Ուրիշներու Օգնենք Որ Աստուածաշունչի Արժէքը Գնահատեն
1 Յիսուս իր աշակերտներուն պէտք եղածը հայթայթեց։ Ղուկաս 24։45–ը կը տեղեկագրէ. «Անոնց միտքը բացաւ որպէսզի գրքերը հասկնան»։ Ան գիտէր որ եթէ անոնք կ’ուզէին իր Հօր հաճութիւնը ունենալ, անհրաժեշտ էր որ Աստուծոյ Խօսքը՝ Աստուածաշունչը՝ ուսումնասիրէին եւ հասկնային։ (Սաղմ. 1։1, 2) Մեր քարոզչութեան գործը նոյն նպատակը ունի։ Մեր նպատակակէտն է Աստուածաշունչի ուսումնասիրութիւններ սկսիլ, ուր կրնանք ‘մարդոց սորվեցնել որ այն բոլոր բաները պահեն՝ ինչ որ Յիսուս պատուիրեց’։ (Մատթ. 28։20) Ասիկա ի մտի ունենալով, հետեւեալը կարգ մը թելադրութիւններ է որոնք կրնան օգտակար ըլլալ երբ վերայցելութիւններ կ’ընես։
2 Եթէ առաջին հանդիպումին նկատի առիր «Աստուածաշունչը—Աստուծո՞յ Խօսքն Է, թէ՝ Մարդոց» գիրքը, կրնաս խօսկցութիւնդ շարունակել այս կերպով.
◼ «Կը փափաքիմ քեզի ցոյց տալ ուրիշ բան մը որ կը լուսաբանէ Աստուածաշունչի խրատին գործնական արժէքը։ Շատեր դժուար կը գտնեն համերաշխ ըլլալը ուրիշներու հետ։ Ի՞նչ կրնանք ընել մեր շուրջ գտնուող անհատներու հետ աւելի լաւ յարաբերութիւններ զարգացնելու համար։ [Պատասխան ստանալէ ետք, բաց էջ 168, պարբերութիւն 15, եւ կարդա Մատթէոս 7։12–ը։ Յիշէ կարգ մը գաղափարներ որոնք 16–րդ պարբերութեան մէջ արտայայտուած են։] Ասիկա յաւելեալ օրինակ մըն է Աստուածաշունչի խրատին իմաստութեան մասին։ Յաջորդ այցելութեան, կը փափաքիմ քեզի ցոյց տալ Աստուածաշունչի մատուցած խրատը օգնելու համար զոյգերուն որ իրենց ամուսնութեան մէջ աւելի մեծ ուրախութիւն գտնեն»։ Կարգադրութիւններ ըրէ վերադառնալու համար որպէսզի նկատի առնէք 170–172–րդ էջերը, որոնք ցոյց կու տան ինչ որ Աստուածաշունչը կը յանձնարարէ ընտանեկան ուրախ կեանքի մը համար։
3 Եթէ խօսեցար անհատի մը հետ որ հետաքրքրութիւն ցուցաբերեց Աստուածաշունչի հանդէպ, թերեւս այս մօտեցումը կրնայ ազդեցիկ ըլլալ ուսումնասիրութիւն մը սկսելու համար.
◼ «Գրեթէ բոլոր անոնք որոնց հետ կը խօսակցիս, քեզի պիտի ըսեն որ իրենք կը փափաքին խաղաղ եւ ապահով աշխարհ մը ունենալ, որու մէջ ապրին։ Եթէ այդ է ինչ որ ամէն անհատ կ’ուզէ, ինչո՞ւ աշխարհ մը ունինք որ լեցուած է այսքան խռովութեամբ եւ վայրագութեամբ։ [Թոյլ տուր որ պատասխանէ։] Նոր Աշխարհի Թարգմանութիւնը քեզի ցոյց կու տայ թէ Աստուածաշունչի մէջ ո՛ւր կրնաս այդ հարցումին պատասխանը գտնել»։ Բաց էջ 1659 եւ մատնանշէ «Աստուածաշունչի Խօսակցութեան Բնաբաններ» բաժինին թիւ 43ա–ին, «Ո՛վ Է Պատասխանատուն Աշխարհի Տագնապին Համար»։ Կարդա Բ. Կորնթացիս 4։4–ը։ Բացատրէ թէ ի՛նչպէս Աստուած պիտի բնաջնջէ Բանսարկուն եւ պիտի բերէ մնայուն խաղաղութեան եւ ուրախութեան աշխարհ մը։ Կարդա Յայտնութիւն 21։3, 4–ը։ Ապա կրնաս ըսել. «Յաջորդ այցելութեան, կը փափաքիմ քեզի ցոյց տալ կարգ մը համարներ որոնք կը բացատրեն թէ ինչո՛ւ կրնաս յուսալ նեղութենէ զերծ աշխարհ մը»։
4 Եթէ ուղղակի մօտեցումը գործածեցիր ուսումնասիրութիւն մը սկսելու համար եւ լաւ ընդառաջում կար, կրնաս ասիկա ըսել երբ կը վերադառնաս.
◼ «Նախապէս երբ խօսակցեցանք, նկատի առինք կարգ մը պատճառներ թէ ի՛նչու օգտակար է որ Աստուածաշունչը ուսումնասիրենք։ Ասիկա աւելի ընելու անկեղծ ջանքը կրնայ մեզի օգնել որ գնահատենք ինչ որ Աստուած մեզի համար վերապահած է։ [Կարդա Յովհաննու 17։3–ը։] Մենք զարգացուցած ենք Աստուածաշունչի ուսումնասիրութեան յայտագիր մը որ հազարաւորներու օժանդակած է որ աւելի սորվին Աստուծոյ խոստումներուն մասին եւ թէ ի՛նչպէս կրնանք զինք հաճեցնել»։ Ցոյց տուր Գիտութիւն գիրքը, վերաքաղ ըրէ խորագիրները եւ ցուցադրէ ի՛նչպէս Աստուածաշունչի ուսումնասիրութիւն մը կը վարենք։
5 Եթէ կարենաս անկեղծ անհատներու օգնել որ գնահատեն Աստուծոյ Խօսքին գերազանց արժէքը, անոնց օգնած պիտի ըլլաս կարելի եղած լաւագոյն կերպով։ Անոր էջերը ուսումնասիրելով ձեռք ձգուած իմաստութիւնը կրնայ «կենաց ծառ» ըլլալ, որ իրենց երջանկութիւն պիտի բերէ։—Առ. 3։18