Ցարդ Ապրած Մեծագոյն Մարդը Գրքին Ուսումնասիրութիւնը

¹ Փետրուար 5–ով սկսող շաբթուան ընթացքին, Ժողովքի Գրքի Ուսումնասիրութեան մէջ՝ Ցարդ Ապրած Մեծագոյն Մարդը գիրքը սկսանք ուսումնասիրել։ Յիսուս Քրիստոսի կեանքն ու ծառայութիւնը վերաքաղ ընելը շա՛տ ուրախութիւն պիտի պատճառէ։ Քանի որ այս գիրքը մեր ուսումնասիրած միւս գրքերէն տարբեր կերպով ծրագրուած է, կարգ մը ուղեգծեր օգտակար պիտի ըլլան։

² Գրքին էջերը թիւ չունին, ուստի Մեր Թագաւորութեան Ծառայութիւնը թերթիկին մէջ հրատարակուած յայտագիրը կը ցանկագրէ ուսումնասիրուելիք գլուխները, սովորաբար՝ իւրաքանչիւր շաբաթ երեք կամ չորս գլուխ։ 35, 111, եւ 116–րդ գլուխներէն իւրաքանչիւրը երկու ուսումնասիրութեան նիւթերու բաժնուած է։ Որակելի եղբայր մը լման գլուխ մը (կամ լման ենթագլուխ մը, ինչպէս է պարագան 35, 111 եւ 116–րդ գլուխներուն) ընթերցելէ ետք, ուսումնասիրութեան վարիչը պիտի հարցնէ գլուխին վերջաւորութեան գտնուող հարցումները, որոնք կը համապատասխանեն ընթերցուած գլուխին կամ հատուածին։ Պատասխանները միշտ իրարու չեն յաջորդեր։ Հակիրճ եւ ուղղակի պատասխանները, դասին պարունակած տեղեկութեան վրայ հիմնուած պէտք է ըլլան։

³ Անկէ ետք, ժամանակին ներած չափով, գլուխին վերջաւորութեան յիշուած բոլոր համարները պէտք է կարդացուին։ Երկար համարները կարելի է աւելի փոքր մասերու բաժնել, որպէսզի տարբեր հրատարակիչներ մասնակցին ընթերցանութեան, ապա՝ ընթերցուած համարներուն մասին մեկնաբանութիւններ կրնան տրուիլ։ Վարիչին կողմէ պատրաստուած հարցումները պիտի օգնեն որ իմաստալից պատասխաններ առնուին, որոնք ցոյց կու տան թէ կարդացուած համարները ի՛նչպէս առնչուած են գրքին աչքառու կէտերուն հետ։ Բոլոր հարցումներն ու պատասխանները պէտք է օգնեն ներկաներուն որ իրենց ուշադրութիւնը Յիսուս Քրիստոսի, իր կեանքի ընթացքին եւ ուսուցումներուն վրայ կեդրոնացնեն։

⁴ Մեծագոյն Մարդը գիրքը Յիսուսի կեանքը նկատի կ’առնէ ժամանակագրական շարքով։ Դէպքերը երեւակայելը եւ անոնց ուր պատահիլը մտքին մէջ դրոշմելը, զանոնք յիշելու իսկապէս կը նպաստեն։ Հետեւաբար, գունաւոր պատկերները նկատի առէք եւ յաճախ ակնարկումներ ըրէք գրքին սկիզբը, ներածականէն ետք գտնուող քարտէսին։

⁵ Որոշուած նիւթը ծածկելու մէջ մեր յաջողութիւնը մեծաւ մասամբ կախեալ պիտի ըլլայ բոլոր ներկաներուն պատրաստութենէն։ Յատկապէս վարիչը ամէն շաբաթ պէտք է լաւ պատրաստուած ըլլայ, խումբին օգնելով որ մօտէն ծանօթանայ ցարդ ապրած մեծագոյն մարդուն՝ մեր Տիրոջ եւ Փրկչին՝ Յիսուս Քրիստոսի։

⁶ Երբ վերայցելութիւններու ընթացքին այս գիրքը կը ներկայացնենք, կրնաք հարցնել. «Ի՞նչ բան Յիսուսը աշխարհի մեծագոյն մարդը դարձուց»։ Կրնաք ասոր պատասխանը տալ, նշելով 133 գլուխներէն քանի մը հատին, որոնք Յիսուսի կեանքին, անձնաւորութեան, ուսուցումներուն եւ գործերուն վրայ կը կեդրոնանան։ 24–րդ գլուխը կը բացատրէ երկիր գալու իր նպատակը։ 35–րդ գլուխը վերաքաղ կ’ընէ իր համբաւաւոր Լերան Քարոզը։ 43–րդ գլուխը ուշագրաւ կը դարձնէ ուրիշներուն օրինակներով սորվեցնելու Յիսուսի արտակարգ կարողութիւնը։ 133–րդ գլուխը ակնարկ մը կը նետէ այն օրհնութիւններուն վրայ, զորս մարդկութիւնը պիտի վայելէ երբ ան իր գործը ամբողջացնէ։ Իւրաքանչիւր գլուխի վերջաւորութեան գտնուող հարցումները կրնաք գործածել խօսակցութեան զարկ տալու համար. նշուած համարները ցոյց կու տան թէ այդ դէպքը Աստուածաշունչին մէջ ո՛ւր կը գտնուի։ Կրնաք ուշադրութեան յանձնել գրաւիչ պատկերները, որոնք կը յայտնեն Յիսուսի անձնաւորութեան զօրութիւնը, ուրիշներու հանդէպ իր կարեկցութեան խորութիւնը, եւ քարոզչութեան մէջ իր անխոնջ եռանդը։—Նկատի առէք 44, 95, 117 եւ 123–րդ գլուխները։

⁷ Ամէն ով որ կը փափաքի յաւիտենական կեանք ունենալ, Յիսուս Քրիստոսի մասին գիտութիւն պէտք է ստանայ։ (Յովհ. 17։3) Այս գիրքը ուսումնասիրելու մեր նախանձախնդիր ջանքերը, կրնան կարելի դարձնել որ մեր կեանքը ազդուի ցարդ ապրած մեծագոյն մարդէն։