Եհովայի Անաչառութիւնը Ընդօրինակենք
1 Եհովա իր ժողովուրդով հետաքրքրուած է։ Ան անաչառօրէն կ’ընդունի իր կամքը կատարող ոեւէ անհատ։ (Գործք 10։34, 35) Երբ Յիսուս մարդոց կը քարոզէր, ան ալ անաչառ էր։ (Ղուկ. 20։21) Անոնց օրինակին պէտք է հետեւինք, ինչպէս՝ Պօղոս, որ գրեց. «Ամենուն Տէրը նոյնն է, որ առատութեամբ կը հասնի անոնց, որոնք իրեն կը կանչեն»։—Հռովմ. 10։12
2 Աստուծոյ Թագաւորութեան բարի լուրը մեր հանդիպած բոլոր մարդոց ծանուցանելը, Աստուծոյ փառք կը բերէ։ Այս հոյակապ պատգամը պէտք է շարունակենք ուրիշներու հետ բաժնել, ի՛նչ ալ ըլլայ անոնց ցեղը, ընկերային մակարդակը, ուսումը կամ տնտեսական վիճակը։ (Հռովմ. 10։11-13) Ասիկա կը նշանակէ մտիկ ընողներուն՝ այրերուն, կիներուն, դեռատիներուն եւ տարեցներուն՝ քարոզել։ Ամէն դուռ պէտք է զարնենք, իւրաքանչիւր տանտիրոջ ճշմարտութիւնը լսելու պատեհութիւն տալու համար։
3 Ամէն Անհատով Հետաքրքրուեցէք. Մեր նպատակակէտն է կարելի եղածին չափ ամէն անհատի հետ շփման մէջ գալ։ Ասիկա ի մտի ունենալով, կարգ մը հրատարակիչներ յաջողած են մարդոց վկայել՝ բժիշկի մը գրասենեակին, հիւանդանոցներու, խնամատուներու, բարեկեցութեան գրասենեակներու եւ վերակազդուրման կայաններու մէջ։ Ասկէ զատ, հրատարակիչներ վկայած են՝ յուղարկաւորութիւնը տնօրինողներու, դպրոցի տեսուչներու, խրատատուներու եւ դատաւորներու։ Երբ պաշտօնի վրայ եղող անհատներու մօտենաք, յարմար է որ համայնքին մէջ իրենց հայթայթած օգտակար ծառայութիւններուն համար ձեր գնահատութիւնը արտայայտէք։ Յարգալից եղէք, եւ ընտրեցէք այնպիսի այժմէական յօդուածներ, որոնք իրենց աշխատանքին եւ անոր հետ առնչուած խնդիրներուն հետ կապ ունին։
4 Առիթով մը, քոյր մը կրցաւ դատաւորի մը հետ խօսիլ անոր գրասենեակին մէջ։ Վառ խօսակցութենէ մը ետք, ան այս խօսքերը ըսաւ. «Գիտէ՞ք Եհովայի Վկաներուն ինչը կը սիրեմ։ Անոնք հիմնաւորուած սկզբունքներ ունին, որոնցմէ չեն շեղիր»։ Այս հեղինակաւոր անձնաւորութեան հոյակապ վկայութիւն մը տրուեցաւ։
5 Մարդոց սրտերը չենք կրնար կարդալ։ Սակայն, մեր հանդիպած բոլոր մարդոց հետ խօսելով, մեր գործը ուղղելու Աստուծոյ կարողութեան հանդէպ մեր հաւատքը ցոյց կու տանք։ Ասկէ զատ, ասիկա յոյսի պատգամը լսելու եւ անոր ընդառաջելու առանձնաշնորհումը կու տայ մարդոց։ (Ա. Տիմ. 2։3, 4) Թող որ մեր ժամանակը իմաստութեամբ գործածենք եւ ջանանք Եհովայի անաչառութիւնը ընդօրինակել՝ որքան որ կրնանք բոլոր մարդոց բարի լուրը հասցնելով։—Հռովմ. 2։11. Եփ. 5։1, 2