն։
13 Սակայն, հաւատարիմ հրեշտակները ուրախ են։ Երբ Եհովա երկրի հիմերը դրաւ, «առաւօտեան աստղերը մէկտեղ փառաբանութիւն կ’ընէին ու ... Աստուծոյ բոլոր [հրեշտակային] որդիները ցնծութեամբ կ’աղաղակէին»։ (Յոբ 38։7) Սուրբ հրեշտակները ինչո՞ւ ուրախ են։ Քանի որ անոնք յարատեւաբար Եհովա Աստուծոյ ծառայութեան մէջ են, որպէսզի իր «խօսքին ձայնը լսելով» անմիջապէս կատարեն։ Անոնք կ’ուրախանան «իրեն հաճելի եղածը ընելով»։ (Սաղմոս 103։20, 21, ՆԱ, լուսանցքի բացատրութիւն։) Այո, սուրբ հրեշտակներուն ուրախութիւնը յառաջ կու գայ հաւատարմութեամբ Եհովայի ծառայելէն։ Ատիկա իրական ուրախութեան բանալին է մարդոց համար ալ։ Այս կերպով, Աստուծոյ ներկայիս ուրախութեամբ ծառայող ամուսնացած օծեալ Քրիստոնեաները պիտի չամուսնանան երբ երկնային կեանքի յարուցուին, բայց ուրախ պիտի ըլլան հոգեղէն արարածներ ըլլալով, որոնք աստուածային կամքը պիտի կատարեն։ Հետեւաբար, ամուսնացած ըլլան թէ ամուրի, Եհովայի բոլոր հաւատարիմ ծառաները կրնան ուրախ ըլլալ, քանի որ իրական ուրախութիւնը յառաջ կու գայ հաւատարմութեամբ Ստեղծիչին ծառայելէն։
«Տղաքներէն ու Աղջիկներէն Աւելի՝ Աղէկ»
14. Վաղեմի Իսրայէլի աստուածապաշտ ներքինիներուն մարգարէական ի՞նչ խոստում տրուեցաւ, եւ ասիկա ինչո՞ւ կրնայ տարօրինակ թուիլ։
14 Եթէ նոյնիսկ հաւատարիմ Քրիստոնեայ մը բնաւ չամուսնանայ, Աստուած կրնայ անոր ուրախութիւնը ապահովել։ Վաղեմի Իսրայէլի ներքինիներուն մարգարէաբար ուղղուած հետեւեալ խօսքերէն կրնանք քաջալերութիւն քաղել. «Տէրը այսպէս կ’ըսէ. ‘Այն ներքինիներուն, որոնք իմ շաբաթներս կը պահեն եւ ինծի հաճոյ եղածը կ’ընտրեն ու իմ ուխտիս մէջ հաստատ կը կենան. անոնց՝ իմ տանս մէջ եւ պարիսպներուս մէջ եղող տղաքներէն ու աղջիկներէն աւելի՝ աղէկ տեղ ու անուն պիտի տամ։ Անոնց յաւիտենական անուն պիտի տամ, որ պիտի չջնջուի’»։ (Եսայեայ 56։4, 5) Թերեւս մէկը ակնկալէր որ այս անհատներուն կին մը եւ զաւակներ խոստացուէին իրենց անունը յաւերժացնելու համար։ Սակայն անոնց խոստացուեցաւ «տղաքներէն ու աղջիկներէն աւելի՝ աղէկ» բան մը—Եհովայի տան մէջ մնայուն անուն մը։
15. Եսայեայ 56։4, 5–ի կատարման մասին ի՞նչ կրնանք ըսել։
15 Եթէ այս ներքինիները նկատենք «Աստուծոյ Իսրայէլ»ը ներփակող մարգարէական մէկ պատկերը, անոնք կը ներկայացնեն օծեալները որոնք Եհովայի հոգեւոր տան կամ տաճարին մէջ մնայուն տեղ մը կը ստանան։ (Գաղատացիս 6։16) Անկասկած, այս մարգարէութիւնը բառացի կատարում մը պիտի ունենայ վաղեմի Իսրայէլի աստուածապաշտ ներքինիներուն վրայ, որոնք պիտի յարուցուին։ Եթէ անոնք ընդունին Քրիստոսի փրկարար զոհագործութիւնը եւ շարունակեն Եհովայի «հաճոյ եղածը» ընտրել, «յաւիտենական անուն» մը պիտի ստանան Աստուծոյ նոր աշխարհին մէջ։ Ասիկա կրնայ նաեւ կիրարկուիլ այս վերջին ժամանակին «ուրիշ ոչխարներ»էն անոնց որոնք ամուսնանալէ եւ զաւակներ բերելէ կը հրաժարին, որպէսզի աւելի լման կերպով իրենց անձը տրամադրեն Եհովայի ծառայութեան։ (Յովհաննու 10։16) Անոնցմէ ոմանք կրնան առանց ամուսնանալու կամ անզաւակ մահանալ։ Սակայն եթէ հաւատարիմ են, անոնք յարութեամբ պիտի ստանան «տղաքներէն ու աղջիկներէն աւելի՝ աղէկ» բան մը—անուն մը՝ որ «պիտի չջնջուի» իրերու նոր դրութեան մէջ։
Ամուսնութիւնը Ուրախութեան Միակ Բանալին Չէ
16. Ինչո՞ւ կրնանք ըսել որ ամուսնութիւնը միշտ ուրախութիւն չի բերեր։
16 Կարգ մը անհատներ կը խորհին որ ուրախութիւնը անբաժանելիօրէն կը կապուի ամուսնութեան հետ։ Սակայն, պէտք է ընդունինք որ ամուսնութիւնը միշտ ուրախութիւն չի բերեր, նոյնիսկ Եհովայի այժմու ծառաներուն։ Անիկա կարգ մը խնդիրներ կը լուծէ, բայց յաճախ ուրիշ խնդիրներ կը յարուցանէ, որ կրնայ շատ աւելի դժուար ըլլալ անոնց հետ գլուխ ելլել քան ամուրիներուն ունեցած խնդիրներուն հետ։ Պօղոս ըսաւ որ ամուսնութիւնը ‘մարմնի նեղութիւն’ կը պատճառէ։ (Ա. Կորնթացիս 7։28) Կան ժամանակներ երբ ամուսնացած անհատ մը «մտահոգ» եւ «բաժնուած (ՆԱ)» է։ Այրը կամ կինը յաճախ դժուար կը գտնէ «առանց զբաղումի Տէրոջը ծառայել»ը։—Ա. Կորնթացիս 7։33–35
17, 18. (ա) Ճամբորդող տեսուչներէն ոմանք ի՞նչ կը տեղեկագրեն։ (բ) Պօղոս ի՞նչ խրատ կու տայ, եւ ինչո՞ւ օգտակար է զայն կիրարկել։
17 Թէ՛ ամուսնութիւնը եւ թէ ամուրիութիւնը Աստուծմէ պարգեւներ են։ (Հռութայ 1։9. Մատթէոս 19։10–12) Այս պարագաներէն որեւէ մէկուն մէջ յաջողելու համար, կենսական է աղօթքով խորհիլ։ Ճամբորդող տեսուչներ կը տեղեկագրեն որ շատ մը Վկաներ շատ վաղ տարիքին կ’ամուսնանան եւ յաճախ ծնողներ կ’ըլլան առանց պատրաստ ըլլալու անկէ առթող պատասխանատուութիւնները կրելու։ Այս ամուսնութիւններէն ոմանք կը քայքայուին։ Ուրիշ զոյգեր թէեւ գլուխ կ’ելլեն իրենց խնդիրներուն հետ, բայց անոնց ամուսնութիւնը ուրախութիւն չի բերեր։ Ինչպէս Անգլիացի թատերագիր՝ Ուիլիըմ Քոնկրիվ գրեց. անոնք որոնք հապճեպով կ’ամուսնանան, «հանգիստի պահուն կը զղջան»։
18 Շրջանային տեսուչներ նաեւ կը տեղեկագրեն թէ կարգ մը երիտասարդ եղբայրներ ետ կը կենան Պէթէլի ծառայութեան դիմելէ կամ Ծառայութեան Մարզումի Դպրոց յաճախելու համար կամաւոր ըլլալէ, ժամանակ մը ամուրի մնալու պահանջին պատճառաւ։ Բայց Պօղոս խրատ կու տայ որ անհատ մը «ամուսնութեան տարիքը» կամ կեանքի գարունը անցնելէ ետք ամուսնանայ, այսինքն, սպասել մինչեւ որ սեռային սկզբնական կիրքը նուազի։ (Ա. Կորնթացիս 7։36–38) Որպէս ամուրի չափահաս մը անցուցած տարիները անհատի մը կը հայթայթեն թանկագին փորձառութիւն եւ ներատեսութիւն, զայն աւելի ի վիճակի ընելով ամուսնութեան կողակից մը ընտրելու, կամ ամուրի մնալու մասին ուշադրութեամբ նկատի առնուելիք որոշումը առնելու համար։
19. Եթէ ամուսնանալու իրական կարիք մը չունինք, հարցերը ինչպէ՞ս կրնանք դիտել։
19 Մեզմէ ոմանք իրենց կեանքի գարունը անցուցած են, անոր հետ սեռային մտերմութեան զօրաւոր փափաքը։ Կրնայ ըլլալ որ մտածենք ամուսնութեան օրհնութիւններուն մասին, բայց իրապէս ամուրիութեան պարգեւն ալ ունինք։ Եհովա թերեւս կը տեսնէ որ ամուրի ըլլալով իրեն ազդու կերպով կը ծառայենք եւ թէ իրապէս կարիքը չունինք ամուսնանալու, ինչ որ կրնայ պահանջել որ իր ծառայութեան մէջ մեր ունեցած կարգ մը առանձնաշնորհումներէն հրաժարինք։ Եթէ ամուսնութիւնը անձնական կարիք մը չէ եւ կողակից մը ունենալու օրհնութիւնը չունինք, Աստուած թերեւս ուրիշ բան մը կը վերապահէ մեզի։ Ուստի հաւատք ընծայենք որ ան մեր կարիքները պիտի լեցնէ։ Մեծագոյն ուրախութիւնը պիտի ունենանք խոնարհութեամբ ընդունելով ինչ որ կը թուի Աստուծոյ կամքը ըլլալ մեզի հանդէպ, ինչպէս Հրեայ Քրիստոնեաներուն՝ որոնք ‘ձայներնին կտրեցին եւ Աստուած փառաւորեցին’, երբ հասկցան որ ան Հեթանոսներուն ալ կեանքի համար ապաշխարութիւն շնորհած է։—Գործք 11։1–18
20. (ա) Ամուրիութեան մասին հոս ի՞նչ խրատներ կը տրուին երիտասարդ Քրիստոնեաներուն։ (բ) Ուրախութեան նկատմամբ հիմնական ի՞նչ կէտ ճշմարիտ կը մնայ։
20 Հետեւաբար, ամուսնութիւնը կրնայ ուրախութեան բանալի մը ըլլալ, սակայն անիկա կրնայ նաեւ խնդիրներու դուռ բանալ։ Մէկ բան որոշ է. Ամուսնութիւնը ուրախութիւն գտնելու միակ միջոցը չէ։ Ամէն բան նկատի առնելով, իմաստութիւն պիտի ըլլայ, մանաւանդ երիտասարդ Քրիստոնեաներուն համար, ջանալ բաւական տարիներ ամուրի մնալը։ Այս տարիները կարելի է լաւ կերպով գործածել Եհովայի ծառայելու եւ հոգեւորականութեան մէջ յառաջդիմելու համար։ Մեր տարիքը կամ հոգեւոր յառաջդիմութիւնը ի՛նչ որ ըլլայ, սակայն այս հիմնական կէտը ճշմարիտ կը մնայ անվերապահօրէն Աստուծոյ նուիրուած բոլոր ծառաներուն. Իրական ուրախութիւն կը գտնենք հաւատարմութեամբ Եհովայի ծառայելով։
Ինչպէ՞ս Պիտի Պատասխանէիք
◻ Եհովայի ծառաները ինչո՞ւ ուրախ են։
◻ Ամուսնութիւնը ինչո՞ւ մեծագոյն ուրախութեան բանալին չէ։
◻ Ամուսնական կողակից մը ընտրելու կապակցաբար, Եհովայի ծառաներէն ի՞նչ պահանջուած է ։
◻ Ինչո՞ւ տրամաբանական է հաւատալ թէ ամուրի մնացող Քրիստոնեաները կրնան ուրախ ըլլալ։
◻ Ամուսնութեան եւ ուրախութեան մասին ի՞նչ պէտք է ընդունինք։