Ուրիշներուն Սորվեցնենք որ Իրենց Անձերուն Օգտակար Դառնան

¹ Եհովա կ’ուզէ որ բոլոր մարդիկ իրենց անձերուն օգտակար դառնան։ (Եսայ. 48։17) Ան գիտէ թէ ի՛նչ բան մեզի իսկական ուրախութիւն կու տայ։ Ան սրտանց կը փափաքի որ մարդիկ չարիքէն խուսափին եւ կեանքը վայելեն, իր պատուիրաններուն ուշադրութիւն ընծայելով։ Մեր կեանքը Աստուծոյ ուզած կերպով ապրելով մեր անձին մեծապէս օգտակար կ’ըլլանք։ (Սաղմ. 34։8) Ի՞նչպէս կրնանք ուրիշներուն ալ սորվեցնել որ նոյնը ընեն։

² Մարդիկ Ի՞նչ կ’Ուզեն. Ձեր ապրած շրջանի մարդոց ի՞նչ բան կը հետաքրքրէ։ Իրենց տան ապահովութիւնը, իրենց ամուսնութեան դիմացկունութիւնը, իրենց զաւակներուն ապագան կամ նման հարցեր չե՞ն։ Երբ խնդիրներ ունենան, անոնք ո՞ւր կը դիմեն։ Թերեւս անոնք կը վստահին իրենց անձերուն, ինքնանպաստ յայտագիրներու, կամ ուրիշներու առաջնորդութեան։ Մինչ այդ, իրենց օգտակար եղած բաներուն մասին տրուած՝ իրար հակասող եւ անգործնական գաղափարներու պատճառաւ շատեր շփոթութեան կը մատնուին։ Պէտք է զիրենք համոզենք որ Աստուծոյ Խօսքին տուած առաջնորդութիւնը շատ աւելի լաւ է։ (Սաղմ. 119։98) Ասիկա կրնանք ընել, անոնց ցոյց տալով թէ ի՛նչպէս կրնան նոյնիսկ հիմա իրենց կեանքի որակը բարելաւել, եթէ Աստուածաշունչը ուսումնասիրելու եւ անոր ըսածը գործադրելու ջանքը թափեն։—Բ. Տիմ. 3։16, 17

³ Ընտանեկան Կեանքի Բարելաւում. Քիչեր կը գիտակցին որ Եփեսացիս 5։22–6։4–ի ներշնչուած խրատները որքան գործնական են ընտանեկան խնդիրներ լուծելու համար։ Զոյգի մը պարագան այս էր, որ տասը տարուան ամուսնութենէ ետք, որոշեցին իրարմէ զատուիլ։ Սակայն, կնոջ հետ Աստուածաշունչի ուսումնասիրութիւն մը սկսուեցաւ, եւ ան ամուսնական կեանքին առնչութեամբ սուրբ գրային սկզբունքներ սորվեցաւ։ Երբ ան Աստուածաշունչի սկզբունքները կիրարկելու սկսաւ, ամուսինը շուտով նշմարեց կատարուած փոփոխութիւնները, եւ ուսումնասիրութեան միացաւ։ Ամուսինը հետագային ըսաւ. «Այժմ, ընտանեկան կեանքի իսկական ուրախութեան հիմը գտանք»։

⁴ Կեանքի Մէջ Իսկական Նպատակ. Երբ երիտասարդ թմրեցուցիչի մոլի մը Վկաներէն օգնութիւն խնդրեց, ան սորվեցաւ թէ Եհովա անհատապէս իրմով հետաքրքրուած էր։ Ան ըսաւ. ‘Սորվեցայ թէ Արարիչը մարդուն համար նպատակ մը ունի, եւ անոնց որոնց կը հաճի յաւիտենական կեանք կը խոստանայ։ Չէք կրնար երեւակայել ասիկա որքա՜ն ուրախացուց զիս։ Ներկայիս լաւ առողջութիւն ու մտքի խաղաղութիւն, ու Աստուծոյ հետ սերտ յարաբերութիւն կը վայելեմ’։

⁵ Ամէն ոք կրնայ օգտուիլ Աստուծոյ Խօսքին մատուցած գործնական օգնութենէն։ Զայն որպէս մեր ուղեցոյցը գործածելով, կ’ապացուցանենք որ Եհովայի ճամբան աշխարհի ճամբաներէն շա՛տ գերիվեր է։ (Սաղմ. 116։12) Մեր առանձնաշնորհումն է այս պատգամը ուրիշներուն հաղորդել, անոնց սորվեցնելով որ իրենց անձերուն օգտակար դառնան։ Մինչ ասիկա կ’ընենք, շատ լաւ արդիւնքներ ձեռք պիտի ձգենք։