«Ձեր Լաւագոյնը Ըրէ՛ք»
1 Երբ մենք մեզ Եհովայի նուիրեցինք, խոստացանք մեր լաւագոյնը տալ իրեն։ Տեղին ըլլալով, Պետրոս առաքեալ առաջին դարու Քրիստոնեաները քաջալերեց որ իրենց լաւագոյնը ընեն, որպէսզի Եհովայի առջեւ իրենց կեցուածքը հաստատ պահեն։ (Բ. Պետ. 1։10, ՆԱ) Այսօր ալ Եհովան հաճեցնելու համար, վստահաբար կ’ուզենք մեր լաւագոյնը ընել իր ծառայութեան մէջ։ Ասիկա ի՞նչ կը պարփակէ։ Մինչ Եհովայի հետ մեր յարաբերութիւնը կը խորանայ եւ մեզի համար իր բոլոր ըրած բաներուն վրայ կը խոկանք, մեր սիրտը կը մղէ մեզ որ մեր լաւագոյնը ընենք իր ծառայութեան մէջ։ Կը փափաքինք մեր ծառայութեան որակը բարելաւել, եւ եթէ կարելի է՝ քանակն ալ աւելցնել։—Սաղմ. 34։8. Բ. Տիմ. 2։15, ՆԱ։
2 Երիտասարդ եղբայր մը, որ ուզեց իր ծառայութիւնը աւելցնել, նկատեց որ Աստուծոյ Խօսքին կանոնաւոր ուսումնասիրութիւնը Եհովայի հանդէպ իր գնահատութիւնը աւելցուց եւ իր մէջ աւելի մեծ եռանդ քանդակեց։ Ասիկա զինք մղեց որ ռահվիրայական ծառայութեան ձեռնարկէ։ Օտարականներու հետ խօսելու դժուարութիւն ունեցող քոյր մը, Պատճառաբանել գրքի կարգ մը ներկայացումները փորձ ընելով, շուտով ծառայութեան մէջ աւելի մեծ յաջողութիւն վայելեց։ Ան սկսաւ Աստուածաշունչի ուսումնասիրութիւն մը վարել ամոլի մը հետ, որ ճշմարտութիւնը ընդունեց։
3 Որքան որ Կրնաք Ընել, Անով Ուրախացէք. Մեզմէ ոմանք դժուար պարագաներ կը դիմագրաւեն, ինչպէս՝ տկար առողջութիւն, ընտանեկան հակառակութիւն, աղքատութիւն կամ թաղամասին մէջ անտարբերութիւն։ Այս վերջին օրերու մէջ սովորական եղող ուրիշ դժուարութիւններ, կրնան մեր ծառայութեան արգելք հանդիսանալ։ (Ղուկ. 21։34, ՆԱ, ստորանիշ. Բ. Տիմ. 3։1) Ասիկա կը նշանակէ՞ որ մեր նուիրումին մէջ ձախողած ենք։ Ո՛չ, եթէ Եհովայի ծառայելու մէջ մեր լաւագոյնը կ’ընենք։
4 Իմաստութիւն չէ որ մենք մեզ դատենք ուրիշներու իրագործածին համաձայն։ Այլ՝ Սուրբ Գրութիւնները կը քաջալերեն մեզ, ըսելով. «Ամէն մարդ իր գործը թող կշռէ»։ Մեր անհատական կարողութեան ներածին չափ մեր անձերէն լիովին մատուցանելը կը հաճեցնէ Եհովան եւ մեզի «ուրախութեան պատճառ» կու տայ։—Գաղ. 6։4, ՆԱ. Կող. 3։23, 24
5 Թող որ Պետրոսի խօսքերուն ուշադրութիւն ընծայենք, մեր լաւագոյնը ընելով որ Աստուած մեզ «անբիծ ու անարատ գտնէ խաղաղութիւնով»։ (Բ. Պետ. 3։14) Այդ հոգին մեզի ապահովութեան զգացում պիտի տայ եւ այնպիսի մտքի խաղաղութիւն մը պիտի բերէ, որ միայն Եհովա կրնայ տալ։—Սաղմ. 4։8