Ճամբորդող տեսուչներ—Տղամարդիկ՝ որպէս պարգեւներ
«Բարձրը ելաւ, գերութիւնը գերի բռնեց ու մարդոց [«տղամարդիկ՝ որպէս», ՆԱ] պարգեւներ տուաւ»։—ԵՓԵՍԱՑԻՍ 4։8
1. 1894–ին, այս պարբերաթերթին մէջ ի՞նչ նոր գործունէութիւն ծանուցանուեցաւ։
ՇՈՒՐՋ դար մը առաջ, Դիտարանը նոր բան մը ծանուցանեց, որ նկարագրուած էր որպէս՝ «Գործին Ուրիշ Մէկ Երեսակը»։ Ի՞նչ էր այդ։ Անիկա արդի ճամբորդող տեսուչներու գործունէութեան սկիզբն էր։ Այս պարբերաթերթին 1 Սեպտեմբեր 1894–ի թիւը կը բացատրէր որ այսուհետեւ որակելի եղբայրներ Աստուածաշունչի Աշակերտներու խմբակները պիտի այցելէին՝ ‘զանոնք ճշմարտութեան մէջ կերտելու համար’։
2. Շրջանային եւ նահանգային տեսուչներուն պարտականութիւնը ի՞նչ է։
2 Հ.Դ. առաջին դարուն, Պօղոսի եւ Բառնաբասի նման տեսուչներ կ’այցելէին քրիստոնէական ժողովքները։ Այս հաւատարիմ մարդոց նպատակն էր ժողովքները ‘շինել’։ (Բ. Կորնթացիս 10։8) Ներկայիս, ուրախ ենք որ հազարաւոր անհատներ կանոնաւորաբար նոյն բանը կ’ընեն։ Եհովայի Վկաներու Կառավարիչ Մարմինը զանոնք նշանակած է որպէս շրջանային եւ նահանգային տեսուչներ։ Շրջանային տեսուչ մը տարին երկու անգամ շուրջ 20 ժողովքներ կ’այցելէ մէկ շաբթուան համար. ան տեղեկագրութիւնները կը քննէ, դասախօսութիւններ կու տայ եւ տեղւոյն Թագաւորութեան հրատարակիչներուն հետ դաշտի ծառայութեան կը մասնակցի։ Նահանգային տեսուչը քանի մը շրջաններու տարեկան շրջանային համաժողովներուն որպէս ատենապետ կը ծառայէ. զինք հիւրասիրող ժողովքներուն հետ դաշտի ծառայութեան կը մասնակցի եւ սուրբ գրային դասախօսութիւններով քաջալերութիւններ կու տայ։
Անոնց Անձնազոհ Հոգին
3. Ճամբորդող տեսուչները ինչո՞ւ անձնազոհ հոգի մը պէտք է ունենան։
3 Ճամբորդող տեսուչները անդադար ճամբորդութեան մէջ են։ Ասիկա ինքնին անձնազոհ հոգի մը կը պահանջէ։ Մէկ ժողովքէն միւսը ճամբորդելը կրնայ երբեմն դժուար ըլլալ, սակայն այս տղամարդիկը եւ իրենց կիները ուրախութեամբ կ’ընեն ասիկա։ Շրջանային տեսուչ մը ըսաւ. «Կինս մեծապէս թիկունք կը կանգնի՝ առանց գանգատելու . . . Ան իր անձնազոհ հոգիին համար մեծապէս գովելի է»։ Շրջանային տեսուչներէն ոմանք մէկ ժողովքէն միւսը երթալու համար աւելի քան 1,000 քմ. կը ճամբորդեն։ Շատեր ինքնաշարժներ ունին, բայց ուրիշներ հանրային փոխադրամիջոցներով, հեծանիւով, ձիով կամ քալելով կ’երթան։ Ափրիկեցի շրջանային տեսուչ մը ժողովք մը այցելելու համար ստիպուած է գետէ մը անցնիլ, իր ուսին վրայ կրելով իր կինը։ Պօղոս առաքեալ իր միսիոնարական ճամբորդութեանց ընթացքին տաքի ու ցուրտի, անօթութեան ու ծարաւի, անքուն գիշերներու, բազմաթիւ վտանգներու եւ վայրագ հալածանքներու տոկաց։ «Բոլոր եկեղեցիներուն հոգ»ն ալ ունէր, որու ներկայիս սովոր են ճամբորդող տեսուչները։—Բ. Կորնթացիս 11։13–29
4. Առողջապահական խնդիրները ի՞նչ ազդեցութիւն կրնան ունենալ ճամբորդող տեսուչներուն եւ իրենց կիներուն վրայ։
4 Պօղոսի ճամբորդակիցին՝ Տիմոթէոսի՝ նման, ճամբորդող տեսուչները եւ անոնց կիները երբեմն առողջապահական խնդիրներ կ’ունենան։ (Ա. Տիմոթէոս 5։23) Ասիկա իրենց վրայ յաւելեալ ճնշում կը բանեցնէ։ Շրջանային տեսուչի մը կինը բացատրեց. «Երբ անհանգիստ ըլլամ, միշտ եղբայրներու հետ ըլլալը ջղագրգիռ կը դարձնէ զիս։ Մանաւանդ դաշտանի դադարումի շրջանին ասիկա շատ դժուար եղաւ։ Ամէն շաբաթ մեր բոլոր պիտոյքները հաւաքելը եւ ուրիշ տեղ մը փոխադրուիլը իրապէս դժուար է։ Յաճախ կանգ կ’առնեմ եւ Եհովայի կ’աղօթեմ որ ինծի ոյժ տայ որ շարունակեմ»։
5. Հակառակ բազմաթիւ փորձութիւններու, ճամբորդող տեսուչները եւ իրենց կիները ի՞նչ հոգի ցուցաբերած են։
5 Առողջապահական խնդիրներ եւ ուրիշ փորձութիւններ ունենալով հանդերձ, ճամբորդող տեսուչները եւ իրենց կիները այս ծառայութեան մէջ ուրախութիւն կը գտնեն եւ անձնազոհ սէր կը ցուցաբերեն։ Անոնցմէ ոմանք իրենց կեանքը վտանգած են հալածանքի կամ պատերազմի ժամանակներուն հոգեւոր օգնութիւն տալու համար։ Երբ ժողովքները կ’այցելեն, անոնք Պօղոսի նման հոգի մը կը ցուցաբերեն, որ Թեսաղոնիկեցի Քրիստոնեաներուն ըսաւ. «Մենք համեստ եղանք ձեր մէջ։ Ինչպէս դայեակ մը որ իր երախաները կը խնամէ, նոյնպէս մենք ձեր վրայ գորով ունենալով՝ կը յօժարէինք ո՛չ միայն Աստուծոյ աւետարանը ձեզի տալ, հապա մեր անձերն ալ. վասն զի դուք մեր սիրելիներն էիք»։—Ա. Թեսաղոնիկեցիս 2։7, 8
6, 7. Ծանր աշխատող ճամբորդող տեսուչները դրական ի՞նչ ազդեցութիւն կրնան ունենալ։
6 Քրիստոնէական ժողովքին մէջ գտնուող միւս երէցներուն նման, շրջանային տեսուչները «[«ծանր», ՆԱ] կ’աշխատին խօսքը քարոզելով ու սորվեցնելով»։ Այս բոլոր երէցները «կրկին պատիւի արժանի [պէտք է] սեպուին»։ (Ա. Տիմոթէոս 5։17) ‘Անոնց վարմունքին վախճանին նայելով իրենց հաւատքը’ ընդօրինակելը կրնայ օգտակար ըլլալ։—Եբրայեցիս 13։7
7 Ճամբորդող տեսուչներէն ոմանք ի՞նչ ազդեցութիւն ունեցած են ուրիշներու վրայ։ Եհովայի Վկայ մը գրեց. «Եղբայր Բ—ը ի՜նչ հոյակապ ազդեցութիւն մը ունեցաւ իմ կեանքիս մէջ»։ «Ան Մեքսիկայի մէջ ճամբորդող տեսուչ մըն էր 1960–էն ի վեր։ Երախայ մը ըլլալով, իր այցելութիւնը մեծ ակնկալութեամբ եւ ուրախութեամբ կը սպասէի։ Երբ տասը տարեկան էի, ինծի ըսաւ. ‘Դո՛ւն ալ շրջանային տեսուչ պիտի ըլլաս’։ Պատանեկութեանս դժուար տարիներուն, յաճախ զինք կը փնտռէի, քանի որ միշտ իմաստուն խօսք մը ունէր ըսելիք։ Հօտը հովուելը իր կե՛անքն էր։ Հիմա որ ես ալ շրջանային տեսուչ եմ, միշտ կը ջանամ երիտասարդներուն ժամանակ տրամադրել եւ, ինչպէս ինք ըրաւ ինծի, ես ալ անոնց դիմաց աստուածպետական նպատակակէտեր կը դնեմ։ Նոյնիսկ իր կեանքի վերջին տարիներուն, սրտի տկարութիւն ունենալով հանդերձ, Եղբայր Բ—ը միշտ կը ջանար քաջալերական խօսք մը ըսել։ Իր մահուընէ (Փետրուար 1995) ճիշդ օր մը առաջ, ինծի հետ միօրեայ մասնաւոր համաժողովին եկաւ եւ հոն ճարտարապետ եղբօր մը դիմաց գեղեցիկ նպատակակէտ մը դրաւ։ Եղբայրը անմիջապէս Պէթէլի մէջ ծառայելու դիմումնագիր ներկայացուց»։
Անոնք Գնահատուած Են
8. Եփեսացիս 4–րդ գլուխին մէջ նկարագրուած ‘տղամարդիկը՝ որպէս պարգեւներ’ որո՞նք են, եւ անոնք ի՞նչ կերպով օգտակար կ’ըլլան ժողովքին։
8 Աստուծոյ անարժան ողորմութեամբ ծառայութեան առանձնաշնորհումներ ունեցող ճամբորդող տեսուչները եւ միւս երէցները՝ կոչուած են «տղամարդիկ՝ որպէս պարգեւներ»։ Որպէս Եհովայի ներկայացուցիչը եւ ժողովքին Գլուխը՝ Յիսուս, հոգեւոր որակումներ ունեցող այս տղամարդիկը հայթայթած է, որպէսզի մենք անհատապէս կերտուինք եւ հասուննանք։ (Եփեսացիս 4։8–15) Որեւէ պարգեւ գնահատանքի արտայայտութեան արժանի է. մանաւանդ այն պարգեւը որ մեզ կը զօրացնէ որ շարունակենք Եհովայի ծառայել։ Ուստի, ճամբորդող տեսուչներու աշխատանքին հանդէպ մեր գնահատութիւնը ինչպէ՞ս կրնանք ցոյց տալ։ Ի՞նչ կերպերով կրնանք ցոյց տալ որ ‘այնպիսիները պատուականներու կարգը կը բռնենք’։—Փիլիպպեցիս 2։29
9. Ի՞նչ կերպերով ճամբորդող տեսուչներուն հանդէպ մեր գնահատութիւնը կրնանք ցոյց տալ։
9 Երբ շրջանային տեսուչին այցելութիւնը ծանուցանուի, կրնանք սկսիլ ծրագրել որպէսզի այդ շաբաթ ժողովքի գործունէութիւններուն լիարժէք կերպով մասնակցինք, թերեւս այդ այցելութեան ընթացքին դաշտի ծառայութեան կարգադրութիւններուն թիկունք կանգնելու համար յաւելեալ ժամանակ տրամադրելով։ Այդ ամիս կրնանք ծառայել որպէս օժանդակ ռահվիրայ։ Վստահաբար, շրջանային տեսուչին թելադրութիւնները պիտի ուզենք գործադրել, որպէսզի մեր ծառայութիւնը բարելաւենք։ Այսպիսի ընդունակ հոգի մը օգտակար պիտի ըլլայ մեզի եւ զինք ալ պիտի վստահեցնէ որ իր այցելութիւնը պիտանի է։ Այո, ժողովքներուն տուած շրջանային տեսուչներուն այցելութիւնները մեզ կը կերտեն, բայց իրենք ալ հոգեւորապէս կերտուելու կարիքը ունին։ Պօղոս երբեմն քաջալերութեան կարիքը կը զգար եւ յաճախ Քրիստոնեայ հաւատակիցներէն կը խնդրէր որ իրեն համար աղօթեն։ (Գործք 28։15. Հռովմայեցիս 15։30–32. Բ. Կորնթացիս 1։11. Կողոսացիս 4։2, 3. Ա. Թեսաղոնիկեցիս 5։25) Ներկայիս ալ ճամբորդող տեսուչները մեր աղօթքներուն եւ քաջալերութեան կարիքը ունին։
10. Ինչպէ՞ս կրնանք մեր բաժինը բերել, որպէսզի ճամբորդող տեսուչը իր գործը ուրախութեամբ կատարէ։
10 Շրջանային տեսուչին եւ իր կնոջ բնաւ ըսա՞ծ էք թէ որքա՜ն կը գնահատէք իրենց այցելութիւնը։ Իր տուած օգտակար խրատներուն համար շնորհակալութիւն կը յայտնե՞նք իրեն։ Երբ դաշտի ծառայութեան մասին իր տուած թելադրութիւնը ծառայութեան մէջ մեր ուրախութիւնը աւելցնէ՝ իրեն կ’ըսե՞նք ասիկա։ Եթէ այո, ասիկա իրեն պիտի օգնէ որ իր գործը ուրախութեամբ կատարէ։ (Եբրայեցիս 13։17) Սպանիայէն շրջանային տեսուչ մը ըսաւ որ իրեն եւ իր կնոջ համար որքա՛ն թանկարժէք են այն շնորհակալութեան երկտողները, զորս ստացած են, ժողովքներ այցելելէ ետք։ Ան կ’ըսէ. «Այս բացիկները կը պահենք եւ երբ անտրամադիր ըլլանք, զանոնք կը կարդանք։ Անոնք ի՛րապէս քաջալերութեան աղբիւր մըն են»։
11. Ինչո՞ւ շրջանային եւ նահանգային տեսուչներու կիներուն պէտք է յայտնենք որ իրենք սիրուած եւ գնահատուած են։
11 Ճամբորդող տեսուչին կնոջ համար ալ վստահաբար օգտակար են ձեր գնահատական խօսքերը։ Ծառայութեան այս մարզին մէջ իր ամուսնոյն թիկունք կանգնելու համար ան մեծ զոհողութիւններ ըրած է։ Այս հաւատարիմ քոյրերը անձնական բնակարան մը ունենալու եւ, շատ մը պարագաներու, զաւակներ ունենալու բնական ցանկութենէն հրաժարած են։ Յեփթայէի աղջիկը Եհովայի ծառաներէն մէկն էր, որ ամուսին մը ունենալու եւ ընտանիք մը կազմելու պատեհութենէն յօժարակամօրէն հրաժարեցաւ, իր հօրը ըրած մէկ ուխտին պատճառաւ։ (Դատաւորաց 11։30–39) Անոր ըրած զոհողութիւնը ի՞նչպէս նկատուեցաւ։ Դատաւորաց 11։40–ը կ’ըսէ. «Իսրայէլի մէջ սովորութիւն եղաւ, որ ատեն ատեն Իսրայէլին աղջիկները երթան ու Գաղաադացի Յեփթայէին աղջկանը համար տարին չորս օր լան [«գովեն զինք», ՆԱ]»։ Որքա՜ն լաւ է որ շրջանային եւ նահանգային տեսուչներու կիներուն ըսենք թէ զիրենք կը սիրենք ու կը գնահատենք։
«Հիւրասիրութիւնը Մի՛ Մոռնաք»
12, 13. (ա) Ճամբորդող տեսուչներուն եւ իրենց կիներուն հանդէպ հիւրասիրութիւն ցոյց տալու համար, սուրբ գրային ի՞նչ հիմ ունինք։ (բ) Բացատրեցէք թէ այսպիսի հիւրասիրութիւն ինչպէ՛ս երկուստեք օգտակար կրնայ ըլլալ։
12 Հիւրասիրութիւն ցոյց տալը ուրիշ կերպ մըն է սէր եւ գնահատութիւն ցոյց տալու ուղեւորութեան գործին մէջ եղող Քրիստոնեաներուն։ (Եբրայեցիս 13։2) Յովհաննէս առաքեալ գովեց Գայիոսը, որ ժողովքը այցելող ուղեւոր միսիոնարներուն հանդէպ հիւրասիրութիւն ցոյց տուած էր։ Յովհաննէս գրեց. «Սիրե՛լիս դուն հաւատարմաբար կ’ընես, ինչ որ կ’ընես եղբայրներուն եւ օտարներուն, որոնք եկեղեցիին առջեւ վկայեցին քու սիրոյդ վրայով։ Եթէ աստուածահաճոյ կերպով զանոնք ճամբայ դնես, աղէկ կ’ընես։ Վասն զի Աստուծոյ անուանը համար ճամբայ ելան ու հեթանոսներէն բան մը չեն առներ։ Ուստի մենք պարտաւոր ենք այնպիսիները ընդունիլ, որպէս զի ճշմարտութեանը գործակից ըլլանք»։ (Գ. Յովհաննու 5–8) Ներկայիս, Թագաւորութեան քարոզչութեան նպաստած կ’ըլլանք, նոյնանման հիւրասիրութիւն ցոյց տալով ճամբորդող տեսուչներուն եւ իրենց կիներուն։ Անշուշտ, տեղւոյն երէցները պէտք է վստահ ըլլան որ կեցութեան վայրը հաճելի ըլլայ, բայց նահանգային տեսուչ մը ըսաւ. «Եղբայրներուն հետ մեր յարաբերութիւնը պէտք չէ հիմնուած ըլլայ փոխադարձ ակնկալութեան մը վրայ։ Չենք ուզեր նոյնիսկ այդ տպաւորութիւնը ձգել։ Պէտք է յօժար ըլլանք ընդունելու ոեւէ եղբօր հիւրասիրութիւնը՝ հարուստ թէ աղքատ»։
13 Հիւրասիրութիւնը երկուստեք օգտակար կրնայ ըլլալ։ «Մեր ընտանիքին մէջ, սովորութիւն ունէինք ճամբորդող տեսուչները մեր տունը ընդունելու», կ’ըսէ Ժորժէն, նախկին շրջանային տեսուչ մը, որ հիմա Պէթէլի մէջ կ’աշխատի։ «Կը խորհիմ որ այդ այցելութիւնները շատ աւելի օգնեցին ինծի, քան ինչ որ կը կարծէի այդ ատեն։ Պատանեկութեանս շրջանին, հոգեւոր գետնի վրայ խնդիրներ ունեցայ։ Մայրս շատ մտահոգ էր այս ուղղութեամբ, բայց չէր գիտեր ինչպէս օգնել, ուստի շրջանային տեսուչէն խնդրեց որ հետս խօսի։ Սկիզբը խոյս տուի իրմէ՝ քանի որ քննադատուելէ կը վախնայի։ Բայց իր բարեկամական մօտեցումը վանեց այդ վախս։ Երկուշաբթի օր մը զիս ճաշի հրաւիրեց, եւ ես սիրտս բացի իրեն, վստահ ըլլալով որ պիտի հասկնար զիս։ Ան ուշադրութեամբ մտիկ ըրաւ։ Իր տուած գործնական թելադրութիւնները իրապէս գործի ծառայեցին եւ սկսայ հոգեւոր գետնի վրայ յառաջդիմել»։
14. Ճամբորդող երէցներուն նկատմամբ ինչո՞ւ աւելի գնահատող քան թէ քննադատող պէտք է ըլլանք։
14 Ճամբորդող տեսուչ մը կը ջանայ հոգեւոր գետնի վրայ օգնել երիտասարդներուն եւ տարեցներուն։ Անշուշտ, պէտք է գնահատենք իր ջանքերը։ Սակայն, երբ իր ունեցած տկար կողմերուն համար սկսինք զինք քննադատել, կամ զինք աննպաստ կերպով բաղդատենք նախապէս մեզ այցելած տեսուչներուն հետ, արդիւնքը ի՞նչ կ’ըլլայ։ Շատ հաւանաբար, ասիկա վհատեցուցիչ պիտի ըլլայ իրեն համար։ Պօղոսի համար քաջալերական չէր իր գործին մասին քննադատութիւններ լսել։ Այնպէս կը թուի որ Կորնթացի Քրիստոնեաներէն ոմանք իր երեւոյթին կամ խօսելու կարողութեան մասին կը չարախօսէին։ Ինք անձամբ մէջբերեց անոնց քննադատական կարգ մը արտայայտութիւնները. «Անոր թուղթերը, . . . ծանր ու զօրաւոր են, բայց անոր մարմնին երեւոյթը տկար է ու խօսքը՝ անարգ»։ (Բ. Կորնթացիս 10։10) Բարեբախտաբար, սակայն, ճամբորդող տեսուչները սովորաբար գնահատական սիրալիր խօսքեր կը լսեն։
15, 16. Ճամբորդող տեսուչներուն ու անոնց կիներուն վրայ ի՞նչ ազդեցութիւն կ’ունենայ իրենց հաւատակիցներուն ցուցաբերած սէրն ու նախանձախնդրութիւնը։
15 Լատին Ամերիկայի մէջ շրջանային տեսուչ մը, ֆէտայիներու հսկողութեան ներքեւ եղող շրջանի մը մէջ իր հոգեւոր եղբայրները եւ քոյրերը այցելելու համար, ամբողջ օր մը տիղմոտ արահետներէն կը քալէ յոգնած–դադրած վիճակի մէջ։ Ան կը գրէ. «Շատ յուզիչ է տեսնել այցելութեան հանդէպ եղբայրներուն ցուցաբերած գնահատութիւնը։ Թէեւ հոն հասնելու համար կը ճգնիմ, շատ վտանգներ եւ դժուարութիւններ դիմակալելով, բայց եղբայրներուն սէրը եւ ցուցաբերած նախանձախնդրութիւնը տեսնելով՝ վարձատրուած կը զգամ»։
16 Ափրիկէէն շրջանային տեսուչ մը կը գրէ. «Մեզի հանդէպ եղբայրներուն ցուցաբերած սիրոյն պատճառաւ, Թանզանիոյ թաղամասը շա՜տ սիրեցինք։ Եղբայրները մեզմէ սորվելու պատրաստակամութիւնը ունէին եւ ուրախ էին իրենց տան մէջ մեզ ընդունելով»։ Պօղոս առաքեալի եւ առաջին դարու Քրիստոնեայ ամոլի մը՝ Ակիւղասի եւ Պրիսկէի, միջեւ սիրալիր եւ հաճելի յարաբերութիւն մը կար։ Արդարեւ, Պօղոս անոնց մասին ըսաւ. «Բարեւ ըրէք Պրիսկէին ու Ակիւղասին Քրիստոս Յիսուսով իմ գործակիցներուս. (Որոնք իմ կեանքիս համար իրենց պարանոցները տուին. որոնցմէ ոչ միայն ես շնորհակալ կ’ըլլամ, հապա հեթանոսներուն բոլոր եկեղեցիներն ալ)»։ (Հռովմայեցիս 16։3, 4) Ճամբորդող տեսուչները եւ իրենց կիները երախտապարտ են որ արդի Ակիւղասի եւ Պրիսկէի նման բարեկամներ ունին, որոնք մասնայատուկ ջանք կը թափեն հիւրասիրութիւն ցոյց տալու եւ իրենց ընկերակցելու համար։
Ժողովքները Ամրապնդել
17. Ինչո՞ւ կրնանք ըսել որ ճամբորդող տեսուչներու կարգադրութեան ետին իմաստութիւն կայ, եւ անոնք ո՞ւրկէ հրահանգներ կը ստանան։
17 Յիսուս ըսաւ. «Իմաստութիւնը արդարացաւ իր որդիներէն [«գործերէն», ՆԱ]»։ (Մատթէոս 11։19) Ճամբորդող տեսուչներու կարգադրութեան ետին գտնուող իմաստութիւնը բացայայտ է, Աստուծոյ ժողովուրդին ժողովքները ամրապնդելու համար անոր բերած նպաստէն։ Պօղոսի միսիոնարական երկրորդ ճամբորդութեան ընթացքին, ինք եւ Շիղա ‘Սուրիոյ ու Կիլիկիոյ մէջ կը պտըտէին ու եկեղեցիները կը հաստատէին’։ Գործք Առաքելոց գիրքը կ’ըսէ. «Կարգ մը քաղաքներէ անցնելով, Երուսաղէմ եղած առաքեալներէն ու երէցներէն ապսպրուած հրամանները կ’աւանդէին անոնց որ պահեն։ Եկեղեցիներն ալ հաւատքի մէջ կը հաստատուէին եւ օրէ օր անոնց թիւը կ’աւելնար»։ (Գործք 15։40, 41. 16։4, 5) Ներկայ ճամբորդող տեսուչները Աստուածաշունչէն ու «հաւատարիմ ու իմաստուն ծառայ»ին հրատարակութիւններէն հոգեւոր հրահանգներ կը ստանան, ինչպէս մնացեալ բոլոր Քրիստոնեաները։—Մատթէոս 24։45
18. Ճամբորդող տեսուչները ինչպէ՞ս կ’ամրապնդեն ժողովքները։
18 Այո, ճամբորդող տեսուչները պէտք է շարունակաբար կերակրուին Եհովայի հոգեւոր սեղանէն։ Անոնք Աստուծոյ կազմակերպութեան հետեւած կերպերուն եւ ուղեգծերուն լաւ ծանօթ պէտք է ըլլան։ Այդ պարագային, անոնք իրական օրհնութիւն մը կրնան ըլլալ ուրիշներուն։ Դաշտի ծառայութեան մէջ իրենց ցուցաբերած նախանձախնդրութեամբ օրինակ հանդիսանալով, անոնք կրնան օգնել իրենց հաւատակիցներուն, որ քրիստոնէական ծառայութեան մէջ բարելաւումներ ընեն։ Այս այցելու երէցներուն տուած սուրբ գրային դասախօսութիւնները լսողները հոգեւոր գետնի վրայ կը կերտեն։ Ուրիշներուն օգնելով որ Աստուծոյ Խօսքին գեղեցիկ խրատները կիրարկեն, համայն աշխարհի Եհովայի ժողովուրդին հետ համերաշխութեամբ ծառայեն ու ‘հաւատարիմ ծառային’ միջոցաւ Աստուծոյ տուած հոգեւոր հայթայթումները լաւ կերպով գործածեն, ճամբորդող տեսուչները իրենց այցելած ժողովքները կ’ամրապնդեն։
19. Ո՞ր հարցումները նկատողութեան արժանի են։
19 Երբ շուրջ հարիւր տարի առաջ, Եհովայի կազմակերպութիւնը Աստուածաշունչի Աշակերտներուն մէջ ճամբորդող երէցներու գործունէութիւնը հաստատեց, այս պարբերաթերթը նշեց. «Մենք արդիւնքին եւ Տիրոջ յաւելեալ առաջնորդութեան պիտի սպասենք»։ Եհովայի առաջնորդութիւնը բացայայտ եղած է։ Իր օրհնութեան եւ Կառավարիչ Մարմինի վերահսկողութեան շնորհիւ, այս գործը ընդլայնած եւ տարիներու ընթացքին յղկուած է։ Որպէս հետեւանք, համայն աշխարհի Եհովայի Վկաներու ժողովքները հաւատքի մէջ հաստատուած են եւ անոնց թիւը օրէ օր կ’աւելնայ։ Բացայայտօրէն, Եհովա կ’օրհնէ մարդկային այս պարգեւներուն անձնազոհ հոգին։ Սակայն, ճամբորդող տեսուչները ինչպէ՞ս կրնան յաջողապէս կատարել իրենց գործը։ Ի՞նչ նպատակակէտ կը հետապնդեն։ Ինչպէ՞ս կրնան մեծագոյն օգուտը իրագործել։
Ինչպէ՞ս Պիտի Պատասխանէիք
◻ Շրջանային եւ նահանգային տեսուչներուն կարգ մը պարտականութիւնները ի՞նչ են։
◻ Ճամբորդող տեսուչները ի՞նչու անձնազոհ հոգի պէտք է ունենան։
◻ Ճամբորդող տեսուչներուն եւ իրենց կիներուն հանդէպ մեր գնահատանքը ինչպէ՞ս կրնանք յայտնել։
◻ Ճամբորդող տեսուչները ի՞նչ կրնան ընել ժողովքները հաւատքի մէջ հաստատելու համար։
[Նկար՝ էջ 20]
Անդադար ճամբորդութեան մէջ ըլլալը անձնազոհ հոգի մը ունենալ կը պահանջէ
[Նկար՝ էջ 23]
Ճամբորդող տեսուչներուն եւ իրենց կիներուն հիւրասիրութիւն ցոյց տուա՞ծ էք