«Որբերուն» Հանդէպ Սիրալիր Հետաքրքրութիւն Ցուցաբերենք
1 Եհովա «որբերուն հայր»ն է։ (Սաղմ. 68։5) Անոնց բարօրութեամբ իր հետաքրքրուիլը արտացոլացուած է վաղեմի Իսրայէլ ազգին տուած հետեւեալ պատուէրին մէջ. «Որբեւարին ու որբը բնաւ մի՛ չարչարէք։ Եթէ զանոնք չարչարէք ինչ կերպով ալ ըլլայ ու անոնք ինծի բողոքելու ըլլան, անշուշտ պիտի լսեմ անոնց աղաղակը»։ (Ել. 22։22, 23) Աստուծոյ Օրէնքը նաեւ կը պարփակէր կարգադրութիւններ, այսպիսիներուն նիւթական կարիքներուն հոգ տանելու համար։ (Բ. Օր. 24։19-21) Քրիստոնէական կարգադրութեան ներքեւ, ճշմարիտ երկրպագուներուն յորդոր կը տրուի որ ‘կարօտութեան մէջ եղող որբերուն եւ այրիներուն այցելեն եւ օգնական ըլլան’։ (Յակ. 1։27, Երուսաղէմ) Առանձին ծնող ունեցող կամ կրօնապէս բաժնուած ընտանիքներու մէջ մեծցող երախաներուն հանդէպ Եհովայի ցուցաբերած սիրալիր հետաքրքրութիւնը ի՞նչպէս կրնանք ընդօրինակել։
2 Հոգեւոր Մարզում. Եթէ առանձին ծնող մըն էք կամ անհաւատ կողակից մը ունիք, ձեր զաւակներուն հետ կանոնաւորաբար տան սուրբ գրային ուսումնասիրութիւն մը վարելը կրնայ մարտահրաւէր մը ըլլալ։ Սակայն, կանոնաւոր ու իմաստալից Աստուածաշունչի ուսումնասիրութիւն մը կենսական է, որպէսզի անոնք հաւասարակշռուած ու հասուն չափահասներ ըլլան։ (Առ. 22։6) Ամէն օր անոնց հետ հոգեւոր հարցերու շուրջ զրոյցներ ունենալն ալ կենսական է։ (Բ. Օր. 6։6-9) Երբեմն, կրնաք վհատիլ, բայց մի՛ հեղգանաք։ Զօրութեան ու առաջնորդութեան համար Եհովայի դիմեցէք, մինչ ձեր զաւակները ‘Տէրոջը վարժութիւնովն ու խրատովը կը մեծցնէք’։—Եփ. 6։4
3 Եթէ ձեր սուրբ գրային պատասխանատուութիւնները կրելու նկատմամբ որոշ աջակցութեան կարիքը ունիք, ձեր կարիքները երէցներուն իմացուցէք։ Թերեւս անոնք կարենան գործնական թելադրութիւններ տալ կամ ձեզի օգնել որ ձեր ընտանիքին համար հոգեւոր լաւ սովորութիւն մը զարգացնէք։
4 Ուրիշներ Ի՛նչպէս Կրնան Օգնել. Առաջին դարուն, կրօնապէս բաժնուած ընտանիքի մը մէջ մեծնալով հանդերձ, Տիմոթէոս Եհովայի նախանձախնդիր ծառայ մը եղաւ։ Իր մանկութեան շրջանին իրեն սուրբ գրութիւնները սորվեցնելու իր մօր ու մեծ մօր ժրաջան ջանքերը, անկասկած ասոր մէջ դեր մը խաղցան։ (Գործք 16։1, 2. Բ. Տիմ. 1։5. 3։15) Սակայն, ան նաեւ օգտուեցաւ ուրիշ Քրիստոնեաներու ընկերակցութենէն, ի ներառեալ Պօղոս առաքեալ, որ Տիմոթէոսի ակնարկեց որպէս իր ‘սիրելի ու Տէրոջմով հաւատարիմ որդին’։—Ա. Կորն. 4։17
5 Նմանապէս այսօր, որքա՜ն օգտակար կ’ըլլայ երբ հոգեւորապէս հասուն եղբայրներ ու քոյրեր սիրալիր հետաքրքրութիւն ցուցաբերեն ժողովքին մէջ գտնուող որբերուն ու որբուհիներուն հանդէպ։ Իւրաքանչիւրը իր անունով կը ճանչնա՞ք։ Քրիստոնէական ժողովներուն կամ այլ առիթներով անոնց հետ կը խօսակցի՞ք։ Զանոնք հրաւիրեցէք որ ձեզի հետ դաշտի ծառայութեան մասնակցին։ Թերեւս ատեն–ատեն կրնաք զիրենք, եւ իրենց առանձին կամ հաւատացեալ ծնողը, պարփակել ձեր ընտանեկան ուսումնասիրութեան կամ օգտակար զբօսանքներու մէջ։ Երբ այս դեռատիները ձեզ իրենց բարեկամը նկատեն, աւելի հաւանական է որ ձեր օրինակին հետեւին ու քաջալերութեան ընդառաջեն։—Փիլ. 2։4
6 Եհովա որբերով ու որբուհիներով խորապէս հետաքրքրուած է, եւ մեր սիրալիր ջանքերը կ’օրհնէ որ անոնց օգնենք ճշմարտութիւնը իւրացնելու։ Առանձին ծնողով կամ կրօնապէս բաժնուած ընտանիքներու մէջ մեծցած բազմաթիւ անհատներ, այսպիսի քաջալերութիւն ստացած են եւ այժմ հաւատարմօրէն կը ծառայեն որպէս ռահվիրաներ, օգնական ծառաներ, երէցներ, ճամբորդող տեսուչներ, միսիոնարներ, կամ Պէթէլի ընտանիքի անդամներ։ Թող որ բոլորս ալ որբերուն հանդէպ մեր խանդաղատանքը ‘լայնցնելու’ կերպեր գտնենք, մեր երկնաւոր Հայրը ընդօրինակելով։—Բ. Կորն. 6։11-13