Ուշադրութիւն Ընծայեցէ՛ք Սրբազան Պատգամներուն

¹ Մարդոց խօսած բոլոր բաները յատուկ ուշադրութեան արժանի չեն։ Բայց երբ Աստուած կը խօսի, մտիկ ընելու կենսական պատճառ ունինք։ (Բ. Օր. 28։1, 2) Բարեբախտաբար, ներշնչեալ գրողներ «Աստուծոյ պատգամները» արձանագրեցին մեր օգտին համար։ (Հռովմ. 3։2) Յառաջիկայ նահանգային համաժողովը թանկագին պատեհութիւններ պիտի հայթայթէ մեզի, որ այս պատգամները լսենք մինչ անոնք կ’ընթերցանուին կամ կը քննարկուին։ Ի՞նչպէս կրնաք ուշի ուշով ունկնդրել։

² Ամէն Առաւօտ Կանուխ Եկէք. Երեւակայեցէք թէ Իսրայելացիները որքա՛ն ոգեւորուած ըլլալու էին, երբ անոնց ըսուեցաւ որ Սինա Լերան ստորոտը Եհովայի առջեւ կենան, իր Օրէնքը լսելու համար։ (Ել. 19։10, 11, 16-19) Եթէ նահանգային համաժողովներուն Եհովայի հրահանգները ստանալու նկատմամբ նման կեցուածք մը ունիք, կարգադրութիւններ պիտի ընէք որ ամէն առաւօտ կանուխ գաք։ Ամբողջ յայտագիրը լսած չենք ըլլար եթէ ուշ գանք եւ ուրիշները խանգարենք, ջանալով նստարան գտնել։ Համաժողովի վայրին դռները պիտի բացուին կ.ա. ժամը 8։00–ին, իսկ յայտագիրը կը սկսի ամէն օր կ.ա. ժամը 9։30–ին։

³ Նոյնիսկ կանուխ եկողներէն ոմանք, յայտագիրը սկսած ատեն իրենց տեղերը նստած չեն ըլլար։ Ինչո՞ւ։ Անոնք կը սպասեն մինչեւ որ ատենապետը բացման երգեցողութիւնը ներկայացնէ, ապա, իրենց բարեկամներուն հետ խօսակցութիւնը կը դադրեցնեն եւ կը սկսին դէպի իրենց նստարանները ուղղուիլ։ Նկատի պէտք է առնենք թէ իւրաքանչիւր նիստի բացման երգեցողութենէն քանի մը վայրկեան առաջ, ատենապետը բեմին վրայ նստած պիտի ըլլայ, մինչ Թագաւորութեան երաժշտութիւն մը կը նուագուի բացման համար։ Ասիկա ազդանշան մըն է թէ մեր տեղերը նստինք։ Ապա, երբ բացման երգեցողութիւնը ներկայացուի, պատրաստ պիտի ըլլանք Եհովայի փառաբանութիւն երգելու համար մեր ձայնը միացնելու։

⁴ Մտիկ Ըրէ՛ք Որպէս Միացեալ Ընտանիք մը. Երբ ժողվուած Իսրայելացիներուն, ընտանիքներուն, ի ներառեալ «տղաքներ»ուն, սրբազան պատգամները կը կարդացուէին, անոնք պէտք էր մտիկ ընէին ու սորվէին։ (Բ. Օր. 31։12) Մեր համաժողովներուն, երախաներ պէտք չէ ‘իրենց կամքին ձգուին’։ (Առ. 29։15) Ո՛վ ծնողներ, կարգադրեցէք որ ընտանեօք միասնաբար նստիք, ի ներառեալ պատանիները։ Կարգ մը ծնողներ կը սպասեն մինչեւ բացման երգեցողութիւնը, իրենց զաւակները զուգարան տանելու համար։ Սակայն, ասիկա զաւակներուն չի սորվեցներ թէ երգեցողութիւնը եւ աղօթքները մեծ կարեւորութիւն ունին մեր պաշտամունքին մէջ։ Եթէ կարելի է, որքա՜ն աւելի նախընտրելի է այս կարիքներուն մասին մտածուի նախքան իւրաքանչիւր նիստին սկսիլը։

⁵ Յայտագիրը լաւ կերպով պիտի ունկնդրենք, եթէ ամէն գիշեր լաւ հանգիստ ընենք եւ օրուան ընթացքին խուսափինք ծանր կերակուրներ ուտելէ։ Կեդրոնացէք դասախօսին ըսածներուն վրայ։ Թոյլ մի՛ տաք որ ձեր միտքը թափառի։ Երբ համարներ կարդացուին, ձեր Աստուածաշունչը բացէք ու հետեւեցէք։ Հակիրճ նոթեր առէք։ Մինչ իւրաքանչիւր դասախօսութիւն կը ներկայացուի, ձեր մտքին մէջ վերաքաղ ըրէք դասախօսին ըսածները եւ նկատի առէք թէ զանոնք ի՛նչպէս պիտի կիրարկէք։ Օրուան վերջաւորութեան, ընտանեօք յայտագրին մասին խօսակցեցէք։ Իւրաքանչիւրը ո՞ր կէտերը սիրեց։ Ձեր ընտանիքը ի՞նչպէս կրնայ այս տեղեկութիւնները պիտանի կերպով գործածել։

⁶ Աստուծոյ Խօսքին Հանդէպ Յարգանք Ցուցաբերեցէք. Համաժողովները հոյակապ պատեհութիւններ կու տան բարեկամներու հետ խօսակցելու եւ շինիչ ընկերակցութիւն ունենալու։ Կանուխ հասնելով, ժամանակ պիտի ունենանք խօսակցելու, յայտագիրը սկսելէն առաջ։ Սակայն, ոմանք յայտագրի ընթացքին կը խօսակցին, խորհելով թէ մեծ լսարանի մը մէջ ասիկա քիչ խանգարում կը պատճառէ։ Նոյնիսկ երբ ժողովները մեծ սրահներու մէջ տեղի կ’ունենան, ասիկա մտիկ ընելու ժամանակ է, ճիշդ ինչպէս որ կ’ընենք երբ Թագաւորութեան Սրահին մէջ ժողովի մը ներկայ կը գտնուինք։ Պէտք չէ թոյլ տրուի որ բջիջային հեռաձայններ, բէյճըր–ներ, պատկերագրող եւ լուսանկարչական գործիքներ գործածելը, յայտագրի ընթացքին խանգարումներ պատճառեն։

⁷ Երբ Մովսէս Եհովայէ Օրէնքը կը ստանար, «ո՛չ հաց կերաւ, ո՛չ ալ ջուր խմեց»։ (Ել. 34։28) Նոյնպէս, համաժողովի նիստերու ընթացքին ուտելն ու խմելը անպատշաճ պիտի ըլլան։ Եթէ առողջապահական լուրջ պարագաներ չկան, սպասեցէք մինչեւ որ ուտելու «ժամանակը» գայ։—Ժող. 3։1

⁸ Կարգ մը համաժողովներուն, խնդիր մը կայ որ տակաւին կը շարունակուի. շատ մը եղբայրներ ու քոյրեր, նոյնիսկ երախաներ, նիստերու ընթացքին անցքերուն մէջ կը շրջագային։ Հիւրընկալներուն ցուցմունքներ պիտի տրուին որ այսպիսիներէն խնդրեն որ սրահ վերադառնան։ Զանազան բաժիններու մէջ աշխատող կամաւորներ, իրենց աշխատանքը ամբողջացնելէ անմիջապէս ետք, պէտք է ներկաներուն հետ նստին։ Եթէ կամաւորներ նիստերու ընթացքին կարեւոր գործ մը ընելու նշանակում չունին, իրենց տեղերը նստած պէտք է ըլլան, եւ յայտագրին հետեւին։

⁹ Երբեք պիտի չուզէինք ‘մեր լսելիքները բթացնել’ երբ Աստուծոյ Խօսքը կը լսենք։ (Եբր. 5։11) Ուստի, վճռենք հարկ եղած յարգանքը ցուցաբերել, ուշի ուշով մտիկ ընելով, մինչ Եհովայի սրբազան պատգամներուն մասին կը խօսուի մեր յառաջիկայ նահանգային համաժողովին։