Մեր Վճռակամութիւնն Է՝ Եհովայի Ընդունելի Ապրելակերպը Հետապնդել

¹ «Աստուծոյ Ընդունելի Ապրելակերպը» բնաբանով Նահանգային Համաժողովներուն ուշագրաւ մէկ երեսակն էր, փակման դասախօսութեան մէջ որդեգրուած որոշումը։ Անիկա սկսաւ հետեւեալ յայտարարութեամբ. «Մենք՝ . . . բոլոր սրտով կ’ընդունինք որ Աստուծոյ ճամբան լաւագոյն ապրելակերպն է»։ Վերյիշեցէք այդ որոշումէն կարգ մը աչքառու կէտեր, որոնց «ԱՅՈ՛» պատասխանեցինք։

² Վճռած ենք Եհովայի աչքին մաքուր մնալ, աշխարհէն անարատ ըլլալով։ Պիտի շարունակենք Աստուծոյ կամքը մեր կեանքերուն մէջ առաջնակարգ տեղը դնել։ Իր Խօսքը՝ Աստուածաշունչը՝ գործածելով որպէս մեր ուղեցոյցը, աջ կամ ձախ պիտի չխոտորինք, այսպիսով հաստատելով թէ Աստուծոյ ճամբան՝ աշխարհի ճամբէն շատ գերակայ է։

³ Ընդհանուր առմամբ, աշխարհ կ’անտեսէ Աստուծոյ ընդունելի ապրելակերպը եւ անոր հետեւանքները կը քաղէ։ (Երեմ. 10։23) Հետեւաբար պէտք է շարունակենք մեր Մեծ Ուսուցիչէն՝ Եհովայէ՝ սորվիլ, որ կ’ըսէ. «Ասիկա է ճամբան, ասկէ քալեցէք»։ (Եսայ. 30։21) Աստուածաշունչին մէջ բացատրուած Եհովայի ընդունելի ապրելակերպը, ամէն մարզի մէջ աւելի գերակայ է։ Այդ ապրելակերպը հետապնդելու համար, պայման է որ Եհովայի մեզի սորվեցուցած բոլոր բաներէն լիովին օգտուինք։

⁴ Եհովայի Ուսուցման Գերադաս Յայտագիրը. Եհովա մեզի կը սորվեցնէ կեանքի իրական նպատակը եւ մեր կեանքէն լաւագոյնս օգտուելու համար զայն գործածելու կերպը։ Ան մեզի կը սորվեցնէ թէ ի՛նչպէս կրնանք մեր մտային, բարոյական ու հոգեւոր կեանքին որակը բարելաւել։ Մեզի կը սորվեցնէ թէ ի՛նչպէս մեր եղբայրներուն, ընտանիքին եւ ընկեր արարածին հետ կրնանք խաղաղութեամբ ապրիլ։ Եհովա ասիկա կ’ընէ իր դասագրքին՝ Աստուածաշունչին՝ եւ իր կազմակերպութեան միջոցաւ։

⁵ Այս առնչութեամբ, մեր ժողովքային հանդիպումները մեծ կարեւորութիւն ունին։ Երբ կանոնաւորաբար ներկայ կը գտնուինք ու կը մասնակցինք բոլոր հինգ ժողովներուն, որպէս բարի լուրի քարոզիչներ ընդարձակ մարզում կը ստանանք, ինչպէս նաեւ, հաւասարակշռուած կրթութիւն՝ քրիստոնէական կենցաղի նկատմամբ։ (Բ. Տիմ. 3։16, 17) Մեր Մեծ Ուսուցիչը աստուածպետական յաւելեալ ուսուցում կը հայթայթէ համաժողովներու միջոցաւ։ Մեր նպատակակէտը պէտք է ըլլայ երբեք ժողով մը կամ համաժողովի մը յայտագրին որեւէ մասը չկորսնցնել, անշուշտ եթէ մեր առողջութիւնը եւ պարագաները կը ներեն ասիկա։

⁶ Թող որ յառաջիկայ օրերուն, ժրաջանօրէն շարունակենք Աստուծոյ ընդունելի ապրելակերպը հետապնդել, ասիկա ընելով Եհովայի փառաբանութեան եւ մեր յաւիտենական օգտին համար։—Եսայ. 48։17