Ձեզ Պարփակող Հեծելազօրքի Արշաւ մը

1, 2. Ներկայիս Աստուծոյ ծառաները ի՞նչպէս պարփակուած են Յայտնութիւն 9։13-19–ի մէջ արձանագրուած մարգարէական տեսիլքին կատարման մէջ։

¹ «Վեցերորդ հրեշտակը փողը հնչեցուց»։ Անկէ ետք, «ձիաւոր զօրքեր» կ’որոտան, որոնց համրանքը «երկու բիւր բիւրաւոր է»։ Ասիկա սովորական զօրք մը չէ։ «Ձիերուն գլուխները առիւծներու գլուխներու պէս» են։ Անոնց բերնէն կրակ, ծուխ եւ ծծումբ կ’ելլեն, իսկ անոնց «պոչերը օձերու նման» են։ Այս այլաբանական հեծելազօրքը իր ետին աւերակ կը ձգէ։ (Յայտ. 9։13-19) Գիտէ՞ք թէ այս արտասովոր մարգարէական տեսիլքին կատարման մէջ ի՛նչպէս պարփակուած էք։

² Օծեալ մնացորդը ու անոնց ընկերակցող ուրիշ ոչխարները, միասնաբար կը յայտարարեն Աստուծոյ դատաստանները։ Այսպիսով Քրիստոնեայ Աշխարհի հոգեւորապէս մեռած վիճակը ամբողջովին կը քօղազերծուի։ Այժմ քննենք մարգարէական տեսիլքին վերաբերեալ երկու երեսակներ, որոնք ցոյց կու տան թէ Աստուծոյ ծառաներուն ծառայութիւնը ինչո՛ւ այսքան ազդու է։

3. Աստուծոյ պատգամը ազդուօրէն ներկայացնելու համար ի՞նչ մարզում ստացած էք։

³ Մարզուած եւ Զինուած՝ Աստուծոյ Պատգամը Հաղորդելու Համար. Աստուածպետական Ծառայութեան Դպրոցին եւ միւս ժողովներուն միջոցով, Աստուծոյ ծառաները մարզուած են Աստուծոյ պատգամը հեղինակութեամբ ներկայացնելու։ Յիսուսը եւ իր աշակերտները ընդօրինակելով, անոնք արժանաւորները կը փնտռեն, քարոզելով ո՛ւր որ մարդիկ կը գտնուին։ (Մատթ. 10։11. Մար. 1։16. Ղուկ. 4։15. Գործք 20։18-20) Քարոզելու այս սուրբ գրային մեթոտը ի՜նչ ազդու եղած է։

4. Հրատարակիչները ի՞նչպէս զինուած են որ իրենց գործը կատարեն։

⁴ Քարոզելու աստուածային յանձնարարութիւնը կատարելու համար, Քրիստոնեայ քարոզիչները միլիառաւոր Աստուածաշունչեր, գիրքեր, գրքոյկներ ու պարբերաթերթեր բաշխած են։ Այս գրականութիւնները հայթայթուած են շուրջ 400 լեզուներով։ Անոնք կը ծածկեն այլազան նիւթեր եւ ամէն տեսակ մարդոց սիրտին կը խօսին։ Այս գործիքները ազդուօրէն կը գործածէ՞ք։

5, 6. Ի՞նչ բան ցոյց կու տայ թէ Եհովայի ժողովուրդը երկնային աջակցութիւն կը վայելէ։

⁵ Երկնային Առաջնորդութիւն եւ Աջակցութիւն. Մարգարէական տեսիլքը նաեւ կը բացայայտէ թէ Աստուած թիկունք կը կանգնի այլաբանական հեծելազօրքի արշաւով ներկայացուած գործունէութեան։ (Յայտ. 9։13-15) Աշխարհածաւալ քարոզչութիւնը ո՛չ թէ մարդկային իմաստութեամբ կամ զօրութեամբ կը կատարուի, այլ՝ Աստուծոյ հոգիին միջոցով։ (Զաք. 4։6) Եհովա հրեշտակները կը գործածէ այս գործը առաջնորդելու համար։ (Յայտ. 14։6) Արդ, իր մարդկային Վկաներուն ջանքին կողքին, Եհովա երկնային աջակցութիւն կը հայթայթէ, հեզերը իրեն քաշելու համար։—Յովհ. 6։45, 66

⁶ Աստուծոյ պատգամը հաղորդելու համար մարզուած ու լաւ զինուած ըլլալով, եւ հրեշտակային առաջնորդութեան ներքեւ գործելով, Եհովայի ժողովուրդը անդիմադրելի ոյժ մըն է։ Թող որ շարունակենք այս ոգեւորիչ մարգարէական տեսիլքին կատարման մէջ մեր բաժինը բերել։