«Աստուծոյ Կողմէ Ամէն Բան Կարելի Է»
1 Քրիստոնէական ժողովքին գլխաւոր գործն է՝ համայն աշխարհի մէջ Թագաւորութեան պատգամը քարոզել։ (Մատթ. 24։14) Ասիկա հսկայ ձեռնարկ մըն է։ Դուրսէն դիտողներէն շատերուն համար, կը թուի թէ անիկա մեր ունեցած միջոցներէն շատ աւելին կը պահանջէ։ Ուրիշներու համար, այս նշանակումը կատարելը գրեթէ անըմբռնելի է, քանի որ մենք ծաղրանքի, հակառակութեան եւ հալածանքի կ’ենթարկուինք։ (Մատթ. 24։9. Բ. Տիմ. 3։12) Սկեպտիկներ համոզուած են թէ այս գործը իրագործելը անկարելի բան մըն է։ Սակայն, Յիսուս ըսաւ. «Աստուծոյ կողմէ ամէն բան կարելի է»։—Մատթ. 19։26
2 Ընդօրինակուելիք Դրական Օրինակներ. Յիսուս իր ծառայութիւնը առանձի՛ն սկսաւ, իրերու ամբողջ դրութիւն մը դիմագրաւելով։ Զինք ձախողեցնելու համար, հակառակորդները երեւակայելի ամէն անարգանք իր վրայ բերին, ի վերջոյ զինք տանջալից մահուան դատապարտելով։ Սակայն, վերջաւորութեան, Յիսուս ինքնավստահօրէն յայտարարեց. «Ես աշխարհին յաղթեցի»։ (Յովհ. 16։33) Ի՛րապէս անհաւատալի իրագործում մը։
3 Յիսուսի աշակերտները քրիստոնէական ծառայութեան մէջ նո՛յն քաջարի հոգին եւ նախանձախնդրութիւնը ցուցաբերեցին։ Շատեր խարազանուեցան, ծեծուեցան, բանտ նետուեցան, եւ նոյնիսկ մահուան դատապարտուեցան։ Սակայն, անոնք ‘կ’ուրախանային, քանի որ Տէրոջը անուանը համար արժանի եղան անարգուելու’։ (Գործք 5։41) Վիճակները աննպաստ ըլլալով հանդերձ, անոնք բարի լուրը «մինչեւ երկրին ծայրերը» քարոզելու անկարելի թուող գործը կատարեցին։—Գործք 1։8. Կող. 1։23
4 Ի՛նչպէս Յաջողիլ Մեր Օրերուն. Մենք ալ Թագաւորութեան քարոզչութեան գործը նախանձախնդրաբար ստանձնած ենք, բոլորովին աննպաստ պայմաններու ներքեւ։ Հակառակ արգելքներու, հալածանքի, բանտարկութեան եւ մեզ կասեցնելու այլ բիրտ փորձերու, յաջողութիւն կը գտնենք։ Ասիկա ի՞նչպէս կարելի է։ «‘Զօրութեամբ չէ եւ ուժով չէ, հապա իմ Հոգիովս’, կ’ըսէ զօրքերու Տէրը»։ (Զաք. 4։6) Եհովա մեր ետին ըլլալով, ո՛չ մէկ բան կրնայ մեր գործը կասեցնել։—Հռովմ. 8։31
5 Երբ քարոզենք, ամչնալու կամ վախնալու կամ անատակ զգալու պատճառ մը չունինք։ (Բ. Կորն. 2։16, 17) Շատ լուրջ պատճառներ ունինք որ յարատեւենք Թագաւորութեան բարի լուրը տարածել։ Եհովայի օգնութեամբ, «անկարելի»ն պիտի իրագործենք։—Ղուկ. 18։27