«Ամբողջովին Պատրաստուած՝ Ամէն Բարի Գործերու Համար»
1 Ներկայիս, Եհովայի ժողովուրդը օրհնուած է հոգեւոր առատ ճոխ սնունդով։ (Եսայ. 25։6) Անձնական եւ ընտանեկան ուսումնասիրութեամբ, ինչպէս նաեւ՝ ժողովքային հանդիպումներուն ու համաժողովներուն միջոցաւ Աստուածաշունչի վրայ հիմնուած ահագին նիւթեր կը վայելենք։ Բայց արդեօք այս ամբողջ հոգեւոր սնունդէն լաւագոյնս կ’օգտուի՞նք, որպէսզի ‘լիովին ատակ, ամբողջովին պատրաստուած ըլլանք ամէն բարի գործերու համար’։—Բ. Տիմ. 3։17, ՆԱ։
2 Պահ մը խորհեցէք 1998–ի տարուան հոգեւոր ցուցակին մասին, որ արդէն իսկ իր կիսուն հասած է։ Ժողովքի շաբաթական հանդիպումներու ընթացքին, քրիստոնէական Յունարէն գրութիւններուն 23 գրքերէն, նաեւ Ծանուցանողներ գրքին 138 էջերէն կարգ մը աչքառու կէտեր նկատի կ’առնենք։ Ինչպէս նաեւ վերաքաղ կ’ընենք Գիտութիւն գրքին մէկ երրորդը, Ընտանեկան Ուրախութիւն գրքին գրեթէ բոլորը, եւ Աստուածաշունչը— Աստուծո՞յ Խօսքն Է, թէ՝ Մարդոց գիրքը ամբողջութեամբ։ Ասկէ զատ, Մեր Թագաւորութեան Ծառայութիւնը թերթիկին 12 թիւերը, Դիտարան–ի ուսումնասիրութեան 52 յօդուածները, եւ գրեթէ նոյնքան Աստուածաշունչի վրայ հիմնուած այլազան հանրային դասախօսութիւններն ալ հոգեւորապէս կը սնուցանեն մեզ։ Այս բոլորին վրայ, կան նաեւ համաժողովներու ճոխ յայտագիրներ։ Հոգեւոր լաւ բաներու ի՜նչ առատութիւն մատչելի է մեզի։
3 Գնահատենք Եհովայի Կարգադրութիւնները. Լիովին օգտուելու համար պէտք է հասկնանք թէ Եհովա ինչո՛ւ այսքան առատ հոգեւոր հայթայթում ըրած է։ Այսպիսի լաւ բաներով սնուցանուիլը մեր հաւատքը կը կերտէ ու իր հետ մեր յարաբերութիւնը կը զօրացնէ։ (Ա. Տիմ. 4։6) Սակայն, հոգեւոր սնունդը պարզապէս միայն մեր դաստիարակութեան համար հայթայթուած չէ։ Անիկա կը մղէ մեզ որ ուրիշներուն հետ ճշմարտութիւնը բաժնենք եւ մեզ կը պատրաստէ որ ասիկա ազդու կերպով ընենք, որպէս բարի լուրի քարոզիչներ։—Բ. Տիմ. 4։5
4 Թող որ չանտեսենք մեր հոգեւոր պէտքերը, հապա միշտ Եհովայի սեղանին վրայ գտնուող հոգեւորապէս ճոխ եւ գոհացուցիչ հայթայթումներուն հանդէպ զօրաւոր փափաք մշակենք։ (Մատթ. 5։3. Ա. Պետ. 2։2) Լիովին օգտուելու համար, պահանջուած է բաւարար ժամանակ յատկացնել, Աստուածաշունչի անձնական եւ ընտանեկան կանոնաւոր ուսումնասիրութեան եւ ժողովներու ներկայ գտնուելու նման հարցերու։ (Եփ. 5։15, 16) Այսպէս ընելու ուրախալի վարձատրութիւնները ներդաշնակ պիտի ըլլան Եբրայեցի հաւատարիմ Քրիստոնեաներուն գրած Պօղոսի ներշնչեալ քաջալերութեան հետ, որ արձանագրուած է Եբրայեցիս 13։20, 21–ի մէջ։