Բնական աղէտի մը համար նախապատրաստուա՞ծ ես
1. Ինչո՞ւ խոհեմութիւն է աղէտներու համար նախապատրաստուիլ։
1 Աշխարհի տարածքին միլիոնաւորներ, ի ներառեալ մեր եղբայրներն ու քոյրերը, ամէն տարի կ’ազդուին՝ երկրաշարժներէ, ցունամիներէ, եղանակային հովերէ, ոլորամրրիկներէ, փոթորկահովերէ եւ հեղեղներէ։ Որովհետեւ բնական աղէտները անակնկալօրէն կը պատահին եւ կրնան մեզմէ ոեւէ մէկուն ազդել, իմաստութիւն է նախապատրաստութիւն տեսնել։—Առ. 21։5
2. Ինչո՞ւ երէցներուն պէտք է տեղեկացնենք մեր ընթացիկ հասցէներն ու հեռաձայնի թիւերը։
2 Աղէտը կանխել. Երբեմն հեղինակութիւնները կրնան մօտահաս աղէտներու մասին ազդարարել։ Այս ազդարարութիւններուն ուշադրութիւն ընծայելը կարեւոր է։ (Առ. 22։3) Այս պարագային, երէցները պիտի ջանան ժողովքի բոլոր անդամներուն հետ շփման մէջ գալ, որպէսզի անոնց օգնեն հարկ եղած պատրաստութիւնները տեսնելու։ Աղէտէ մը ետք, երէցները նաեւ պիտի ջանան ժողովքին ընկերակցող բոլոր անհատներուն հետ կապ պահել, անոնց ապահովութիւնը եւ օգնութեան կարիքը ստուգելու համար։ Եթէ երէցները հասցէներու եւ հեռաձայնի թիւերու վերաբերեալ այժմէական տեղեկութիւններ չունին, թանկարժէք ժամանակ պիտի վատնուի։ Ուստի լաւ կ’ըլլայ որ հրատարակիչները քարտուղարին եւ գրքի ուսումնասիրութեան տեսուչին տեղեկացնեն իրենց ընթացիկ հասցէներն ու հեռաձայնի թիւերը։
3. Եթէ մեր շրջանը աղէտներու ենթակայ է, ի՞նչպէս կրնանք երէցներուն հետ համագործակցիլ։
3 Եթէ ժողովքը կը գտնուի շրջանի մը մէջ, որ աղէտներու ենթակայ է, երէցները կրնան հրատարակիչներէն խնդրել որ շրջանէն դուրս ապրող ազգականի կամ բարեկամի մը անունը եւ հեռաձայնի թիւը հայթայթեն, անոր հետ կապ պահելու համար երբ ստիպողական պարագայ մը ծագի։ Այսպէս երէցները կրնան գիտնալ թէ շրջանէն հեռացողները ո՛ւր են։ Երէցները նաեւ կրնան ծրագիր մը պատրաստել, որպէսզի ստիպողական պարագային ժողովքը անոր հետեւի։ Անիկա կրնայ պարփակել՝ ձեռքի տակ ունենալիք անհրաժեշտ պիտոյքներու ստուգացանկ, շրջանէն հեռանալու կարգադրութիւններ, եւ մասնայատուկ կարիքներ ունեցողներուն օգնելու կերպեր։ Այս սիրալիր կարգադրութիւններուն հետ համագործակցիլը կարեւոր է։—Եբր. 13։17
4. Ի՞նչ պէտք է ընենք եթէ աղէտ մը մեր շրջանը հարուածէ։
4 Աղէտէ մը ետք. Ի՞նչ պէտք է ընես եթէ աղէտ մը շրջանդ հարուածէ։ Ընտանիքիդ անմիջական ֆիզիքական կարիքներուն հոգ տար։ Եթէ կարող ես, ուրիշ աղէտեալներու ալ անհրաժեշտ օգնութիւն մատուցանէ։ Ջանա՛ գրքի ուսումնասիրութեան տեսուչին կամ ուրիշ երէցի մը հետ շփման մէջ գալ՝ կարելի եղածին չափ շուտ։ Ասիկա ըրէ նոյնիսկ եթէ ապահով վիճակի մէջ ես եւ օգնութեան կարիք չունիս։ Եթէ օժանդակութեան պէտք ունիս, վստահ եղիր որ եղբայրներդ ամէն ջանք կը թափեն որ քու օգնութեանդ հասնին։ (Ա. Կորն. 13։4, 7) Մի՛ մոռնար որ Եհովա կացութիւնդ կը տեսնէ, ուստի իրեն ապաւինէ։ (Սաղմ. 37։39. 62։8) Ամէն պատեհութիւն օգտագործէ որ ուրիշներու հոգեւոր ու զգացական աջակցութիւն հայթայթես։ (Բ. Կորն. 1։3, 4) Անմիջապէս որ կարելի ըլլայ, աստուածպետական սովորամոլութիւնդ վերսկսէ։—Մատթ. 6։33
5. Աղէտներու սպառնալիքը ի՞նչպէս կ’ազդէ մեզի՝ Քրիստոնեաներուս։
5 Մինչ աղէտներու սպառնալիքը շատ մտահոգութիւն կը պատճառէ աշխարհի, մենք կրնանք վստահութեամբ ապագային նայիլ։ Մօտ ատենէն, բոլոր աղէտները անցեալին պատկանող բաներ պիտի ըլլան։ (Յայտ. 21։4) Մինչ այդ, կրնանք տրամաբանական քայլեր առնելով նախապատրաստուիլ տագնապալից ու նեղ ժամանակներու համար եւ բարի լուրը ուրիշներուն ծանուցանելու մէջ մեր նախանձախնդրութիւնը պահել։