Կանոնաւորաբար պարբերաթերթ յանձնելով՝ հետաքրքրութիւն մշակէ
1. Կանոնաւորաբար պարբերաթերթ յանձնելով, ի՞նչպէս կրնանք հետաքրքրութիւն մշակել։
1 Ծառայութեան մէջ մեր հանդիպած մարդոցմէ շատեր մեր այցելութիւններն ու գրականութիւնները սիրով կ’ընդունին, բայց Աստուածաշունչի կանոնաւոր ուսումնասիրութիւն մը ընդունելու կը վարանին։ Անոնց կանոնաւորաբար պարբերաթերթ յանձնելը կ’օգնէ իրենց հետաքրքրութիւնը մշակելու։ Ուստի, երբ պարբերաթերթեր տեղաւորես, արձանագրէ անհատին անունն ու հասցէն, այցելութեան թուականը, պարբերաթերթին թիւը, նկատի առնուած համարը, եւ որեւէ բան որ անհատին հետաքրքրութիւնները կը յայտնէ։ Երբ նոր թիւ մը հասնի, անհատը հետաքրքրող կէտեր փնտռէ, ապա զանոնք աչքառու դարձուր երբ իրեն այցելես։ (Ա. Կորն. 9։19-23) Ժամանակի ընթացքին, պարբերաթերթերուն մէջ անոր կարդացած մէկ բանը կրնայ իր հետաքրքրութիւնը շարժել եւ պատճառ ըլլալ որ փափաքի աւելին գիտնալ։
2. Ինչո՞ւ շատ կարեւոր է որ մարդիկ հիմա Եհովան փնտռեն, եւ անոնց օգնելու համար ուրիշ ի՞նչ կրնանք ընել։
2 Սակայն կը գիտակցինք որ մարդոց մեծամասնութիւնը Եհովայի ծառայ պիտի չըլլան, մեր պարբերաթերթերը առանձին կարդալով։ Որովհետեւ շատ կարեւոր է որ մարդիկ հիմա Եհովան փնտռեն, անոնց օգնելու համար ուրիշ ի՞նչ կրնանք ընել։ (Սոփ. 2։2, 3. Յայտ. 14։6, 7) Կրնանք անոնց հետաքրքրութիւնը մշակել՝ բծախնդրաբար ընտրուած համարի մը մասին խօսելով, ամէն անգամ որ պարբերաթերթ մը պիտի յանձնենք։
3. (ա) Ի՞նչպէս կրնանք մէկ–համարով նիւթեր պատրաստել։ (բ) Թաղամասիդ մէջ մարդիկ ո՞ր նիւթերով մեծապէս հետաքրքրուած են։
3 Մէկ համար գործածելով խօսակցիլ. Մտածէ անոնց մասին որոնց կանոնաւորաբար պարբերաթերթ կը յանձնես, եւ իւրաքանչիւրին մասնայատուկ կարիքներուն համաձայն պատրաստէ մէկ–համարով նիւթեր։ (Փիլ. 2։4) Օրինակ, եթէ անհատ մը վերջերս սիրելի մը կորսնցուցած է, կրնաս քանի մը վերայցելութիւններու ընթացքին բացատրել ի՛նչ որ Աստուածաշունչը կ’ըսէ մեռելներու վիճակին ու յարութեան յոյսին մասին։ Այս մէկ–համարով նիւթերը պատրաստելու համար, կրնաս գործածել Պատճառաբանել գիրքին՝ «Մահ» եւ «Յարութիւն» խորագիրներուն ներքեւ գտնուող տեղեկութիւնները։ Անկէ ետք, կրնաս յարակից նիւթերու մասին խօսակցիլ, օրինակ՝ հիւանդութիւնը, ծերութիւնն ու մահը ի՛նչպէս ամբողջովին պիտի չքանան։ Բանալին այն է թէ գտնենք անհատը հետաքրքրող նիւթ մը եւ աստիճանաբար ցոյց տանք թէ Աստուածաշունչը անոր մասին ի՛նչ կ’ըսէ։
4. Ինչո՞ւ կարեւոր է որ համարին իմաստը հասկցնենք, եւ ասիկա ի՞նչպէս կրնանք ընել։
4 Իմաստը հասկցնել. Թէեւ սովորաբար լաւ է որ այս քննարկումները պարզ ու համառօտ ըլլան, սակայն ընտրուած համարը կարդալէն աւելին պէտք է ընենք։ Սատանան բարի լուրի նկատմամբ մարդոց միտքերը կուրցուցած է։ (Բ. Կորն. 4։3, 4) Նոյնիսկ Աստուածաշունչին քաջածանօթ եղողները զայն հասկնալու համար օգնութեան կարիք ունին։ (Գործք 8։30, 31) Ուստի համարը բացատրէ, ճիշդ ինչպէս պիտի ընէիր Աստուածպետական Ծառայութեան Դպրոցին մէջ։ (Գործք 17։3) Վստահ եղիր որ անհատը կ’անդրադառնայ թէ Աստուծոյ Խօսքը իր կեանքին մէջ գործնական արժէք ունի։
5. Պարբերաթերթ յանձնելու այցելութիւնը ի՞նչպէս կրնայ Աստուածաշունչի ուսումնասիրութիւն դառնալ։
5 Եթէ անհատը իր սորվածէն հաճոյք կ’առնէ, խօսակցութիւնները աստիճանաբար երկնցուր, իւրաքանչիւր այցելութեան պարփակելով երկու կամ երեք համարներ։ Յարմար առիթով Ի՛նչ կը պահանջէ գրքոյկը կամ Գիտութիւն գիրքը ներկայացուր։ Այս կերպով, պարբերաթերթ յանձնելու այցելութիւնը կրնայ Աստուածաշունչի ուսումնասիրութիւն դառնալ։