Բոլորս կրնանք նոր աշակերտներ ընելու մէջ բաժին բերել

¹ Նոր աշակերտ մը յառաջ չի գար միայն մէկ հոգիի ջանքերով։ Եհովա կրնայ իր բոլոր «գործակից»ները գործածել Աստուածաշունչի աշակերտներուն օգնելու որ հոգեւորապէս աճին։ (Ա. Կորն. 3։6-9) Նորեկներուն անհատապէս կ’օգնենք, ո՛չ միայն քրիստոնէական ժողովներուն սրտագին մեկնաբանութիւններ տալով, այլ նաեւ՝ մեր լաւ վարքով, որ ուշագրաւօրէն կ’ապացուցանէ մեր կեանքին մէջ Աստուծոյ հոգիին ներգործութիւնը։ (Յովհ. 13։35. Գաղ. 5։22, 23. Եփ. 4։22, 23) Տակաւին ի՞նչ կարելի է ընել նորեկներուն օգնելու համար։

² Որպէս ժողովք. Բոլորս կրնանք ժողովներու եկող նորեկներուն հանդէպ հետաքրքրութիւն ցուցաբերել, նախաձեռնութիւնը առնելով անոնց ջերմօրէն բարեւելու եւ անոնց հետ զրուցելու՝ ժողովէն առաջ ու ետք։ Առաջին ժողովը մտաբերելով, մարդ մը ըսաւ. «Մէկ օրուան մէջ, աւելի մեծ թիւով մարդոց ծանօթացայ, որոնք թէեւ բոլորովին օտար՝ սակայն անկեղծ ու սիրալիր էին, քան այն բոլոր տարիներու ընթացքին, որ եկեղեցի յաճախած էի։ Բացայայտ էր թէ ճշմարտութիւնը գտած էի»։ Ան այդ առաջին ժողովէն եօթը ամիս ետք մկրտուեցաւ։

³ Մինչ Աստուածաշունչի աշակերտը հոգեւորապէս կը յառաջդիմէ, զինք անկեղծօրէն գովէ։ Ան հակառակութեան կը տոկա՞յ։ Ան ժողովներուն կանոնաւորաբար ներկայ կ’ըլլա՞յ։ Մեկնաբանելու քաջութիւն հաւաքա՞ծ է։ Աստուածպետական Ծառայութեան Դպրոցին մէջ ելոյթ ունեցա՞ծ է կամ ծառայութեան սկսա՞ծ է մասնակցիլ։ Իր ըրած յառաջդիմութեան համար զինք գովէ։ Ասիկա զինք պիտի կազդուրէ եւ ամրապնդէ։—Առ. 25։11

⁴ Որպէս Աստուածաշունչի ուսումնասիրութիւնը վարող. Կարգ մը հրատարակիչներ կրցած են իրենց Աստուածաշունչի աշակերտները ժողովքի իւրաքանչիւր անդամին ծանօթացնել, այլ հրատարակիչներէ խնդրելով որ ուսումնասիրութեան ներկայ գտնուին։ Անմիջապէս որ կարելի ըլլայ, աշակերտը հրաւիրէ ժողովքային հանդիպումներուն։ Երբ ան սկսի ժողովներուն ներկայ գտնուիլ, զինք ուրիշներուն ծանօթացնելու նպատակ դիր։ Ան գէշ սովորութեան մը դէմ կը պայքարի՞, ինչպէս ծխախոտի գործածութիւնը։ Անոր ընտանիքի մէկ անդամը ուսումնասիրութեան կը հակառակի՞։ Ան կրնայ օգտուիլ, խօսելով հրատարակիչի մը հետ՝ որ նոյնանման դժուարութիւն դիմագրաւած ու յաղթահարած է։—Ա. Պետ. 5։9

⁵ Նորեկները ժողովքին մատուցած հոգեւոր օգնութեան կարիքը ունին։ Բոլորն ալ կրնան անոնց յառաջդիմութեան նպաստել, անկեղծ ու անձնական հետաքրքրութիւն ցուցաբերելով։