Երբ Աստուծոյ Թագաւորութիւնը գայ՝ ի՞նչ բաներ պիտի երթան

1, 2. ա) Այս չար աշխարհը ինչպէ՞ս կը նմանի դատապարտուած ոճրագործի մը (տե՛ս բացման նկարը)։ բ) Երկնքի մէջ եւ երկրի վրայ եղողները ի՞նչ պիտի զգան այս չար աշխարհը կործանելէն ետք։

«ՄԵՌԱԾ ՄԱՐԴԸ ԿԸ ՔԱԼԷ»։ Այս խօսքը կը լսուի երկաթէ դռներու ձայներուն հետ, մինչ բանտին պահակները վտանգաւոր ոճրագործ մը կը հանեն իր խուցէն։ Ոճրագործը առողջ կ’երեւի եւ ֆիզիքական խնդիր մը չկայ որ իր կեանքը խլէ։ Լաւ, պահակները ինչո՞ւ այս խօսքը կ’ըսեն։ Ան մահապատիժի դատապարտուած է եւ այժմ դէպի մահ կը քալէ։ Ան արդէն մեռած կը հաշուըւիa։

² Ձեւով մը, այս չար աշխարհը կը նմանի մեռնելու վրայ եղող այդ ոճրագործին։ Սուրբ Գիրքը կ’ըսէ. «Աշխարհս ալ կ’անցնի» (Ա. Յովհ. 2։17)։ Եհովան որոշած է որ մօտ օրէն այս չար աշխարհին վերջ դնէ։ Ուրեմն կասկած չկայ որ ատիկա վերջ պիտի գտնէ։ Բայց մէկ տարբերութիւն կայ այս աշխարհի վերջին եւ այդ մարդուն մահապատիժին միջեւ։ Ոմանք թերեւս զգան որ ոճրագործին տրուած վճիռը արդար չէ եւ թերեւս առարկեն, յուսալով որ ան չմեռցուի։ Բայց գալով այս աշխարհի դատաստանին, վճիռ տուողը Եհովան է, որ կատարեալ Դատաւոր է (Բ. Օր. 32։4)։ Մահապատիժին գործադրումը պիտի չյետաձգուի եւ ո՛չ մէկը պիտի կասկածի ատոր արդար ըլլալուն վրայ։ Այս չար աշխարհին վերջը գալէն ետք, երկնքին մէջ եւ երկրին վրայ բոլոր եղողները սրտանց պիտի համաձայնին որ վճիռը արդար էր։ Անոնք երկա՜ր շունչ մը պիտի առնեն։

3. Ի՞նչ չորս խնդիրներ պիտի երթան, երբ Աստուծոյ Թագաւորութիւնը գայ։

³ Ի՞նչ պարփակուած է այն «աշխարհ»ին մէջ որ ‘պիտի անցնի’։ Ատոր մէջ կան բոլոր այն գէշ բաները, որոնք կեանքին մէկ մասը դարձած են։ Բոլոր այդ բաները մօտ օրէն պիտի վերջանան։ Իրականութեան մէջ, ասիկա Թագաւորութեան բարի լուրին մէկ մասն է (Մատ. 24։14)։ Լաւ, տեսնենք թէ ո՛ր չորս բաները պիտի երթան երբ Աստուծոյ Թագաւորութիւնը գայ. չար մարդիկը, փտած կազմակերպութիւնները, սխալ գործունէութիւնները եւ գէշ վիճակները։ Իւրաքանչիւր պարագային նկատի պիտի առնենք, թէ 1) ատոնք հիմա ինչպէ՛ս կ’ազդեն մեզի, 2) Եհովան ի՛նչ պիտի ընէ ատոնց նկատմամբ, եւ 3) ան ինչպէ՛ս ատոնց տեղը իրապէս լաւ բաներ պիտի դնէ։

ՉԱՐ ՄԱՐԴԻԿԸ

4. Չար մարդիկը հիմա ինչպէ՞ս կ’ազդեն մեզի։

⁴ Չար մարդիկը հիմա ինչպէ՞ս կ’ազդեն մեզի։ Պօղոս առաքեալ ըսաւ որ վերջին օրերը «չար ժամանակներ» պիտի գային։ Ետքը, ան աւելցուց. «Չար ու խաբեբայ մարդիկ չարութեան մէջ պիտի յառաջանան» (Բ. Տիմ. 3։1-5, 13)։ Ասիկա մորթիդ վրայ զգացա՞ծ ես։ Մեզմէ շատերու վնաս հասցուցած են չար մարդիկը, ինչպէս՝ վայրագ անձեր որ մարդու վրայ կը խնդան, ցեղապաշտներ եւ անգութ ոճրագործներ։ Անոնցմէ շատեր բացէ ի բաց գէշութիւններ կ’ընեն, իսկ ուրիշներ՝ դուրսէն լաւ կ’երեւին բայց իրականութեան մէջ գէշ բաներ կ’ընեն։ Նոյնիսկ եթէ այսպիսի մարդոց զոհ չենք գացած, տակաւին կ’ազդուինք անոնց ըրածներէն։ Մեր սիրտը կը նեղուի երբ կը լսենք թէ անոնք ինչպէս գէշ կերպով կը վարուին պզտիկներու հետ, ծերերու հետ եւ ուրիշ անպաշտպան մարդոց հետ։ Անոնք անասնական կամ դիւային կերպով կը վարուին (Յակ. 3։15)։ Ուրախ ենք որ Եհովային Խօսքը յոյս կու տայ մեզի։

5. ա) Չար մարդիկը տակաւին ի՞նչ առիթ ունին։ բ) Ի՞նչ պիտի պատահի այն չար մարդոց՝ որոնք չեն ուզեր փոխուիլ։

⁵ Եհովան ի՞նչ պիտի ընէ։ Եհովան հիմա առիթ կու տայ չար մարդոց որ փոխուին (Եսա. 55։7)։ Այս աշխարհը դատապարտուած է, այո՛, բայց իւրաքանչիւր անհատ տակաւին իր վճիռը չէ ստացած։ Լաւ, ի՞նչ պիտի ըլլայ անոնց՝ որոնք չեն ուզեր փոխուիլ եւ կը շարունակեն այս դրութեան թիկունք կանգնիլ մինչեւ մեծ նեղութիւնը։ Եհովան խոստացած է բոլոր չար մարդիկը մէջտեղէն վերցնել (կարդա՛ Սաղմոս 37։10)։ Չարերը կը կարծեն որ այս դատաստանէն կրնան փախչիլ։ Անոնցմէ շատեր սորված են իրենց գէշութիւնները ծածկել, եւ այս աշխարհին մէջ՝ անոնք ընդհանրապէս չեն պատժուիր (Յոբ 21։7, 9)։ Բայց Սուրբ Գիրքը մեզի կը յիշեցնէ. «[Աստուծոյ] աչքերը մարդուն ճամբաներուն վրայ են ու մարդուն բոլոր քայլերը կը տեսնեն։ Ո՛չ խաւար կայ եւ ո՛չ մահուան շուք՝ որ անօրէնութիւն գործողները հոն պահուըտին» (Յոբ 34։21, 22)։ Մէկը չի կրնար Եհովա Աստուծմէ պահուըտիլ կամ իր վրայ խնդալ։ Աստուած ամէն տեղ կը տեսնէ, որքան ալ մութ ըլլայ. ան ամէն ինչի իրականութիւնը կը տեսնէ։ Արմագեդոնէն ետք պիտի նայինք ուր որ չար կար, բայց մէկը պիտի չգտնենք։ Անոնք յաւիտեան կործանած պիտի ըլլան (Սաղ. 37։12-15)։

6. Չար մարդոց տեղ որո՞նք պիտի մնան, եւ ասիկա ինչո՞ւ ուրախ լուր է։

⁶ Չար մարդոց տեղ որո՞նք պիտի մնան։ Եհովան կը խոստանայ. «Հեզերը պիտի ժառանգեն երկիրը ու խաղաղութեան առատութիւնովը պիտի ուրախանան»։ Նոյն սաղմոսին մէջ գրուած է. «Արդարները պիտի ժառանգեն երկիրը ու յաւիտեան անոր մէջ պիտի բնակին» (Սաղ. 37։11, 29)։ «Հեզերը» եւ «արդարները» որո՞նք են։ Հեզերը անոնք են՝ որոնք խոնարհօրէն կը սորվին Եհովայէն եւ կը հնազանդին իրեն։ Իսկ արդարները անոնք են՝ որոնք կը սիրեն Եհովային աչքին ճիշդ եղածը ընել։ Այս աշխարհին մէջ, չարերը շա՜տ աւելի են քան արդարները։ Բայց գալիք նոր աշխարհին մէջ, արդարները ոչ թէ մեծամասնութիւնը պիտի ըլլան, հապա՝ միակ ապրողները, եւ երկիրը դրախտի պիտի վերածեն։

ՓՏԱԾ ԿԱԶՄԱԿԵՐՊՈՒԹԻՒՆՆԵՐԸ

7. Փտած կազմակերպութիւնները ինչպէ՞ս հիմա կ’ազդեն մեզի։

⁷ Փտած կազմակերպութիւնները հիմա ինչպէ՞ս կ’ազդեն մեզի։ Այս աշխարհին մէջ եղած չարութեան մեծ մասը կազմակերպութիւններու պատճառաւ է, եւ ոչ թէ անհատներու։ Օրինակ, կրօնական կազմակերպութիւնները միլիոնաւորներ կը խաբեն։ Անոնք սուտ կը խօսին Աստուծոյ ո՛վ ըլլալուն մասին, երկրին ու մարդկութեան ապագային մասին, եւ կ’ըսեն թէ Սուրբ Գիրքը վստահելի չէ։ Փտած կառավարութիւնները պատճառ կ’ըլլան որ պատերազմներ եւ ցեղային վայրագութիւններ ըլլան։ Անոնք անարդարօրէն կը վարուին աղքատներուն եւ անպաշտպան մարդոց հետ։ Անոնք նաեւ աւելի կը հարստանան եւ կը զօրանան՝ մարդոց միջեւ զատողութիւն դնելով եւ կաշառք առնելով։ Իսկ ագահ ընկերութիւնները մթնոլորտը կ’ապականեն, երկրին հարստութիւնները կը սպառեն եւ ժողովուրդը կ’օգտագործեն, որպէսզի քանի մը անձեր հարստութիւն դիզեն, մինչ անդին միլիոնաւորներ աղքատութեան մէջ կ’ընկղմին։ Յստակ է թէ փտած կազմակերպութիւնները պատասխանատու են այս աշխարհին մէջ եղած տառապանքին մեծ մասին։

8. Ըստ Սուրբ Գիրքին, ի՞նչ պիտի պատահի այն կազմակերպութիւններուն, որոնք շատերու աչքին հաստատ կ’երեւին։

⁸ Եհովան ի՞նչ պիտի ընէ։ Մեծ նեղութիւնը պիտի սկսի երբ քաղաքական ուժերը յարձակին բոլոր սուտ կրօնական կազմակերպութիւններուն վրայ, որոնք Սուրբ Գիրքին մէջ նկարագրուած են որպէս պոռնիկ՝ Մեծ Բաբելոն անունով (Յայտ. 17։1, 2, 16. 18։1-4)։ Այդ կրօնական կազմակերպութիւնները բոլորովին պիտի կործանին։ Լաւ, ի՞նչ պիտի պատահի բոլոր միւս փտած կազմակերպութիւններուն։ Սուրբ Գիրքը կ’ըսէ որ անոնք ճիշդ լեռներու եւ կղզիներու պէս զօրաւոր եւ հաստատ կ’երեւին (կարդա՛ Յայտնութիւն 6։14)։ Բայց ատիկա կը շարունակէ ու կ’ըսէ որ կառավարութիւնները եւ բոլոր այն կազմակերպութիւնները, որոնք թիկունք չեն կանգնիր Աստուծոյ Թագաւորութեան, պիտի կործանին։ Ասիկա մեծ նեղութեան վերջին մասը պիտի ըլլայ (Եր. 25։31-33)։ Ատկէ ետք, փտած կազմակերպութիւններ բնա՛ւ պիտի չըլլան։

9. Ինչո՞ւ կրնանք վստահ ըլլալ որ նոր երկիրը լաւ կազմակերպուած պիտի ըլլայ։

⁹ Փտած կազմակերպութիւններուն տեղ ի՞նչ պիտի գայ։ Արմագեդոնէն ետք, երկրի վրայ կազմակերպութիւն մը պիտի ըլլա՞յ։ Սուրբ Գիրքը կ’ըսէ. «Իր խոստումին համեմատ, նոր երկնքի ու նոր երկրի մը կը սպասենք, որոնց մէջ արդարութիւնը կը բնակի» (Բ. Պետ. 3։13)։ Հին երկինքը ու հին երկիրը՝ փտած կառավարութիւններն են եւ անոնց ձեռքին տակ եղող ժողովուրդները։ Երբ ատոնք մէջտեղէն վերցուին, ատոնց տեղ ի՞նչ պիտի գայ։ «Նոր երկինք ու նոր երկիր»։ Նոր երկինքը նոր կառավարութիւնն է, այն Թագաւորութիւնը որուն մէջ Յիսուս Քրիստոս եւ 144,000–ը պիտի իշխեն։ Նոր երկիրը կ’ակնարկէ այն մարդոց, որոնց վրայ Աստուծոյ Թագաւորութիւնը պիտի իշխէ։ Յիսուս եւ իր Թագաւորութիւնը կատարեալ կերպով պիտի ընդօրինակեն Եհովա Աստուած, որ կազմակերպուած Աստուած է (Ա. Կոր. 14։33)։ Ուրեմն, «նոր երկիր»ը կազմակերպուած պիտի ըլլայ։ Լաւ մարդիկ հոգ պիտի տանին ամէն բանի (Սաղ. 45։16)։ Անոնք ուղղութիւն պիտի ստանան Յիսուսէն եւ 144,000–էն։ Երեւակայէ ժամանակ մը երբ փտած կազմակերպութիւններուն տեղ պիտի ըլլայ միայն մէկ միացած կազմակերպութիւն, որ բնա՛ւ չի կրնար փտիլ։

ՍԽԱԼ ԳՈՐԾՈՒՆԷՈՒԹԻՒՆՆԵՐ

10. Շրջանիդ մէջ ի՞նչ սխալ գործունէութիւններ կան, եւ դուն ու ընտանիքդ ինչպէ՞ս կ’ազդուիք ատոնցմէ։

¹⁰ Սխալ գործունէութիւնները հիմա ինչպէ՞ս կ’ազդեն մեզի։ Կ’ապրինք աշխարհի մը մէջ, որ լեցուն է անբարոյութիւնով, անպարկեշտութիւնով եւ անգութ ու վայրագ արարքներով։ Աշխարհին ժամանցը գրաւիչ կը դարձնէ այս բաները, մինչ ծաղր կ’ընէ ճիշդի ու սխալի Աստուծոյ չափանիշները (Եսա. 5։20)։ Մասնաւորապէս ծնողները պէտք է պայքարին, որպէսզի իրենց զաւակները պաշտպանեն այսպիսի չար ազդեցութիւններէ։ Իրականութեան մէջ, բոլոր ճշմարիտ քրիստոնեաները պէտք է շատ ջանք թափեն, որ ուղղամիտ մնան այս աշխարհին մէջ, որ Աստուծոյ չափանիշները չի յարգեր։

11. Ի՞նչ կը սորվինք Սոդոմի ու Գոմորի կործանումէն։

¹¹ Եհովան ի՞նչ պիտի ընէ սխալ գործունէութիւններուն նկատմամբ։ Նկատի առ թէ ան ի՛նչ ըրաւ Սոդոմի ու Գոմորի մէջ եղած սխալ բաներուն նկատմամբ (կարդա՛ Բ. Պետրոս 2։6-8)։ Ղովտ հոն ապրող արդար մարդ մըն էր, եւ ինք ու իր ընտանիքը նեղութիւն կը կրէին մարդոց սխալ արարքներուն պատճառաւ։ Եհովան բոլոր այդ շրջանը կործանեց, որպէսզի գէշ բաներուն վերջ դնէ։ Բայց այդպիսով ան նաեւ օրինակ մը ձգեց հիմակուան չար մարդոց։ Ճիշդ ինչպէս որ այդ ժամանակ Եհովան վերջ դրաւ բոլոր անբարոյ գործունէութիւններուն, ան ներկայիս ալ ատոնց վերջ պիտի դնէ, երբ այս չար աշխարհը կործանէ։

12. Ո՞ր գործունէութիւններուն կ’ուզես մասնակցիլ՝ այս չար աշխարհը մէջտեղէն վերցուելէ ետք։

¹² Սխալ գործունէութիւններուն տեղ ի՞նչ պիտի գայ։ Նոր աշխարհին մէջ զբաղած պիտի ըլլանք շատ մը ուրախ գործունէութիւններով։ Օրինակ՝ երկիրը դրախտի պիտի վերածենք եւ տուներ պիտի շինենք մեզի եւ մեր սիրելիներուն համար։ Նաեւ պիտի դիմաւորենք յարութիւն առած միլիոնաւոր անձեր, եւ անոնց պիտի սորվեցնենք Եհովային մասին եւ մարդոց ի նպաստ իր ըրածներուն մասին (Եսա. 65։21, 22. Գործք 24։15)։ Այդ ժամանակ, մեր կեանքը լեցուն պիտի ըլլայ այնպիսի գործունէութիւններով, որոնք մեզ պիտի ուրախացնեն եւ Եհովային փառք պիտի բերեն։

ԳԷՇ ՎԻՃԱԿՆԵՐ

13. Սատանային, Ադամին ու Եւային ըմբոստութեան արդիւնքը ի՞նչ եղած է։

¹³ Գէշ վիճակները հիմա ինչպէ՞ս կ’ազդեն մեզի։ Այս աշխարհին չար մարդիկը, փտած կազմակերպութիւնները եւ սխալ գործունէութիւնները ձգած են որ գէշ վիճակներ տիրեն։ Բոլորիս կ’ազդեն պատերազմները, աղքատութիւնը, ցեղապաշտութիւնը, հիւանդութիւնները եւ մահը։ Այս գէշ վիճակները սկսան քանի որ Սատանան, Ադամը ու Եւան ըմբոստացան Եհովային դէմ։ Եւ բոլորս ազդուած ենք անոնց ըմբոստութենէն։

14. Եհովան ի՞նչ պիտի ընէ գէշ վիճակներուն նկատմամբ։

¹⁴ Եհովան ի՞նչ պիտի ընէ գէշ վիճակներուն նկատմամբ։ Նկատի առ կարգ մը օրինակներ։ Եհովան կը խոստանայ որ պատերազմներուն վերջ պիտի դնէ (կարդա՛ Սաղմոս 46։8, 9)։ Ան հիւանդութիւնները մէջտեղէն պիտի վերցնէ (Եսա. 33։24)։ Եհովան մահը արմատէն պիտի հանէ (Եսա. 25։8)։ Ան աղքատութեան վերջ պիտի դնէ (Սաղ. 72։12-16)։ Ան նաեւ պիտի վերցնէ բոլոր միւս գէշ վիճակները որ կեանքը լեղի կը դարձնեն։ Ան նոյնիսկ պիտի անհետացնէ Սատանային եւ իր դեւերուն ազդեցութիւնը (Եփ. 2։2)։

15. Արմագեդոնէն ետք ի՞նչ բաներ յաւիտեան գացած պիտի ըլլան։

¹⁵ Կրնա՞ս երեւակայել աշխարհ մը՝ ուր պատերազմ, հիւանդութիւն կամ մահ չկայ։ Պահ մը մտածէ. ո՛չ զինուորներ կան, ոչ ալ զէնքեր եւ պատերազմի յուշարձաններ։ Պէտք պիտի չունենանք հիւանդանոցներու, բժիշկներու, առողջապահական ապահովագրութիւններու, մեռելանոցներու եւ գերեզմանատուներու։ Ոճրագործութիւն պիտի չըլլայ. ուրեմն պէտք պիտի չունենանք ոստիկաններու, ահազանգի սարքերու կամ թերեւս նոյնիսկ կղպանքներու եւ բանալիներու։ Այլեւս մտահոգութիւնը մեզ պիտի չուտէ։

16, 17. ա) Արմագեդոնէն վերապրողները ի՞նչ պիտի զգան։ բ) Ի՞նչ կրնանք ընել որ մնանք, երբ այս հին աշխարհը վերջ գտնէ։

¹⁶ Կեանքը ինչպէ՞ս պիտի ըլլայ, երբ նեղացուցիչ վիճակները անհետանան։ Ասիկա դիւրին–դիւրին չենք կրնար երեւակայել։ Այնքան երկար ատենէ կ’ապրինք գէշ վիճակներու մէջ, որ այլեւս չենք անդրադառնար որ ատոնք որքան կը ճնշեն մեզ։ Ասիկա կը նմանի շոգեկառքի կայանին կամ աղբանոցի մը մօտ ապրողներուն վիճակին։ Կայանին մօտ ապրողը, այլեւս աղմուկը չի նկատեր. իսկ աղբանոցին մօտ ապրողը, այլեւս գարշելի հոտէն չի նեղանար։ Բայց եթէ այս ժխտական բաները մէջտեղէն վերցուին, որքա՜ն հանգստութիւն կ’ըլլայ։

¹⁷ Բոլոր այս ճնշումներուն տեղ ի՞նչ պիտի գայ։ Սաղմոս 37։11–ը կը պատասխանէ. «Խաղաղութեան առատութիւնովը պիտի ուրախանան»։ Եհովան ասիկա կը փափաքի մեր ամէն մէկուն։ Ասիկա սրտիդ չի՞ դպչիր։ Ուրեմն, ամէն կարելիդ ըրէ որ Եհովային եւ իր կազմակերպութեան մօտիկ մնաս այս վերջին օրերուն ընթացքին։ Գուրգուրա՛ յոյսիդ վրայ, ատոր մասին խոկա՛, թող որ ատիկա քեզի համար իրական ըլլայ եւ ուրիշներուն ալ պատմէ ատոր մասին (Ա. Տիմ. 4։15, 16. Ա. Պետ. 3։15)։ Այսպիսով, վստահ կրնաս ըլլալ որ երբ այս չար աշխարհը մէջտեղէն վերցուի, դուն ողջ պիտի մնաս եւ յաւիտեան ուրախ պիտի ըլլաս։