Մեծ Ուսուցիչը ընդօրինակէ՝ երբ Աստուածաշունչը կը սորվեցնէ գիրքը կը գործածես

1. Յիսուս ի՞նչպէս սորվեցուց։

¹ Մեծ Ուսուցիչը՝ Յիսուս, հարցերը միշտ պարզ ու յստակ կերպով կը բացատրէր։ Իր ունկնդիրներուն մտածումը խթանելու համար, երբեմն ան նախ անոնց տեսակէտը կը հարցնէր։ (Մատթ. 17։23-26) Ան ուշադրութիւնը Աստուծոյ Խօսքին կը դարձնէր։ (Մատթ. 26։31. Մար. 7։6) Ան զգոյշ էր որ իր աշակերտները շատ տեղեկութիւններով չողողէր, գիտնալով թէ անոնք պիտի շարունակէին սորվիլ։ (Յովհ. 16։12) Յիսուս նաեւ հետաքրքրուած էր թէ արդեօք իր աշակերտները կը հաւատայի՞ն ու կը հասկնայի՞ն իր ուսուցանած բաները։ (Մատթ. 13։51) Աստուածաշունչը կը սորվեցնէ գիրքը ծրագրուած է մեզի օգնելու որ նոյնանման կերպով սորվեցնենք։

2. Իւրաքանչիւր գլուխին բացման հարցումները ի՞նչ կերպերով կրնանք գործածել։

² Բացման հարցումներ. Երբ գլուխ մը սկսիս, լաւ է որ խորագրին ներքեւ գտնուող բացման հարցումներուն վրայ ուշադրութիւն հրաւիրես։ Աշակերտին ախորժակը գրգռելու համար՝ հարցումները հռետորական ձեւով ուղղէ։ Կամ, կրնաս իրմէ խնդրել որ հարցումներուն հակիրճօրէն պատասխանէ։ Հարկ չկայ իր մեկնաբանութիւնները մանրամասնօրէն քննարկելու կամ իւրաքանչիւր սխալ պատասխան սրբագրելու։ Կրնաս պարզապէս իր գաղափարներուն համար շնորհակալութիւն յայտնել, ապա սկսիլ նիւթը նկատի առնել։ Բացման հարցումներուն վերաբերեալ իր պատասխանները քեզի պիտի օգնեն գիտնալու թէ դասին ո՛ր հատուածին աւելի ուշադրութիւն պէտք է ընծայես։

3. Ի՞նչպէս կրնանք ուսումնասիրութիւնը պարզ պահել։

³ Համարները. Ուսումնասիրութիւնը Սուրբ Գրութիւններուն վրայ պէտք է կեդրոնանայ։ (Եբր. 4։12) Սակայն իւրաքանչիւր նշուած համար կարդալու հարկ չկայ։ Շեշտը դիր այն համարներուն վրայ, որոնք մեր հաւատալիքներուն աստուածաշնչական հիմը ցոյց կու տան։ Երկրորդական տեղեկութիւններ հայթայթող համարները կարդալու հարկ չկայ։ Աստուածաշունչը կը սորվեցնէ գիրքը ճշմարտութիւնը դիւրըմբռնելի կերպով կը ներկայացնէ, ուստի ուսումնասիրութիւնը պարզ պահէ։ Գլխաւոր կէտերուն վրայ կեդրոնացիր եւ մանրամասնութիւններուն մասին շատ խօսելու կամ անհարկիօրէն յաւելեալ տեղեկութիւններ պարփակելու հակումէն խուսափէ։

4. Ի՞նչ բան կ’որոշէ թէ ուսումնասիրութեան ընթացքին յաւելուածէն տեղեկութիւններ նկատի առնե՛նք կամ ոչ։

⁴ Յաւելուածը. Յաւելուածը 14 նիւթեր կը ծածկէ, որոնք լրացուցիչ տեղեկութիւններ կը բովանդակեն։ Զանոնք ուսումնասիրութեան ընթացքին նկատի առնելը ընտրողական է։ Կարգ մը նիւթերուն պարագային, թերեւս աշակերտէդ խնդրես որ յաւելուածական նիւթը առանձին կարդայ, մանաւանդ եթէ դասին տեղեկութիւնները կ’ըմբռնէ ու կ’ընդունի։ Օրինակ, եթէ աշակերտը արդէն կը հաւատայ որ Յիսուս Մեսիան է, հարկ չկայ որ իրեն հետ նկատի առնես «Յիսուս Քրիստոս՝ խոստացեալ Մեսիան» յօդուածը, երբ «Ո՞վ է Յիսուս Քրիստոս» խորագրով 4–րդ գլուխը կ’ուսումնասիրէք։ Այլ պարագաներուն, թերեւս օգտաշատ ըլլայ ուսումնասիրութեան ընթացքին որոշ ժամանակ տրամադրել՝ յաւելուածական նիւթը կամ անկէ մաս մը նկատի առնելու։

5. Եթէ որոշենք յաւելուածէն տեղեկութիւններ նկատի առնել, ասիկա ի՞նչպէս կրնանք ընել։

⁵ Եթէ որոշես յաւելուածական նիւթը քննարկել, կանխաւ հարցումներ պատրաստէ եւ սովորական ուսումնասիրութեան պէս աշակերտին հետ պարբերութիւնները նկատի առ։ Կամ, աշակերտին կարիքներուն համաձայն, թերեւս նախընտրես ուսումնասիրութեան ընթացքին քանի մը վայրկեան տրամադրել, իրեն հետ տեղեկութիւնները վերաքաղ ընելու համար։ Ասիկա թոյլ պիտի տայ որ վստահ ըլլաս թէ ան առանձին կարդացած տեղեկութիւնները կը հասկնայ։

6. Վերաքաղի շրջանակը ի՞նչպէս կարելի է գործածել իւրաքանչիւր ուսումնասիրութեան աւարտին։

⁶ Վերաքաղի շրջանակը. Իւրաքանչիւր գլուխի վերջաւորութեան գտնուող շրջանակը սովորաբար կը բովանդակէ բացման հարցումներուն պատասխանները։ Կրնաս զանոնք գործածել՝ գլուխին գլխաւոր կէտերը վերաքաղ ընելու համար։ Կարգ մը հրատարակիչներ նկատած են թէ օգտակար է աշակերտին հետ կարդալ իւրաքանչիւր նախադասութիւն եւ անոր ընկերակցող համարները։ Անոնք նաեւ աշակերտէն կը խնդրեն որ հակիրճօրէն բացատրէ թէ համարները ի՛նչպէս կը փաստեն խնդրոյ առարկայ կէտը։ Ասիկա ուսուցիչին ցոյց կու տայ թէ աշակերտը դասին գլխաւոր կէտերը եւ անոնց թիկունք կանգնող համարները յստակօրէն հասկցա՛ծ է ու անոնց հետ համաձա՛յն է կամ ոչ։ Անիկա նաեւ աշակերտը կը մարզէ որ Աստուածաշունչը գործածելով ճշմարտութիւնը ուրիշներուն բացատրէ։

7. Աստուածաշունչը կը սորվեցնէ գիրքը ի՞նչպէս կրնանք գործածել մեր յանձնարարութիւնը կատարելու համար։

⁷ Մարդոց սորվեցնելու եւ աշակերտելու մեր յանձնարարութիւնը կատարելու ամենէն ազդու կերպն է՝ Յիսուսի ուսուցանելու մեթոտները ընդօրինակել։ (Մատթ. 28։19, 20) Աստուածաշունչը կը սորվեցնէ գիրքը մեզի կրնայ օգնել ասիկա ընելու։ Զայն լաւ կերպով գործածէ՛, որպէսզի յստակ, պարզ ու հետաքրքրական կերպով ճշմարտութիւնը ուրիշներուն սորվեցնես։